ទីក្រុងប៉េកាំង ៖ មន្ត្រី និងអ្នកដឹកនាំអាជីវកម្មបានឲ្យដឹងថា ការវិនិយោគដែលជាប់ទាក់ទិននឹងវិស័យសេវាកម្មដូចជាវិស័យទេសចរណ៍ ការអប់រំ និងសុខាភិបាល នឹងទទួលបានអាទិភាពខ្ពស់ និងជួយពង្រឹងទំនាក់ទំនងអាជីវកម្មរវាងប្រទេសចិន និងអាហ្វ្រិកក្នុងរយៈពេលវែង ។
លោក Yu Jianlong អគ្គលេខាធិកាសភាពាណិជ្ជកម្មអន្តរជាតិរបស់ប្រទេសចិនបាននិយាយថា ៖« ការវិនិយោគផ្ទាល់ទៅក្រៅប្រទេសរបស់ប្រទេសចិន នឹងមិនផ្តោតតែលើហេដ្ឋារចនាសម្ព័ន្ធ ថាមពល ផ្នែកផលិត និងកសិកម្មទេ ។ ក្រុមហ៊ុនចិនបានចាប់ផ្តើមផ្តល់ធនធាន និងកម្លាំងច្រើនជាងមុនក្នុងវិស័យសេវាកម្មរបស់អាហ្វ្រិក ព្រោះសេដ្ឋកិច្ចរបស់ពួកគេចាប់ផ្តើមានភាពចម្រុះ »។
យោងតាមសភាខាងលើបានឲ្យដឹងទៀត ថា មានក្រុមហ៊ុនច្រើនជាង៣.៣០០ក្រុមហ៊ុនបានវិនិយោគក្នុងអាហ្វ្រិកលើវិស័យដឹកជញ្ជូន ថាមពល ទូរគមនាគមន៍ តំបន់ឧស្សាហកម្ម កសិកម្ម ការផ្គត់ផ្គង់ទឹក ការលក់រាយ សាលារៀន ការជួសជុលរថយន្ត និងអាជីវកម្មជួយម៉ាស៊ីនសាងសង់ សណ្ឋាគារ និងមន្ទីរពេទ្យ ជាដើម ។
ជាមួយគ្នានេះលោក Liu Fuxue នាយកទូទៅនៅការិយាល័យតាំងពិព័រណ៍ការនាំចូលអន្តរជាតិរបស់ប្រទេសចិន បាននិយាយថា ការតាំងពិព៍រណ៍ការនាំចូលអន្តរជាតិរបស់ប្រទេសចិនលើកទីមួយ នឹងត្រូវបានប្រារព្ធនៅសៀងហៃនាខែវិច្ឆិកាខាងមុខ ដែលនឹងផ្តល់ឱកាសក្នុងការទាក់ទាញចំណាប់អារម្មណ៍របស់វិនិយោគិនចិនសម្រាប់អាជីវកម្មផ្តល់សេវាកម្មរបស់អាហ្វ្រិកទៀតផង ។
ភ្នាក់ងាររដ្ឋាភិបាលចំនួន៨ និងក្រុមហ៊ុនឯកជនចំនួន១១០មកពីប្រទេសអាហ្វ្រិកចំនួន៣៤ ប្រទេសបានបញ្ជាក់ថា ពួកគេនឹងចូលរួមការតាំងពិព័រណ៍ដែលនឹងប្រារព្ធឡើងចាប់ពីថ្ងៃទី៥ដល់ថ្ងៃទី១០ខែវិច្ឆិកា ឆ្នាំ២០១៨នេះ ៕
ចែករំលែកព័តមាននេះ