រាជធានីភ្នំពេញ ៖ បុរសម្នាក់ជិះម៉ូតូលឿនពេករេចង្កូតទៅបុករបាំងថ្មពុះចែកទ្រូងផ្លូវបណ្តាលអោយដួលបោកក្បាលស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង១១និង១៥នាទីយប់ថ្ងៃទី៣ ខែកញ្ញា ឆ្នាំ២០១៨ តាមបណ្តោយផ្លូវ៥៩៨ នៅចំណុចក្បែរនឹងម្តុំស្នងការរាជធានីភ្នំពេញ ស្ថិតនៅក្នុងសង្កាត់ច្រាំងចំរេះ២ ខណ្ឌឬស្សីកែវ…
រាជធានីភ្នំពេញ ៖ បុរសម្នាក់ជិះម៉ូតូលឿនពេករេចង្កូតទៅបុករបាំងថ្មពុះចែកទ្រូងផ្លូវបណ្តាលអោយដួលបោកក្បាលស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង១១និង១៥នាទីយប់ថ្ងៃទី៣ ខែកញ្ញា ឆ្នាំ២០១៨ តាមបណ្តោយផ្លូវ៥៩៨ នៅចំណុចក្បែរនឹងម្តុំស្នងការរាជធានីភ្នំពេញ ស្ថិតនៅក្នុងសង្កាត់ច្រាំងចំរេះ២ ខណ្ឌឬស្សីកែវ ។
ជនរងគ្រោះដែលស្លាប់ខាងលើឈ្មោះសេង ខេមរិន ភេទប្រុស អាយុ៣០ឆ្នាំ មុខរបររត់កង់បី សង្កាត់ច្រាំងចំរេះ២ ខណ្ឌឬស្សីកែវ មានស្រុកកំណើតនៅស្រុកបាត់ដំបង ខេត្តបាត់ដំបង មានកូន៤នាក់ (ប្រុសម្នាក់ និងស្រី៣នាក់) ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញជនរង គ្រោះជិះម៉ូតូមួយគ្រឿង ម៉ាកភីស៊ីអិច ពណ៌ស ពាក់ស្លាកលេខ ភ្នំពេញ ១GI-០៤២៣ បើកបរតាមបណ្តោយផ្លូវ៥៩៨ ក្នុងទិសដៅពីត្បូងទៅជើង លុះពេលបើកមកដល់ចំណុចកើតហេតុខាងលើនេះ ដោយសារតែជនរងគ្រោះបើក
បរក្នុងល្បឿនលឿនពេកមិនបានប្រយ័ត្នក៏រេចង្កូតទៅបុករបាំងថ្មពុះចែកទ្រូងផ្លូវរួចខ្ទាតជនរងគ្រោះទៅបោកនៅនឹងថ្នល់ បណ្តាលអោយបែកក្បាលស្លាប់ភ្លាមៗនៅនឹងកន្លែងកើតហេតុ ចំណែកឯម៉ូតូម៉ាកភីស៊ីអិចបានរងការខូចខាតតិចតួច ។
តាមសម្តីរបស់ម្តាយជនរងគ្រោះបានប្រាប់សមត្ថកិច្ចថា កូនរបស់គាត់មិនមានម៉ូតូជិះទេ គឺខ្ចីម៉ូតូមិត្តភក្តិយកមកជិះតែប៉ុណ្ណោះ ហើយមិនដឹងថាជាយ៉ាងមិចបានជាជិះទៅបុកទ្រូងផ្លូវ បណ្តាលអោយស្លាប់ខ្លួនឯងបែបនេះទេ ។
ក្រោយពេលកើតហេតុ សពរបស់ជនរងគ្រោះត្រូវបានសាច់ញាតិយកទៅតម្កល់នៅវត្តទឹកថ្លា រីឯម៉ូតូវិញត្រូវបានម្តាយជនរងគ្រោះយកទៅប្រគល់ទៅអោយម្ចាស់គេវិញផងដែរ ៕
ចែករំលែកព័តមាននេះ