រាជធានីភ្នំពេញ ៖ សាលាឧទ្ធរណ៍បានសម្រេចលុបចោលសវនាការលើបណ្តឹងសុំនៅក្រៅឃុំរបស់លោក កឹម សុខា អតីតប្រធានគណបក្សសង្គ្រោះជាតិដែលគ្រោងធ្វើឡើងនៅថ្ងៃទី១៧ ខែកញ្ញា ឆ្នាំ២០១៨នេះ បន្ទាប់ពីក្រុមមេធាវីការពារសិទ្ធិលោក កឹមសុខា បានសម្រេចពាក្យបណ្តឹង ក្រោយពេលចៅក្រមបានសម្រេចឲ្យលោកនៅក្រៅឃុំបណ្តោះអាសន្ន កាលពីថ្ងៃទី១០ ខែកញ្ញា ២០១៨កន្លងមកនេះ ។ នេះបើតាមអ្នកនាំពាក្យសាលាឧទ្ធរណ៍លោក ទូត ថារិទ្ធ ។
លោក ចាន់ ចេន មេធាវីការពារសិទ្ធិលោក កឹម សុខា បានបញ្ជាក់ថា ក្រុមមេធាវីបានដាក់ពាក្យប្តឹងឧទ្ធរណ៍ប្រឆាំងការសម្រេចរបស់លោកគីឫទ្ធី ចៅក្រមស៊ើបសួរសាលាដំបួងរាជធានីភ្នំពេញ កាលពីថ្ងៃទី៣០ សីហា ឆ្នាំ២០១៨ បានសម្រេចបន្តឃុំខ្លួនកូនក្តីរបស់លោក៦ខែនៅពន្ធនាគារត្រពាំងផ្លុង ។ បន្ទាប់មកលោកចៅក្រមបានសម្រេចដោះលែងលោក កឹម សុខា ឲ្យនៅក្រៅឃុំបណ្តោះអាសន្ន ទើបក្រុមមេធាវីសម្រេចដកពាក្យបណ្តឹងវិញ ។
លោកមេធាវីបានលើកឡើងថា ក្រុមមេធាវីការពារសិទ្ធិជនត្រូវចោទលោក កឹម សុខា មិនទាន់បានទទួលព័ត៌មាន ផ្លូវការពីសាលាឧទ្ធរណ៍ពីការលុបចោទសវនាការ ឬលើកពេលទេ ។ លោកថា បើសិនជាពាក្យបណ្តឹងត្រូវបានដើមបណ្តឹងដកវិញ មិនមានសវនាការណាមួយធ្វើឡើងកើតទេ ។ នៅពេលសួរថា ពេលនេះស្ថានភាពលោក កឹម សុខា យ៉ាងម៉េចដែរ ? លោកមេធាវីបានបដិសេធមិនធ្វើអត្ថាធិប្បាយទេ ។ លោកថា«ខ្ញុំបានលើកឡើងច្រើនដងហើយរឿងនេះសូមទោសមិនអាចជូនព័ត៌មានបានទេ » ។
គួរបញ្ជាក់ថា លោក កឹម សុខា អាយុ៦៤ឆ្នាំ ត្រូវបានឃាត់ខ្លួន កាលពីអធ្រាត្រថ្ងៃទី៣ ខែកញ្ញាឆ្នាំ២០១៧ នៅក្នុងផ្ទះរបស់លោកសង្កាត់បឹងកក់២ ខណ្ឌទួលគោក រាជធានីភ្នំពេញ ។ តុលាការបានចោទប្រកានលោកពីបទ«សន្ធិដ្ឋិភាពជាមួយបរទេស» តាមមាត្រា៤៤៣នៃក្រមព្រហ្មទណ្ឌកម្ពុជា ។ តាមច្បាប់នេះប្រសិនតុលាការរកឃើញទោសលោកអាចប្រឈមនឹងទោសជាប់ពន្ធនាគារពី១៥ដល់៣០ឆ្នាំ ។
ក្រោយពេលចាប់ខ្លួនតុលាការបានឃុំលោកអស់រយៈពេលជាង១ឆ្នាំនៅពន្ធនាគារត្រពាំងផ្លុងក្នុងខេត្តត្បូងឃ្មុំ ។ កាលពីវេលាម៉ោងប្រហែល៣ទាបភ្លឺតុលាការបានដោះលែងលោកត្រូវបានគេដឹកមកដល់ផ្ទះវិញ ។
ទោះបីយ៉ាងណាក្តី មុនពេលដកពាក្យបណ្តឹងឧទ្ធរណ៍របស់ក្រុមមេធាវីការពារសិទ្ធិជនត្រូវចោទអគ្គព្រះរាជអាជ្ញាសាលាឧទ្ធរណ៍លោក អ៊ឹម សុផាន បានចេញដីកាមួយជូនទៅពន្ធនាគារត្រពាំងផ្លុង ឲ្យនាំលោក កឹម សុខា មកចូលរួមសវនាការដែលគ្រោងធ្វើឡើងនៅវេលាម៉ោង២រសៀលថ្ងៃទី១៧ កញ្ញានេះ មុនពេលក្រុមមេធាវីដកពាក្យបណ្តឹងវិញ ។
អ្នកតាមដាននយោបាយបានលើកឡើងថាលោក កឹម សុខា ធ្លាប់ត្រូវបានចាប់ខ្លួន កាលពីកំឡុងឆ្នាំ២០០៤- ២០០៥ កាលពីលោកជាប្រធានមជ្ឈមណ្ឌលសិទ្ធិមនុស្សកម្ពុជាឃុំខ្លួននៅពន្ធនាគារព្រៃស ជាមួយបុគ្គលិកសង្គមស៊ីវិលមួយចំនួនទៀត ហើយក្រោយមកត្រូវបានដោះលែងមកវិញ ។ ក្រៅពីសំណុំរឿងខាងលើលោកនៅមានសំណុំរឿងមួយចំនួនទៀតនៅតុលាការ ៕
ចែករំលែកព័តមាននេះ