រាជធានីភ្នំពេញ ៖ តារាចម្រៀងប្រចាំផលិតកម្មសាន់ដេកញ្ញាយូរី បានចាកចេញពីកម្ពុជាក្នុងនាមជាតំណាងឲ្យសិល្បករកម្ពុជា ចូលរួមច្រៀងនៅក្នុងព្រឹត្តិការណ៍ពិព័រណ៍ពាណិជ្ជកម្ម និងសេដ្ឋកិច្ចអន្តរជាតិចិន-អាស៊ានលើកទី១៥ ដែលរៀបចំឡើងនៅក្រុងណាននីង ខេត្តក្វាងស៊ី នៃសាធារណរដ្ឋ ប្រជាមានិតចិន…
រាជធានីភ្នំពេញ ៖ តារាចម្រៀងប្រចាំផលិតកម្មសាន់ដេកញ្ញាយូរី បានចាកចេញពីកម្ពុជាក្នុងនាមជាតំណាងឲ្យសិល្បករកម្ពុជា ចូលរួមច្រៀងនៅក្នុងព្រឹត្តិការណ៍ពិព័រណ៍ពាណិជ្ជកម្ម និងសេដ្ឋកិច្ចអន្តរជាតិចិន-អាស៊ានលើកទី១៥ ដែលរៀបចំឡើងនៅក្រុងណាននីង ខេត្តក្វាងស៊ី នៃសាធារណរដ្ឋ ប្រជាមានិតចិន ។
កញ្ញាយូរី បានបង្ហាញអារម្មណ៍រំភើបរីករាយ ដែលនាងទទួលបានឱកាសចេញទៅច្រៀងតំណាងឲ្យកម្ពុជា នៅលើទឹកដីនៃប្រទេសចិនជាលើកដំបូងនេះ ។ យូរីបានបញ្ជាក់ថា នាងបានត្រៀមរួចមុនជាស្រេច ដើម្បីចូលរួមច្រៀងទាំងបទចម្រៀងជាតិផ្ទាល់ខ្លួន និងបទចម្រៀងច្រៀងរួម ដែលអ្នកផលិតកម្មវិធីបានផ្តល់ឲ្យ ។ មុនពេលចាកចេញ នាងបានហ្វឹកហាត់ច្រៀងបទចម្រៀងផ្ទាល់ខ្លួន និងបទចម្រៀងថ្មី ដែលកម្មវិធីផ្តល់ឲ្យដើម្បីឲ្យប្រាកដថានឹងអាចធ្វើបានល្អនៅពេលច្រៀងរាំនៅលើឆាកអន្តរជាតិ និងតំណាងឲ្យជាតិ ជាមួយនឹងការត្រៀមរួចជាស្រេចនូវសម្លៀកបំពាក់ទាំងសម័យ និងប្រពៃណី ។
យូរីឲ្យដឹងថាព្រឹត្តិការណ៍ពិព័រណ៍ដ៏អស្ចារ្យ និងកម្មវិធីសិល្បៈមកពីបណ្តាប្រទេសក្នុងតំបន់អាស៊ាន និងចិននេះ មានការផ្សាយបន្តផ្ទាល់ពីទូរទស្សន៍Nice TV ផងដែរ ហើយយូរី ជឿថា ទស្សនិកជនខ្មែរ ពិតជាបានទស្សនាដោយផ្ទាល់ ព្រមទាំងមានមោទនភាពចំពោះប្រទេសកម្ពុជាក្នុងព្រឹត្តិការណ៍អន្តជាតិដ៏ធំនោះ ។
យូរី និយាយថា«យើងទាំងអស់គ្នាមានកិត្តិយស និងមោទនភាពចំពោះប្រទេសកម្ពុជា ដែលមានកិត្តិយសក្នុងពិព័រណ៍នេះ ។ វាជាការបង្ហាញពីវឌ្ឍនភាព និងសមិទ្ធផល សំខាន់ៗរបស់កម្ពុជានៅក្នុងវិស័យពាណិជ្ជកម្ម និងសេដ្ឋកិច្ចអន្តរជាតិមួយនេះ »។
ចាប់ពីថ្ងៃទី១២ ខែកញ្ញា ឆ្នាំ២០១៨ ពិព័រណ៍ពាណិជ្ជកម្ម និងសេដ្ឋកិច្ចអន្តរជាតិចិន-អាស៊ានលើកទី១៥ ប្រារព្ធធ្វើឡើងនៅទីក្រុងណាននីងខេត្តក្វាងស៊ី ដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានអញ្ជើញជាអតិបតីចូលរួមក្នុងព្រឹត្តិការណ៍សំខាន់នេះផងដែរ ៕
ចែករំលែកព័តមាននេះ