រាជធានីភ្នំពេញ ៖ ក្រសួងមហាផ្ទៃ បានធ្វើការបដិសេធថា ក្រសួងពុំបានសិក្សាបង្កើតខេត្តថ្មី ដល់ទៅ៧បន្ថែមទៀតដូចពាក្យចចាមអារ៉ាម និងព័ត៌មានដែលបានចែកចាយ ព្រមទាំងផ្សាយបន្តគ្នា តាមបណ្ដាញសង្គមនោះទេ។ លោក ប្រាក់ សំអឿន អគ្គនាយកដ្ឋានរដ្ឋបាលនៃក្រសួងមហាផ្ទៃ បានឲ្យដឹងនារសៀលថ្ងៃទី៤ ខែកញ្ញានេះថា ព័ត៌មានដែលថា មានបង្កើតខេត្តថ្មីដល់ទៅ៧បន្ថែមទៀតនោះ ជាព័ត៌មានមិនពិត ជាព័ត៌មានបំប៉ោងធ្វើឲ្យសាធារណៈជនទូទៅមានការយល់ច្រឡំមកលើ រាជរដ្ឋាភិបាល។
ក្នុងនាមជាអ្នកបច្ចេកទេស លោកសូមធ្វើការបដិសេធនូវរាល់ព័ត៌មានទាំងអស់នោះ ព្រោះ វាជាព័ត៌មានដែលធ្វើឲ្យមានការច្របូកច្របល់ដល់សាធារណជន និងធ្វើឲ្យមានការវាយប្រហារ ទៅលើរាជរដ្ឋាភិបាល។ លោក ប្រាក់ សំអឿន បានបញ្ជាក់ថា ក្រសួងមហាផ្ទៃ បានស្នើសុំគោលការណ៍ អនុញ្ញាតពីសម្តេចនាយករដ្ឋមន្ត្រី ហ៊ុន សែន ក្នុងការសិក្សាលទ្ធភាពបង្កើតខេត្តចំនួនពីរប៉ុណ្ណោះ។
សូមបញ្ជាក់ថា កាលពីថ្ងៃទី២៨ ខែសីហា ឆ្នាំ២០១៨ សម្ដេចនាយករដ្ឋមន្ត្រី ហ៊ុន សែន បានចារ យល់ព្រម តាមសំណើររបស់ក្រសួងមហាផ្ទៃដែលបានស្នើសិក្សាលទ្ធភាពបង្កើតខេត្តថ្មីចំនួន២ ដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាលការថែរក្សាសន្ដិសុខ សណ្ដាប់ធ្នាប់ សាធារណៈ ការជំរុញអភិវឌ្ឍនៅមូលដ្ឋាន និងការផ្ដល់សេវាសាធារណៈជូនប្រជាពលរដ្ឋ។ ខេត្តថ្មីដែលត្រូវស្នើសុំនោះ ទីមួយគឺបំបែកចេញពីខេត្តកណ្ដាល ចំណែកខេត្តថ្មីទីពីរ គឺដោយពិនិត្យលើកត្ដាភូមិសាស្ត្រ និងប្រជាសាស្ដ្រ របស់ស្រុកកោះញែកនៃខេត្តមណ្ឌលគិរី និងស្រុកលំផាត់នៃខេត្តរតនគិរី៕
ចែករំលែកព័តមាននេះ