រាជធានីភ្នំពេញ ៖ បុរសជាសន្តិសុខ២នាក់ ពេលចេញពីធ្វើការជិះម៉ូតូត្រឡប់ទៅផ្ទះវិញ ដោយឆ្លងកាត់ផ្លូវបំបែកជា៤ ក៏ត្រូវរថយន្តជនជាតិចិនមួយគ្រឿងធ្វើដំណើរកាត់ទទឹងផ្លូវបុកចំពាក់កណ្ដាលម៉ូតូ បណ្តាលឱ្យអ្នករួមដំណើរម្នាក់ដួលរងរបួសធ្ងន់ត្រង់ជើងខាងឆ្វេង និងម្នាក់ទៀតជាអ្នកបើកបរម៉ូតូរងរបួសស្រាល។
ហេតុការណ៍នេះដែរបានកើតឡើងកាលពីវេលាម៉ោង១០យប់ថ្ងៃទី៨ ខែកញ្ញា នៅផ្លូវ៤៣០ កែងនឹងផ្លូវ១៨៣ សង្កាត់ទំនប់ទឹកទឹក ខណ្ឌចំការមន។
ប្រភពព័ត៌មានពីអ្នកឃើញហេតុការណ៍នៅកន្លែងកើតហេតុបានប្រាប់អោយដឹងថា មុនកើតហេតុ គឺគេឃើញរថយន្តបង្កម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២V-៦១៨១ បើកបរដោយបុរសជនជាតិម្នាក់ ធ្វើដំណើរតាមផ្លូវ១៨៣ ក្នុងទិសដៅពីលិចទៅកើត លុះមកដល់ផ្លូវបំបែកក៏មានម៉ូតូមួយគ្រឿងមិនស្គាល់ម៉ាក បើកបរដោយបុរសម្នាក់ជាសន្តិសុខក្រុមហ៊ុន SLS និងបុរសជាសន្តិសុខម្នាក់ទៀតជាអ្នករួមដំណើរ ។
ប្រភពដដែលបានបន្តថា ម៉ូតូដែលជិះគ្នា២នាក់នោះបើកបរតាមផ្លូវ៤៣០ ក្នុងទិសដៅពីត្បូងទៅជើង ក្នុងល្បឿនលឿនគួរសម លុះមកដល់ចំណុចកើតហេតុក៏ត្រូវរថយន្តជនជាតិចិនបុកពេញទំហឹងចំពាក់កណ្តាល បណ្តាលឱ្យបុរសជាសន្តិសុខម្នាក់ដែលជាអ្នករួមដំណើរដួលរងរបួសធ្ងន់ត្រង់ជើងខាងឆ្វេង ចំណែកម៉ូតូដួលអូសទៅប៉ះនឹងរថយន្តមួយគ្រឿងទៀតដែលចតស្ងៀមនៅមុខផ្ទះគេ ម៉ាកកាមរីហាយប្រ៊ីដ ពាក់ស្លាកលេខ នគរបាល ពណ៌ទឹកប្រាក់ បណ្តាលឱ្យក្រពឹតកាងមុខផ្នែកខាងស្តាំរងការខូចខាត ចំណែករថយន្តបង្ក និងម៉ូតូរងគ្រោះពុំមានខូចខាតអ្វីទេ។
ភ្លាមៗជនរងគ្រោះត្រូវរថយន្តសង្គ្រោះដឹកយកទៅព្យាបាលរបួសនៅមន្ទីរពេទ្យភ្លាមៗផងដែរ ចំណែកម្ចាស់រថយន្តរងគ្រោះម៉ាកកាមរីហាយប្រ៊ីដ ពាក់ស្លាកលេខនគរបាល មិនចង់វែងឆ្ងាយ ក៏ដកខ្លួនចេញ និងមិនបានទាមទារសំណងអ្វីទេ ទុកអោយភាគីម៉ូតូរងគ្រោះ នឹងរថយន្តបង្កជនជាតិដោះស្រាយគ្នាចុះ។
ក្រោយកើតហេតុក៏មានវត្តមានសមត្ថកិច្ចជំនាញមូលដ្ថាន ចុះមកជួយសម្របសម្រួល ដោះស្រាយគ្នានៅកន្លែងកើតហេតុ ដោយម្ចាស់រថយន្តបង្ក ព្រមចេញថ្លៃព្យាបាលរបួសទៅអោយជនរងគ្រោះដើម្បីបញ្ចប់រឿង ៕
ចែករំលែកព័តមាននេះ