អង់គ្លេស ៖ តាមប្រភពព័ត៌មាន Metro បានឲ្យដឹងថា ក្មេងប្រុសម្នាក់មើលឃើញដុំខ្មៅបាំងគំហើញរបស់ខ្លួន (ក្បែរនឹងខ្វាក់) ក្រោយសម្លឹងពន្លឺឡាស៊ែរចេញពីប៊ិច ត្រឹមតែ២វិនាទី។
រឿងហេតុនេះកើតឡើងនៅក្នុងតំបន់ Essex ចក្រភពអង់គ្លេស។ ម្តាយរបស់ក្មេងឈ្មោះ Emma Carson អាយុ៣៩ឆ្នាំ មានការភ្ញាក់ផ្អើលយ៉ាងខ្លាំង ពេលកូនរបស់ខ្លួនឈ្មោះ Archie Mapson អាយុ៩ឆ្នាំ មានកំហូចទៅលើគំហើញ ដោយសារតែប៊ិចឡាស៊ែរពណ៌បៃតង។
Archie មិនអាចអានបាន មើលមុខមនុស្ស និងលេងបានទេ ដោយសារតែគេមើលឃើញដុំខ្មៅមួយដុំធំបាំងគំហើញជិត។ សូម្បីតែគ្រូពេទ្យក៏ថា បញ្ហានេះប្រហែលជាមិនអាចជាដូចដើមដែរ។
Carson បានទិញប៊ិចនេះឲ្យកូនរបស់នាងលេងកាលពីប៉ុន្មានឆ្នាំមុន ពីកន្លែងលក់ប្រដាប់ប្រដាក្មេងលេងនៅ Basildon។ នាងតែងតែប្រាប់កូននាងរហូតថា កុំឲ្យដាក់ពន្លឺនោះបាញ់ចំភ្នែក។ ស្រាប់តែនៅថ្ងៃទី១៨ ខែសីហា Archie ក៏ប្រាប់នាងជាម្តាយថា មើលឃើញដុំខ្មៅមួយ។ នាងស្មានតែមានជំងឺអាឡែកហ្ស៊ី ហើយក៏ឲ្យថ្នាំលេប។ តែវាមិនបាត់នោះទេ។ ដល់ពេលទៅពេទ្យភ្នែកទើបដឹងថា វាជាបញ្ហាធំ។
ពន្លឺឡាស៊ែរនោះបានធ្វើឲ្យខ្លោចនៅផ្នែកខាងក្រោយរបស់ភ្នែកខាងស្តាំ និងខូចដល់បាតភ្នែកស្រទាប់រេទីននៅភ្នែកខាងឆ្វេង។ វាពិតជាធ្ងន់ធ្ងរមែនទែន ហើយអាចនឹងមិនជាដូចដើមឡើយ ។ សូមប្រុងប្រយ័ត្នទាំងអស់គ្នា…!
ចែករំលែកព័តមាននេះ