ប្រទេសលីប៊ី ៖ ប្រភពព័ត៌មានសន្តិសុខបានរាយការណ៍ឱ្យដឹងថា ទីតាំងស្ថានទូតអាមេរិកប្រចាំក្រុងទ្រីប៉ូលី រដ្ឋធានីលីប៊ី រងគ្រាប់ផ្លោងកាលពីថ្ងៃទី៤ កញ្ញា ខណៈការប្រយុទ្ធគ្នានៅបន្តក្នុងទីក្រុងនេះរវាងកងទ័ពរដ្ឋាភិបាល និងពួកជីវពល។
ប្រភពមួយរបស់ក្រសួងមហាផ្ទៃលីប៊ីនិយាយថា គេពុំដឹងពីចំនួនគ្រាប់ផ្លោងវាយប្រហារលើអគារស្ថានទូតអាមេរិកប្រចាំក្រុងទ្រីប៉ូលីឡើយ។ ហើយការខូចខាតដោយសារភ្លើងឆេះមកពីគ្រាប់ផ្លោងទាំងនេះក៏ ពុំដឹងច្បាស់ដែរ។ ចំណែកពួកអ្នកពន្លត់ភ្លើងពុំអាចចូលទៅដល់អគារនោះ ព្រោះវាស្ថិតនៅក្នុងព្រលានយន្តហោះអន្តរជាតិក្រុងទ្រីប៉ូលី ជាយក្រុងភាគខាងត្បូង កន្លែងដែលការប្រយុទ្ធគ្នាផ្ទុះឡើងជាថ្មី។ អគារស្ថានទូតនោះបច្ចុប្បន្នពុំមានមនុស្សនៅឡើយ។
ភាគខាងត្បូងក្រុងទ្រីប៉ូលី ជាទីលាននៃការប៉ះទង្គិចគ្នាយ៉ាងខ្លាំងក្លា ចាប់តាំងពីសប្ដាហ៍មុនមករវាងកងទ័ពរដ្ឋាភិបាល និងពួកជីវពលប្រដាប់អាវុធ បណ្ដាលឲ្យមានជនរងគ្រោះច្រើននាក់។ គេពុំដឹងច្បាស់ពីមូលហេតុនៃការប៉ះទង្គិចគ្នាទាំងនោះឡើយ ក្រោយភាពតានតឹងខ្លាំង និងការប្រឈមមុខដាក់គ្នារវាងបណ្ដាក្រុមប្រដាប់អាវុធក្នុងក្រុង និងក្រៅក្រុង ចាប់តាំងពីប៉ុន្មានថ្ងៃមកហើយ៕
ចែករំលែកព័តមាននេះ