រាជធានីភ្នំពេញ ៖ នគរបាលប៉ុស្តិ៍ចោមចៅ៣ ខណ្ឌពោធិ៍សែនជ័យ បានបើកការស្រាវជ្រាវមួយលើសកម្មភាពអ្នកផ្សារព្រៃទាមួយក្រុម ដែលបានព្រួតគ្នាចាប់ក្មេងស្រីម្នាក់់វ៉ៃទាត់ធាក់ផ្តួលជាន់សង្កត់ រួចចាប់បង្ខំកោរសក់ក្បាល ដោយចោទប្រកាន់ថា ជាចោរចូលទៅក្នុងផ្ទះលក់ទំនិញមួយប៉ុនប៉ងលួចទូរស័ព្ទ និងលុយកាក់ពួកគាត់ ។
នៅវេលាម៉ោង១២ថ្ងៃត្រង់ថ្ងៃទី១៤ កញ្ញា នគរបាលប៉ុស្តិ៍ខាងលើ បានកោះហៅបុរស៣នាក់ និងស្ត្រីម្នាក់ដែលជាអ្នកដៃដល់វាយដំធ្វើទារុណ និងចាប់ក្មេងស្រីម្នាក់កោរសក់ក្បាល ទៅធ្វើការសាកសួរនៅប៉ុស្តិ៍ដើម្បីបំភ្លឺ ជុំវិញរឿងរ៉ាវខាងលើ ។ ខណៈនោះ ស្រាប់តែអ្នកផ្សារជាង៣០នាក់ទៀត បាននាំគ្នាទៅកាន់ប៉ុស្តិ៍នគរបាលដែរ ដើម្បីគាំទ្រមនុស្ស៤នាក់ ដែលត្រូវនគរបាលហៅទៅសាកសួរនោះ ។ ប៉ុន្តែទោះបីជាបែបណា នៅមិនទាន់ដឹងថា តើនគរបាលមានការសម្រេចបែបណានៅឡើយទេ ក្នុងករណីមួយនេះ ហើយមនុស្សទាំង៤នាក់ ដែលហៅទៅសាកសួរនោះ ត្រូវនគរបាលឃាត់់ខ្លួន ឬបែបណាឡើយ ។
មន្ត្រីនគរបាលប៉ុស្តិ៍ចោមចៅ៣និយាយថា បន្ទាប់ពីទទួលបានដំណឹងនេះភ្លាម កម្លាំងសមត្ថកិច្ចក៏ទៅកាន់កន្លែងកើតហេតុនោះភ្លាមដែរ ប៉ុន្តែពេលទៅដល់ស្ត្រីសង្ស័យត្រូវបានអ្នកផ្សារដោះលែងផុតបាត់ទៅហើយ ។ លុះពេលសួរនាំទៅថា ក្មេងស្រីម្នាក់នោះ មិនទាន់លួចបានរបស់អ្វីនៅឡើយទេ ដោយគ្រាន់តែដើរចូលទៅក្នុងផ្ទះលក់ទំនិញ និងសង្ស័យថា ប៉ុនប៉ងលួចទូរស័ព្ទប៉ុណ្ណោះ ទើបកម្លាំងសមត្ថកិច្ចត្រឡប់មកប៉ុស្តិ៍វិញ ។ លុះក្រោយមក ស្រាប់តែលេចធ្លាយរូបភាពនៃអំពើហិង្សាយ៉ាងសាហាវ ដែលអ្នកផ្សារ៤នាក់ចាប់នាងវ៉ៃផ្តួលជាន់សង្កត់ និងកោរសក់ក្បាល ។ ទើបមានការភ្ញាក់ផ្អើលដល់ថ្នាក់លើ បញ្ជាឲ្យបើកការស្រាវជ្រាវ ហើយនគរបាលប៉ុស្តិ៍ ក៏បានហៅមនុស្ស៤នាក់មកសាកសួរ ក្នុងនោះ មានបុរសអ្នកកោរសក់ អ្នកវាយ និងអ្នកដែលអះអាងថា ជាម្ចាស់ទូរស័ព្ទដែលត្រូវក្មេងស្រីនោះលួច ហើយអត់ទាន់ដឹងពីគោលការណ៍ថ្នាក់លើយ៉ាងណាបន្តទៀតឡើយ ។
ជុំវិញករណីដែលបានកើតឡើងនេះ ធ្វើឲ្យមានមតិ២ចោទប្រកាន់គ្នាទៅវិញទៅមក កក្រើកក្នុងបណ្តាញសង្គមហ្វេសប៊ុក ។ មានមតិខ្លះនិយាយថា អ្នកដែលថ្កោលទោសទៅលើអ្នកប្រើហិង្សាលើក្មេងស្រី គឺជាអ្នកការពារចោរ ។ តែអ្នកខ្លះទៀតនិយាយថា អំពើហិង្សាបែបនេះ គឺជាអំពើព្រៃផ្សៃមិនអាចទទួលយកបាន ។
សូមរំឭកថា កាលពីវេលាម៉ោង១ និង៣០នាទីរសៀលថ្ងៃទី១៣ ខែកញ្ញា នៅផ្សារព្រៃទា ស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ មានការចាប់ខ្លួនក្មេងស្រីម្នាក់ ដោយក្រុមអាជីវករនៅផ្សារខាងលើ ហើយចោទប្រកាន់នាងថាគឺជាមុខសញ្ញាចោរលួចបានចូលទៅលួចទូរស័ព្ទនិងលុយកាក់នៅក្នុងផ្ទះពួកគាត់។
ក្មេងស្រីខាងលើមិនត្រូវបានគេស្គាល់ឈ្មោះទេ នាងមានអាយុប្រហែលជិត២០ឆ្នាំប៉ុណ្ណោះ និងបាននិយាយថា នាងមានស្រុកកំណើតនៅក្រុងពោធិ៍សាត់ ។
តាមប្រភពព័ត៌មានឲ្យដឹងថា នាវេលាម៉ោងជាង១រសៀលថ្ងៃនោះ ក្មេងស្រីខាងលើបានដើរចូលទៅក្នុងផ្ទះលក់ទំនិញក្នុងផ្សារ ។ ខណៈនោះ ម្ចាស់ផ្ទះអះអាងថានាងចូលទៅលួចទូរស័ព្ទ តែគាត់ឃើញទាន់ក៏ស្រែកថាចោរៗ បង្កឲ្យមានការភ្ញាក់ផ្អើលនិងចាប់ខ្លួនបាន ។ ដោយសារតែកន្លងមក អ្នកផ្សារធ្លាប់បាត់ទូរស័ព្ទដែលមានតម្លៃថ្លៃៗ ព្រមទាំងបាត់កាបូបលុយជាបន្តបន្ទាប់ ប៉ុន្តែរកមុខចោរមិនដែលឃើញម្ដងណានោះ ទើបនៅពេលចាប់បានក្មេងស្រីខាងលើក៏នាំគ្នាវាយដំ ហើយស្រែកថាចោរៗព្រមទាំងស្រែកគំរាមឲ្យលុតជង្គង់ មានអ្នកខ្លះទះមុខមាត់នាងខ្លាំងៗ ។ បន្ទាប់មកចាប់ផ្ដួលទៅនឹងដីដោយជាន់សង្កត់ពីលើ រួចកោរសក់ក្បាលអស់មួយចំហៀងនិងវាយមួយឆ្អែតថែមទៀត ទើបដោះលែងទៅវិញដោយអត់មានវត្ថុតាងថា នាងជាចោរទេ ហើយនាងក៏ប្រកែកថាមិនមែននាងធ្វើចោរទេ ។
ប្រភពដដែលបានបន្តថា ខណៈត្រូវចាប់ខ្លួននោះ ក្មេងស្រីរូបនេះបានលើកដៃសំពះអង្វរសុំការលើកលែងទោស និងកុំឲ្យវាយតប់ ព្រមទាំងកុំថតរូបនាងបង្ហោះតាមហ្វេសប៊ុក ។ នាងក៏បានបដិសេធម្ដងហើយម្ដងទៀតថា នាងមិនមែនជាចោរទេ ហើយក៏មិនដែលធ្លាប់លួចរបស់អ្នកដទៃ និងមិនធ្លាប់ទៅផ្សារព្រៃទានោះដែរ ។ ប៉ុន្តែដោយសារតែកំហឹង ព្រោះតែធ្លាប់បាត់ទ្រព្យសម្បត្តិនាពេលកន្លងមកនោះ ទើបអ្នកផ្សារខាងលើដែលគ្រាន់តែស្រែកថាចោរ ក៏ចាប់នាងវ៉ៃទាត់ធាក់ពេញទៅដោយកំហឹងព្រៃផ្សៃ ព្រមទាំងមិនស្ដាប់ការអង្វរនិងបកស្រាយរបស់នាងឡើយ ។ មិនតែប៉ុណ្ណោះគេនាំគ្នាចាប់នាងផ្ដួលទៅលើដីជាន់កកោរសក់ ។
នៅក្នុងរូបភាពវីដេអូ គេឃើញបុរសម្នាក់ស្លៀកកន្សែងពណ៌ក្រហម អត់ពាក់អាវ កាន់កន្ត្រៃកាត់សក់ប្រើម៉ូទ័រ ជាអ្នកកោរសក់ក្បាលរបស់ក្មេងស្រី ។ ឯបុរសម្នាក់ទៀតជាអ្នកជួយចាប់ និងម្នាក់ទៀតជាន់លើខ្លួននាង គឺជាទារុណកម្មព្រៃផ្សៃណាស់ ។ ខណៈនោះ គេឃើញនាងក្រាញននៀលមិនចង់ឲ្យកោរឡើយ ប៉ុន្តែទីបំផុត នៅតែត្រូវចាប់កោរសក់អស់១ចំហៀងក្បាលដដែលយ៉ាងទារុណបំផុត ។ ក្រោយពីកោរសក់រួចក៏បានវាយថែម រួចទើបដោះលែងទៅវិញ មិនបានប្រគល់ឲ្យនគរបាលដើម្បីធ្វើការស្រាវជ្រាវឡើយ ហើយក៏មិនបានដឹងថាក្មេងស្រីម្នាក់នោះទៅកន្លែងណាដែរ។
ភ្លាមៗ នគរបាលប៉ុស្តិ៍ចោមចៅ៣បានទៅកាន់កន្លែងកើតហេតុ ប៉ុន្តែនៅពេលទៅដល់ក្មេងស្រីរូបនេះត្រូវបានគេដោះលែងផុតទៅហើយ ។អ្នកច្បាប់ម្នាក់និយាយខ្លីថា បើចោរមែន…តាមច្បាប់ត្រូវទទួលទោស ។ ចំណែកអ្នកវ៉ៃ…តាមច្បាប់មានទោសធ្ងន់ជាងចោរ៣ដង ។នៅទីបំផុតត្រឹមវេលាល្ងាចថ្ងៃដែលមនុស្ស៣នាក់ក្នុងចំណោម៤នាក់ មានឪពុក-ម្ដាយនិងកូនត្រូវឃាត់ខ្លួន ឯម្នាក់ទៀតជាអ្នកបំភ្លឺ ៕
ចែករំលែកព័តមាននេះ