ខេត្តសៀមរាប ៖ នាថ្ងៃទី១០ ខែកញ្ញា ឆ្នាំ២០១០នេះ ដែលជាថ្ងៃប្រកាសនូវលទ្ធផលប្រលងសញ្ញាបត្រ មធ្យមសិក្សាទុតិយភូមិ ឆ្នាំសិក្សា២០១៧-២០១៨ របស់សិស្សថ្នាក់ទី១២ នៅតាមបណ្តាខេត្តទូទាំង ប្រទេសកម្ពុជា។ ក្រោមការទន្ទឹ្ងង របស់សិស្សានុសិស្ស មានការអន្ទះសា រង់ចាំពិនិត្យមើលអំពីលទ្ធផល ប្រលងរបស់ខ្លួនដោយមួយចំនួនមានការសប្បាយរីករាយ មួយចំនួនទៀត មានការភិតភ័យព្រួយបារម្ភ អំពីលទ្ធផលប្រលងរបស់ខ្លួន។ ក្នុងពិធីប្រកាសបើកលទ្ធផលប្រឡងសញ្ញាបត្រមធ្យមសិក្សាទុតិយភូមិ បានប្រព្រឹត្តទៅក្រោមវត្តមានរបស់លោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប បានអញ្ជើញចូលរួមការបើកកញ្ចប់លទ្ធផលប្រលងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៧-២០១៨ នៅវិទ្យាល័យ១០មករា។
មានប្រសាសន៍នោះលោក បណ្ឌិត ឃឹម ប៊ុនសុង អភិបាលខេត្ត ក៏បានគូសបញ្ជាក់ថា លទ្ធផលនៃការប្រលងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៧-២០១៨នេះ ក៏ជាយុទ្ធសាស្ត្រនៃការកំណែទម្រង់របស់រាជរដ្ឋាភិបាល និងក្រសួងអប់រំយុវជន និងកីឡា លើវិស័យអប់រំសិក្សា ក្នុងពង្រឹងនូវគុណភាពអប់រំ នៃការបណ្តុះបណ្តាលធនធាន មនុស្សឲ្យកាន់តែ មានគុណភាព។ ម្យ៉ាងទៀតក៏ជាការពង្រឹងនូវអង្គការវិន័យដល់លោកគ្រូអ្នកគ្រូ សាស្ត្រាចារ្យ លើ ការបង្ហាត់បង្រៀនដល់សិស្សានុសិស្ស ដើម្បីធានាគុណភាពអប់រំ សាលារៀនចាប់ពីថ្នាក់បឋម វិទ្យាល័យ និងថ្នាក់ឧត្តមសិក្សា ព្រមទាំងឲ្យធ្វើការកែប្រែនូវរាល់ទង្វើដែលមានកន្លងមកចំពោះសិស្សផងដែរ។
លោកបណ្ឌិតក៏បានធ្វើការណែនាំដល់លោកនាយក នាយិកា លោកគ្រូអ្នកគ្រូ និង សាស្ត្រាចារ្យគ្រប់វិទ្យាល័យ ត្រូវបង្កើននូវការយកចិត្តទុកដាក់បង្ហាត់បង្រៀនដល់សិស្សឲ្យបានល្អ ក្នុងការប្រលងប្រណាំងពីវិទ្យាល័យមួយទៅ វិទ្យាល័យមួយ លើគុណភាពការអប់រំ បណ្តុះបណ្តាលសិស្ស ជំនាន់ក្រោយ ឲ្យទទួលបាននូវលទ្ធផលការប្រលងសញ្ញាបត្រមធ្យមសិក្សាទុតិយភូមិ នៅឆ្នាំបន្តបាន ល្អប្រសើរ។ ម្យ៉ាងទៀតយុវសិស្សយើង គឺជាធនធានមនុស្ស នៃសសរស្តម្ភដ៏រឹងមាំ ក្នុងកិច្ចអភិវឌ្ឍន៍ ប្រទេសជាតិ។ លោកបណ្ឌិតក៏បានផ្តាំផ្ញើដល់លោកនាយក នាយិកា លោកគ្រូ អ្នកគ្រូ សាស្ត្រាចារ្យ ត្រូវពង្រឹងនូវអង្គការវិន័យសាលា ដល់សិស្ស និងធ្វើការទប់ស្កាត់នូវ រាល់ការហូរចូលគ្រឿងញៀន នៅតាមសាលា ដែលបង្កឲ្យមានកើតនូវបងតូចបងធំ ព្រមទាំងបង្កឲ្យកើតមាននូវអសន្តិសុខដល់សង្គម ដោយខេត្តសៀមរាបយើង ជាមជ្ឈមណ្ឌលប្រមូលផ្តុំភ្ញៀវទេសចរណ៍ មកពីគ្រប់តំបន់លើពិភពលោក ចូលមកទស្សនាកម្សាន្តហើយសិស្សានុសិស្ស គឺជាធនធានមួយសម្រាប់បម្រើនូវវិស័យទេសចរណ៍ និង អភិវឌ្ឍន៍ប្រទេសទៅពេលអនាគតផងដែរ។
បើតាមការឲ្យដឹងពីលោក សយ ទិត្យាវង្ស ប្រធានមន្ទីរអប់រំយុវជន និងកីឡាខេត្ត បានឲ្យដឹងថា ក្នុងសម័យប្រលងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៧-២០១៨នេះ សម្រាប់មណ្ឌលសៀមរាប មានសិស្សដែលត្រូវប្រលង ចំនួន៧ពាន់៨៣៩នាក់ មាន១២មណ្ឌល ស្មើ៣១៥បន្ទប់ ក្នុងនោះបេក្ខជនមកប្រលងចំនួន ៧.៧៥៣នាក់ អវត្តមានបេក្ខជនមិនចូលមកប្រលងចំនួន៨៦នាក់។ ចំពោះលទ្ធផលប្រលងសញ្ញាបត្រ មធ្យមសិក្សា ទុតិយភូមិ ឆ្នាំសិក្សា២០១៧-២០១៨ នៅមណ្ឌលសៀមរាប មានសិស្សប្រលងជាប់ចំនួន ៥.៩០២នាក់ ស្រី៣.៣៣៧នាក់ ស្មើនឹង៧៦,១៣% ក្នុងនោះស្រី៧៦,៨%។ ក្នុងនោះសិស្សដែលប្រលងបាននិទ្ទេស A ចំនួន២១នាក់ស្រី១៤នាក់ ,និទ្ទេស B ចំនួន៩៥នាក់ ស្រី៤៩នាក់ ,និទ្ទេស Cចំនួន ៣៧៤នាក់ ស្រី២២១នាក់ និទ្ទេស Dចំនួន១.៤២០នាក់ ស្រី៨៥០នាក់ និងនិទ្ទេសE ចំនួន៣.៩៩២នាក់ ស្រី២.២០៣នាក់។
ក្នុងនោះលោកក៏បានបញ្ជាក់ឲ្យដឹងផងដែរថា នៅពេលប្រលងសញ្ញាបត្រមធ្យមសិក្សា ទុតិយភូមិ ឆ្នាំ២០១៧-២០១៨នេះ ក៏មានបេក្ខជនមួយចំនួនបានបោះបង់ការប្រលងរបស់ខ្លួន ដោយពុំទុកចិត្តលើសមត្ថភាពរបស់ខ្លួន ក្នុងការប្រឡងនេះ។ ក្រោមការកំណែទម្រង់វិស័យ អប់រំ បានធ្វើឲ្យគុណភាពនៃការសិក្សារបស់សិស្ស កានតែទទួលបានលទ្ធផលទ្វេឡើង។ ក្នុងឱកាសនោះដែរ ក៏យើងសង្កេតឃើញសិស្ស និងមាតាបិតា អាណាព្យាបាលសិស្សមួយចំនួន បានមានប្រតិកម្មទៅលើ លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៧-២០១៨នេះ ដែលធ្វើឲ្យទាំងគ្រូ និងសិស្សបាក់ទឹកចិត្តចំពោះលើលទ្ធផលវិញ្ញាសារគណិតវិទ្យា ដែលសិស្សសឹងគ្រប់គ្នាទទួលបាននិទ្ទេស F នៅទូទាំងប្រទេស ដែលធ្វើឲ្យសិស្សមិនអាចទទួលយកបាន ព្រមទាំងបានសំណូមពរដល់ក្រសួងអប់រំ សូមធ្វើការពិនិត្យឡើងវិញផងដែរ៕
ចែករំលែកព័តមាននេះ