ប្រទេសចិន ៖ ព្យុះមង្ឃុតដែលជាព្យុះខ្លាំងបំផុតមួយ កាលពីថ្ងៃទី១៦ កញ្ញា បានវាយប្រហារដល់ចិនដីគោក បណ្ដាលឲ្យមានមនុស្សស្លាប់ ក្រោយពីវាសាប ព្រោះការជ្រួលច្របល់នៅហុងកុង បណ្ដាលឲ្យមនុស្សជាង៣០០នាក់រងរបួស…
ប្រទេសចិន ៖ ព្យុះមង្ឃុតដែលជាព្យុះខ្លាំងបំផុតមួយ កាលពីថ្ងៃទី១៦ កញ្ញា បានវាយប្រហារដល់ចិនដីគោក បណ្ដាលឲ្យមានមនុស្សស្លាប់ ក្រោយពីវាសាប ព្រោះការជ្រួលច្របល់នៅហុងកុង បណ្ដាលឲ្យមនុស្សជាង៣០០នាក់រងរបួស និងវាយប្រហារលើភាគខាងជើងហ្វ៊ីលីពីន បណ្ដាលឲ្យមនុស្សយ៉ាងតិច៦៥នាក់ស្លាប់ហើយមនុស្ស៤៣នាក់ទៀតនៅតែបាត់ខ្លួនមក។
ព្យុះមង្ឃុតបោកបក់ដល់ទីក្រុង JIANGMEN ខេត្តក្វាងទុង នាថ្ងៃទី១៦ កញ្ញា វេលាម៉ោង១៧ម៉ោងក្នុងស្រុក អមដោយខ្យល់ក្នុងល្បឿន១៦២គីឡូម៉ែត្រក្នុង១ម៉ោង។ អាជ្ញាធរក៏បានប្រកាសពីការជម្លៀសមនុស្សដល់ប្រមាណ៣លាននាក់ចេញ ហើយនាវានេសាទជាង៤៨.០០០គ្រឿងប្រកាសឲ្យចូលកំពង់ផែ។
ព្យុះនោះចាត់ទុកជាព្យុះខ្លាំងជាងគេបំផុតលើពិភពលោកចាប់តាំងពីដើមឆ្នាំនេះមក។ វាបានវាយប្រហារយ៉ាងខ្លាំងលើបណ្ដាតំបន់កសិកម្មនាភាគខាងជើងកោះលូហ្សុង ជាកោះធំជាងគេរបស់ហ្វ៊ីលីពីន។ នៅភាគខាងជើងហ្វ៊ីលីពីន បណ្ដាមធ្យោបាយគមនាគមន៍ និងអគ្គិសនីត្រូវដាច់ ក្នុងផ្នែកយ៉ាងធំនៃតំបន់ព្យុះឆ្លងកាត់ ដែលមានប្រជាជនរស់នៅប្រមាណជា៥លាននាក់។ ហើយគេមានការលំបាកក្នុងការវាយតម្លៃលើចំនួនជនរងគ្រោះពិតប្រាកដនិងទំហំនៃការខូចខាត។
នៅក្រុងហុងកុងខាងផ្នែកឧតុនិយមបានចេញការប្រកាសអាសន្នកម្រិតខ្ពស់បំផុត ខណៈទីនោះរងការវាយប្រហារដោយខ្យល់ក្នុងល្បឿនដល់ទៅជាង២៣០គីឡូម៉ែត្រក្នុងមួយម៉ោង ហើយបណ្ដាលឲ្យមនុស្សយ៉ាងតិច៣០០នាក់រងរបួស។
ក្រោយព្យុះមង្ឃុតដែលបណ្ដាសារព័ត៌មានដាក់រហស្សនាមថា ស្ដេចព្យុះ អាជ្ញាធរក្រុងហុងកុងនិយាយថា ការខូតខាតពិតជាធ្ងន់ធ្ងរ។ ពេលខ្យល់ស្ងប់ទៅវិញ នាយប់ថ្ងៃទី១៦កញ្ញាផ្នែកការពារស៊ីវិលចាប់ផ្ដើមការងារសម្អាតតាមដងវិថីទាំងឡាយដែលមានដើមឈើ មែកឈើនិងបំណែកនានារាយប៉ាយពេញ។តំបន់មួយចំនួនរងការហូរភក់និងទឹកជំនន់ធ្ងន់ធ្ងរ ទាក់ទិននឹងរលកធំៗ។
ថ្ងៃទី១៧ កញ្ញា វេលាម៉ោង៦ព្រឹកព្យុះមង្ឃុតបោកបក់ឆ្ពោះទៅទិសខាងលិចនិងខេត្តក្វាងស៊ី រួចចុះថមថយកម្លាំងមកជាព្យុះត្រូពីកាល់។ព្យុះនេះក៏បោកបក់ដែរលើតំបន់ GUIZHOU ចុងគិញនិងយុនណាន់៕
ចែករំលែកព័តមាននេះ