ប្រទេសអេស្ប៉ាញ ៖ ពួកឯករាជ្យនិយមកាតាឡូញប្រមាណជិត១លាននាក់ កាលពីថ្ងៃទី១១ កញ្ញា បានលើកគ្នាដើរហែរក្បួនតាមមហាវិថីមួយនៃទីក្រុងបាសឺឡោន នាទិវាបុណ្យDIADA ជាបុណ្យជាតិកាតាឡូញ ដែលនោះជាការបង្ហាញពីសមត្ថភាពប្រមូលកម្លាំង ក្រោយបរាជ័យនៃការប៉ុនប៉ងរបស់ពួកគេបំបែកខ្លួនពីអេស្ប៉ាញ និងខណៈដែលមេដឹកនាំ៩នាក់របស់ពួកគេកំពុងជាប់ឃុំឃាំង។
នាវេលាម៉ោង១៧និង១៤នាទីម៉ោងក្នុងស្រុក ដោយរំលឹកការដណ្ដើមយកបាន ក្រុងបាសឺឡោន ថ្ងៃទី១១ កញ្ញា ឆ្នាំ១៧១៤ ដោយកងទ័ពព្រះចៅ FELIPE V ដែលលុបចោលស្វ័យភាពតំបន់ ពួកបាតុករបានលើកគ្រវីទង់ជាតិបំបែកខ្លួននិយម ហើយស្រែកទាមទារឯករាជ្យពេលដើរហែរក្បួនចម្ងាយ៦គីឡូម៉ែត្រតាមបណ្ដោយមហាវិថី DIAGONAL។
មហាបាតុកម្មនោះរៀបចំឡើងដោយបណ្ដាសមាគមឯករាជ្យនិយមមានឥទ្ធិពលទាំងឡាយ ក្នុងគោលបំណងទម្លុះឧបសគ្គ ក្នុងដំណើរឆ្ពោះទៅរករដ្ឋអធិបតេយ្យមួយ។ ហើយប៉ូលិសក្រុងបាសឺឡោនប្រកាសថា ក្នុងបាតុកម្មនោះមានអ្នកចូលរួមដល់ប្រមាណ១លាននាក់ ជាចំនួនដូចកាលពីឆ្នាំទៅមិញដែរ៕
ចែករំលែកព័តមាននេះ