រាជធានីភ្នំពេញ ៖ ក្នុងជំនួបពិភាក្សាទ្វេរភាគីសម្តេច ហេង សំរិន ប្រធានរដ្ឋសភាបានប្រកាសគាំទ្រក្រុមហ៊ុនធំមួយរបស់ចិនធ្វើការវិនិយោគនៅកម្ពុជានាពេលខាងមុខនេះ ។ ការប្រកាសគាំទ្រនេះធ្វើឡើងបន្ទាប់ពីលោក កឺ ឈួនបាវ…
រាជធានីភ្នំពេញ ៖ ក្នុងជំនួបពិភាក្សាទ្វេរភាគីសម្តេច ហេង សំរិន ប្រធានរដ្ឋសភាបានប្រកាសគាំទ្រក្រុមហ៊ុនធំមួយរបស់ចិនធ្វើការវិនិយោគនៅកម្ពុជានាពេលខាងមុខនេះ ។
ការប្រកាសគាំទ្រនេះធ្វើឡើងបន្ទាប់ពីលោក កឺ ឈួនបាវ នាយកប្រតិបត្តិក្រុមហ៊ុន សៀងហៃ គួស៊ីគ្រុប ខេត្តចាំង ស៊ូ របស់ប្រទេសចិនអនុញ្ញាតឲ្យសវនាការនាព្រឹកថ្ងៃទី១៣ កញ្ញានេះ នៅវិ មានរដ្ឋសភា។ ក្នុងជំនួបលោកនាយកប្រតិបត្តិបានស្នើសុំសម្តេចប្រធានរដ្ឋសភាគាំទ្រ និងផ្តល់កិច្ចសហការដល់ក្រុមហ៊ុនរបស់លោកដែលមានបំណងយ៉ាងមុះមុតនៅក្នុងការវិនិយោគនៅកម្ពុជាដែលជាផ្នែកមួយចូលរួមចំណែកអភិវឌ្ឍន៍កម្ពុជា ពិសេសការផ្តល់ការងារដល់ប្រជាពលរដ្ឋខ្មែរ ។
លោកនាយកប្រតិបត្តិក្រុមហ៊ុនសៀងហៃ គួស៊ីគ្រុប ខណៈដែលលោកបានជម្រាបសម្តេចប្រធានថា ការបំពេញទស្សនកិច្ចនៅកម្ពុជាលោកបានសង្កេតឃើញពីសក្តានុពលយ៉ាងខ្លាំងរបស់កម្ពុជាហើយ នៅពេលត្រឡប់ទៅប្រទេសចិនវិញក្រុមហ៊ុនលោកនឹងទាក់ទាញអ្នកវិនិ យោគនានាមកបណ្តាក់ទុននៅកម្ពុជា ។ លោក កឺ ឈួនបាវ បានបញ្ជាក់បន្ថែមថា ក្រុមហ៊ុនសៀងហៃ គួស៊ីគ្រុប ខេត្តចាំងស៊ូ គឺជាក្រុមហ៊ុនធំរបស់ចិនដែលមានទុនវិនិយោគមកពីប្រទេសសឹង្ហបុរី និងសហរដ្ឋអាមេរិកដែលមានទុនវិនិយោគប្រមាណ១៩ពាន់លានដុល្លារ ។
ការវិនិយោគនៅកម្ពុជាជាផ្នែកមួយក្នុងការអនុវត្តតាមយុទ្ធសាស្ត្រខ្សែក្រវ៉ាត់មួយផ្លូវមួយរបស់ចិន ។ សម្តេច ហេង សំរិន បានគាំទ្រចំពោះគម្រោងវិនិយោគនេះដោយសម្តេចបានគូស បញ្ជាក់ថា ទាំងរដ្ឋសភា និងរាជរដ្ឋាភិបាលកម្ពុជាយកចិត្តទុកដាក់ និងជំរុញលើកទឹកចិត្តចំ ពោះវិនិយោគផ្ទាល់ពីបរទេសលើគ្រប់វិស័យ ហើយទទួលបានការចាប់អារម្មណ៍ និងការគាំទ្រដោយមានក្រុមហ៊ុនធំៗពីបរទេសជាច្រើនបាននឹងកំពុងអនុវត្តផែនការវិនិយោគរបស់ពួកគេ ។
សម្តេចប្រធានរដ្ឋសភាបានមានប្រសាសន៍បន្តថា ការភ្ជាប់ជើងហោះហើរត្រង់មកកម្ពុជាពីបណ្តាប្រទេសមានសេដ្ឋកិច្ចលូតលាស់ផ្សេងៗវាបានជម្រុញឲ្យមានកំណើនទេសចរណ៍ និងការវិនិយោគផ្ទាល់ពីបរទេសមកកាន់កម្ពុជាកាន់តែច្រើនរៀងរាល់ឆ្នាំ ជាពិសេសប្រទេសចិនផ្ទាល់តែម្តង ។
ចំណែកប្រទេសចិន គឺជាដៃគូរវិនិយោគដ៏មានសក្តានុពលរបស់កម្ពុជា ។ សម្តេចក៏បានលើកឡើងថា គិតមកដល់ឆ្នាំ២០១៧ ទុនវិនិយោគរបស់ចិនឈរនៅលេខរៀងលំដាប់ទី១ គឺមានទឹកប្រាក់ប្រមាណជា១៦ពាន់លានដុល្លារអាមេរិក ។ បើតាមគម្រោងក្រុមហ៊ុនចិនសៀងហៃ គួស៊ីគ្រុប នឹងចុះកិច្ចព្រមព្រៀងវិនិយោគជាមួយក្រុមហ៊ុនក្នុងស្រុកមួយឈ្មោះ ឆាយ ឆាយ អ៊ិនវេសម៉េន ក្នុងទំហំទឹកប្រាក់២០០លានដុល្លារអាមេរិក ៕
ចែករំលែកព័តមាននេះ