ទីក្រុងឡុងដ៍ ៖ តម្លៃប្រេងបានកើនឡើងកាលពីថ្ងៃចន្ទព្រោះតែការព្រួយបារម្ភលើការធ្លាក់ចុះនៃទិន្នផលប្រេងរបស់អុីរ៉ង់ដែលអាចនឹងធ្វើឲ្យទីផ្សារកាន់តែតូចចង្អៀតពេលដែលការដាក់ទណ្ឌកម្មរបស់សហរដ្ឋអាមេរិកមានប្រសិទ្ធភាពចាប់ពីខែវិច្ឆិកាទៅ ប៉ុន្តែកំណើននេះនៅមានកម្រិត ព្រោះតែមានកំណើននៃការផ្គត់ផ្គង់ប្រេងពីOPECនិងសហរដ្ឋអាមេរិក ។
តម្លៃប្រេងឆៅរបស់Brent បានកើនឡើង ៦០សេនមកស្មើ៧៨,២៤ដុល្លារក្នុងមួយធុង ខណៈតម្លៃប្រេងអាមេរិកបានកើនឡើង១៥សេនមកស្មើ ៦៩,៩៥ដុល្លារក្នុងមួយធុង។ តម្លៃប្រេង Brent បានកើនឡើងច្រើនជាង១០%ទៅទៀតកាលពីពីរសប្តាហ៍មកនេះ ។
ជាមួយគ្នានេះផងដែរ ការដាក់ទណ្ឌកម្មរបស់សហរដ្ឋអាមេរិកកំពុងតែចាប់ផ្តើមប៉ះពាល់ដល់ការនាំចេញរបស់អ៊ីរ៉ង់ហើយ ។
លោក Stephen Brennock អ្នកវិភាគមកពី PVM Oil Associates បាននិយាយថា ៖«ការនាំចេញពីប្រទេសផលិតប្រេងធំជាងគេលេខបីរបស់OPECនេះ កំពុងតែធ្លាក់ចុះលឿនជាងការគិតទុក ហើយនឹងកាន់តែធ្លាក់ចុះខ្លាំងទៅទៀតក្នុងអំឡុងពេលដែលខិតជិតដំណាក់កាលទីពីរនៃទណ្ឌកម្មអាមេរិក »។
លោក Edward Bell អ្នកវិភាគមកពីធនាគារ Emirates NVD បានឲ្យដឹងផងដែរថា ៖«ផលិតកម្មក្នុងប្រទេសអ៊ីរ៉ង់បានចាប់ផ្តើមអន់ថយហើយ ដោយធ្លាក់ចុះអស់១៥ម៉ឺនធុងក្នុងមួយថ្ងៃកាលពីខែមុន ព្រោះអ្នកនាំចូលប្រេងអុីរ៉ង់កំពុងតែងាកចេញពីការទិញ »។
ប៉ុន្តែទីផ្សារប្រេងនៅមានការផ្គត់ផ្គង់ខ្ពស់នៅឡើយ ខណៈផលិតកម្មប្រេងក្នុងចំណោមប្រទេសក្នុងអង្គការនៃប្រទេសនាំចេញប្រេង (OPEC) បានកើនឡើង២២ម៉ឺនធុងក្នុងមួយថ្ងៃកាលពីខែសីហាមកដល់៣២,៧៩លានធុងក្នុងមួយថ្ងៃ ។
ជាមួយគ្នានេះដែរ ជម្លោះពាណិជ្ជកម្មរវាងសហរដ្ឋអាមេរិក និងសេដ្ឋកិច្ចធំៗដូចជាប្រទេសចិន និងសហភាពអឺរ៉ុប ត្រូវបានគិតថានឹងប៉ះពាល់ដល់តម្រូវការប្រេង ប្រសិនបើមិនអាចដោះស្រាយក្នុងពេលឆាប់ៗ ៕
ចែករំលែកព័តមាននេះ