ប្រទេសអេហ្ស៊ីប ៖ តុលាការទីក្រុងគែរមួយបានអះអាងនាថ្ងៃទី៨ កញ្ញា ពីការកាត់ទោសប្រហារជីវិតមនុស្ស៧៥នាក់ ក្នុងនោះមានបណ្ដាមេដឹកនាំក្រុមបងប្អូនអ៊ិស្លាម ក្នុងសវនាការកាត់ទោសយ៉ាងធំបំផុតមួយ ពុំធ្លាប់មានចាប់តាំងពីការបះបោរដ៏កក្រើកមួយនៅអេហ្ស៊ីបពីឆ្នាំ២០១១មក។
សរុបមនុស្សដល់ទៅ៧៣៩នាក់ ត្រូវកាត់ទោសនាថ្ងៃទី៨ កញ្ញានោះ ដោយពួកគេភាគច្រើនទទួលការចោទប្រកាន់ពីបទសម្លាប់ប៉ូលិស ឬបំផ្លិចបំផ្លាញទ្រព្យសម្បិត្តសាធារណៈ កាលពីខែសីហា ឆ្នាំ២០១៣ នាឱកាសនៃការបះបោរនៅក្រុងគែរ។
ក្រោយពីកងទ័ពផ្ដួលរំលំប្រធានាធិបតីលោកម៉ូហា ម៉េដម័រស៊ី ជាសមាជិកក្រុមបងប្អូនអ៊ិស្លាម កាលពីខែកក្កដា ឆ្នាំ២០១៣ ប្រទេសអេហ្ស៊ីប ជួបប្រទះអំពើហិង្សារយៈពេលជាច្រើនខែ ដោយក្នុងអំឡុងពេលនោះកងកម្លាំងសន្តិសុខបានបាញ់សម្លាប់ពួកអ្នកស្និទ្ធលោកម័រស៊ីជាង៧០០នាក់ ហើយកម្ចាត់ពួកគេចេញពីទីលានRABAA AL ADAWIYA និងទីលាន AL NAHDAនៅទីក្រុងគែរ។
នាថ្ងៃទី៨ កញ្ញា តុលាការនៅរក្សាទុកទោសដែលប្រកាសកាលពីថ្ងៃទី២៨ កក្កដា។ ក្នុងចំណោមមនុស្ស៧៥នាក់ដែលទទួលការកាត់ទោសប្រហារជីវិត មានបណ្ដាមេដឹកនាំក្រុមបងប្អូនអ៊ិស្លាមដូចជាលោក MOHAMMED AL BELTAGUI លោក ISSAM AL ARYANE ឬលោក SAFWAT HEGAZI ជាដើម។
មនុស្ស៤៧នាក់ទៀតទទួលការកាត់ទោសដាក់គុកអស់មួយជីវិត ៣៧៤នាក់ជាប់ទោសដាក់គុក១៥ឆ្នាំ មនុស្ស២២នាក់ជាអនីតិជនជាប់ទោសដាក់គុក១០ឆ្នាំ ចំណែកមនុស្ស២១៥នាក់ទទួលទោសជាប់គុក៥ឆ្នាំ។ អ្នកទាំងអស់នេះអាចតវ៉ាទៅសាលាឧទ្ធរណ៍៕
ចែករំលែកព័តមាននេះ