ខេត្តព្រះសីហនុ ៖ មានសេចក្តីរាយការណ៍បានឲ្យដឹងថា នៅថ្ងៃទី៦ កញ្ញា នេះសមត្ថកិច្ចនគរបាលខេត្តព្រះសីហនុ បានធ្វើការឃាត់ខ្លួនជនជាតិចិន២នាក់ ពាក់ព័ន្ធករណីបាញ់គំរាម បណ្តាលឲ្យជនជាតិចិនដូចគ្នា៤នាក់ រងបួសធ្ងន់ធ្ងរ។…
ខេត្តព្រះសីហនុ ៖ មានសេចក្តីរាយការណ៍បានឲ្យដឹងថា នៅថ្ងៃទី៦ កញ្ញា នេះសមត្ថកិច្ចនគរបាលខេត្តព្រះសីហនុ បានធ្វើការឃាត់ខ្លួនជនជាតិចិន២នាក់ ពាក់ព័ន្ធករណីបាញ់គំរាម បណ្តាលឲ្យជនជាតិចិនដូចគ្នា៤នាក់ រងបួសធ្ងន់ធ្ងរ។ ជនសង្ស័យម្នាក់ឈ្មោះ REN HAI JUN ភេទប្រុស អាយុ៤៦ឆ្នាំ ជនជាតិចិន កាន់លិខិតឆ្លងដែនលេខ E០១១១៥៤៣៤ មុខរបរមិនពិតប្រាកដ មានទីលំនៅមិនពិតប្រាកដ និងម្នាក់ទៀតឈ្មោះ WU HAI ZHU ភេទប្រុស អាយុ៣០ឆ្នាំ ជនជាតិចិន កាន់លិខិតឆ្លងដែនលេខ E៩២១១១៩៨៥ មុខរបរ និងស្នាក់មិនពិតប្រាកដ។
គួរបញ្ជាក់ថា កាលពីថ្ងៃទី១៦ កក្កដា ២០១៨ វេលាម៉ោង៧ និង៣០នាទីយប់ នៅភោជនីយដ្ឋានស៊ីហ៊ូ ស្ថិតនៅក្រុម៩ ភូមិ១ សង្កាត់៣ ក្រុង.ខេត្តព្រះសីហនុ មានជនសង្ស័យចំនួន២នាក់ មិនស្គាល់អត្តសញ្ញាណ បានជិះម៉ូតូ១គ្រឿងម៉ាកស្កុបពី ពណ៌ក្រហម ស្លាកលេខប្រើស្កុតបិតពីលើ ហើយពាក់មួកសុវត្ថិភាពពណ៍ខ្មៅ និងពាក់អាវរងារខ្មៅធំដៃវែងទាំងពីរនាក់។ បានទៅធ្វើសកម្មភាពផ្ទុះអាវុធ (បាញ់គំរាម) ទៅលើជនរងគ្រោះជាជនជាតិចិន៤នាក់ ដែលកំពុងអង្គុយហូបអាហារ បណ្តាលឲ្យរបួសជើងទាំង ៤នាក់ រួចខ្មាន់កាំភ្លើងគេចខ្លួនបាត់។ ជនរងគ្រោះ៤នាក់នោះ១.ឈ្មោះ ZHANG KUN ប្រុស អាយុ៣៩ឆ្នាំ ត្រូវចំភ្លៅខាងស្តាំ។ ២.ឈ្មោះ YANG HUAIHUN ភេទប្រុស អាយុ៤១ឆ្នាំ ត្រូវចំក្បាលជង្គង់ខាងស្តាំ។
៣.ឈ្មោះ YANG JUN GING ភេទប្រុស អាយុ២៧ឆ្នាំ ត្រូវចំចុងភ្លៅស្តាំ និងដើមកំភួនជើងខាងឆ្វេង។ និង៤.ឈ្មោះ LIU WEIMIN ភេទប្រុស អាយុ៣៣ឆ្នាំ ត្រូវចំភ្លៅខាងស្តាំ។ ជនរងគ្រោះជាជនជាតិចិនទាំង៤នាក់ ស្នាក់នៅសណ្ឋាគារ វិមានខ្សាច់មាស ចូលមកទេសចរណ៍ កាលពីថ្ងៃទី១៤ សីហា ២០១៨ ពួកគេត្រូវបានបញ្ជូនទៅព្យាបាល នៅគ្លីនិក សេតេ ប៉ុន្តែពេលនេះបានត្រឡប់ទៅប្រទេសចិនវិញហើយ។ វត្ថុតាងបន្សល់នៅកន្លែនកើតហេតុ សម្បកគ្រាប់ចំនួន៩ និងគ្រាប់មិនទាន់ផ្ទុះ១គ្រាប់។ ក្រោយហេតុការណ៍នេះបានឡើងស្នងការដ្ឋាននគរបាល ខេត្តព្រះសីហនុ បានបង្កើតគណៈកម្មការមួយ ដើម្បីបើកការស៊ើបអង្កេត និងស្រាវជ្រាវលើបទល្មើសនោះជាបន្ទាន់ ដោយមានការចង្អុលដឹកនាំផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត។
បន្ទាប់ពីគណៈកម្មការ បានចុះធ្វើការស្រាវជ្រាវកម្លាំងជំនាញ ផែននគរបាលព្រហ្មទណ្ឌ ដែលបានយកចិត្តទុកដាក់យ៉ាងខ្ពស់ រហូតឈានទៅដល់ការបង្ក្រាប និងឃាត់ខ្លួនជនសង្ស័យ២នាក់ នៅថ្ងៃទី៥ កញ្ញា ដូចមានឈ្មោះខាងលើនេះ។ ក្រោយពេលឃាត់ខ្លួនជនសង្ស័យ បានសារភាពពីការលាក់កាំភ្លើងខ្លី២ដើម ១ដើមម៉ាក BERETA លេខG643652 បង់១ និងគ្រាប់២គ្រាប់។ ២.កាំភ្លើងម៉ាក GIOCK19 លេខ WBEN763 បង់១ គ្រាប់៣គ្រាប់។ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានមានប្រសាសន៍ថា តាមចម្លើយសារភាពរបស់ជនសង្ស័យទាំង២នាក់ ពួកគេពិតជាបានធ្វើសកម្មភាពដោយប្រើកាំភ្លើងខ្លី២ដើម បាញ់ទៅលើជនរងគ្រោះពិតប្រាកដមែន។
ចម្លើយបន្តថា បានជាពួកគេទៅបាញ់ជនរងគ្រោះ ព្រោះតែខឹងរឿងនិយាយប្រមាថមើលងាយពួកគេថា ជាមនុស្សដើរមិនត្រង់ផ្លូវដើរវៀចៗ បែបនេះ មិនមែនជាមនុស្សល្អត្រឹមត្រូវទេ។ ខណៈពេលដែលពួកគេបានទៅផឹកស៊ីនៅក្នុងក្លឹបមួយកន្លែងតាមផ្លូវឧតុនិយម កាលពីថ្ងៃទី១៥ កក្កដា ២០១៨ ទើបនៅថ្ងៃកើតហេតុពួកគេបានតាមបាញ់ទៅលើជនរងគ្រោះតែម្តងទៅ។ ចំពោះកាំភ្លើងរូបគេបានទិញពីជនមិនស្គាល់មុខ ក្នុង១ដើមតម្លៃ៣,៨០០ដុល្លារអាមេរិក ហើយពេលធ្វើសកម្មភាពរួច ពួកគេបានយកទៅកប់នៅក្នុងដីមួយកន្លែង ដែលស្ថិតនៅក្រុម២២ ភូមិ៣ សង្កាត់៣ ក្រុង.ព្រះសីហនុ។ ជនសង្ស័យត្រូវបានសមត្ថកិច្ចកំពុងធ្វើការសាកសួរ ដើម្បីកសាងសំណុំរឿងតាមនីតិវិធី៕
ចែករំលែកព័តមាននេះ