ខេត្តកំពត ៖ ប្រជាពលរដ្ឋជាច្រើនគ្រួសារមកពីភូមិកោះខ្លូត ឃុំកំពង់ត្រាច ក្នុងនោះក៏មានប្រជាពលរដ្ឋមកពីភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត ប្រជាពលរដ្ឋទាំងពីរឃុំនេះមានលំនៅដ្ឋានបឹងឈូកងាយរងគ្រោះដោយទឹកជំនន់បំផុត ។
ពួកគាត់បាននាំគ្នាទៅជួបលោកអភិបាលស្រុកកំពង់ត្រាចកាលពីព្រឹកថ្ងៃទី១២ ខែកញ្ញា នេះដើម្បីអោយលោក អូន ខន អភិបាលស្រុកជួយទប់ស្កាត់កុំអោយប្រជាពលរដ្ឋឈ្មោះ សំ អេន នៅភូមិបឹងធំចាក់ដីលុបប្រឡាយទឹក និងចាក់ដីលុបបឹងឈូក និងសុំអោយលោកអភិបាលស្រុកជួយអន្តរាគមន៍ដល់លោក សំ អេន នៅភូមិបឹងធំ ឃុំអង្គសុភី ស្រុកកំពង់ត្រាច ដកបង្គោលព្រំបោះក្នុងបឹងដោយខ្លួនឯងជាបន្ទាន់ ។
ពលរដ្ឋឈ្មោះ កុង ហ៊ អាយុ៧៤ឆ្នាំ នៅភូមិកោះខ្លូត ឃុំកំពង់ត្រាចខាងកើត បាននិយាយប្រាប់អោយដឹងថា ប្រជាពលរដ្ឋ១០០គ្រួសារបានជំទាស់នឹងឈ្មោះ សំ អេន បានប៉ុនប៉ងម្ដងហើយម្ដងទៀតចាក់ដីលុបបឹងឈូក និងបោះបង្គោលក្នុងបឹង ។
ប្រជាពលរដ្ឋមកទីនេះសុទ្ធតែធ្លាប់ទទួលរងគ្រោះដោយទឹកជំនន់លិចលង់ផ្ទះសម្បែង និងផលដំណាំ ហើយយើងទាំងអស់គ្នាត្រូវតែជួយការពារបឹងធម្មជាតិសម្បត្តិរដ្ឋ បើមិននិយាយអោយថ្នាក់លើដឹងទេ អាចធ្លាក់ដីបឹងនេះទៅលើដៃអ្នកផ្សេងទៀត ។
លោក អូន ខន អភិបាលនៃគណៈអភិបាលស្រុកកំពង់ត្រាចបានប្រាប់អោយដឹងថា កាលពីព្រឹកថ្ងៃទី១២ ខែកញ្ញា នេះគាត់បានជួបជាមួយប្រជាពលរដ្ឋពាក់ព័ន្ធរឿងដីបឹងឈូកត្រូវបានលោក សំ អេន បោះបង្គោលព្រំយកដីបឹង ។ ខាងរដ្ឋបាលស្រុកកំពង់ត្រាចបានធ្វើលិខិតជូនដំណឹងចំនួន២ដងរួចទៅហើយអោយបុគ្គលឈ្មោះ សំ អេន ដកបង្គោលចេញពីបឹងអោយអស់ដោយខ្លួនឯង ។
លោក អូន ខន និយាយប្រាប់បន្តថា សំណុំរឿងដីបឹងឈូកនេះបានទៅដល់សាលាដំបូងរួចហើយចាំតែថ្ងៃអនុវត្តទេ ៕
ចែករំលែកព័តមាននេះ