រាជធានីភ្នំពេញ៖ មន្ត្រីរដ្ឋបាលរាជធានីភ្នំពេញ បានអះអាងថា សុខុមាលភាពប្រជាពលរដ្ឋផ្លូវ ទឹក ភ្លើង ជាបញ្ហាដែលអាជ្ញាធររាជធានីភ្នំពេញបាននឹងកំពុងយកចិត្តទុកដាក់ជាចំបង ដោយវាជាការចង់បានរបស់បងប្អូនប្រជាពលរដ្ឋរាល់ថ្ងៃមិនអាចខ្វះបាន។
ជាក់ស្តែងនៅព្រឹកថ្ងៃទី១ កញ្ញា២០១៨នេះ លោកឃួង ស្រេង អភិបាលរាជធានីភ្នំពេញបានដឹកនាំអាជ្ញាធរ និងមន្ត្រីជំនាញចុះពិនិត្យមើលស្ថានភាព ផ្លូវលេខ ១២៣CC ស្ថិតនៅក្នុងភូមិថ្មគោលទី២សង្កាត់ចោមចៅទី២ ខណ្ឌពោធិសែនជ័យ ខណៈដែលផ្លូវមួយខ្សែនេះបានទទូលរងការខូចខាត ពិបាកក្នុងការធ្វើដំណើររបស់បងប្អូនប្រជាពលរដ្ឋ ដែលកំណាត់ផ្លូវនេះត្រូវស្ថាបនាថ្មីឡើងវិញ ជាប្រភេទផ្លូវបេតុងមានប្រវែង៩៧០ម៉ែត្រនិង ទទឹងប្រវែង ៦ម៉ែត្រ និងដាក់បណ្តាញលូផងដែរ ។
ក្រោយពីបញ្ចប់ការពិនិត្យមើលស្ថានភាពផ្លូវរួច លោកឃួង ស្រេង ក៏បានបន្តដំណើរចុះសួរសុខ ទុក្ខនិងពិនិត្យមើលការចាត់ចែងការដឹកទឹកម៉ាស៊ីនចែកចាយជូនប្រជាពលរដ្ឋនៅភូមិទួលកី សង្កាត់ភ្លើងឆេះរទេះខណ្ឌពោធិសែន ជ័យបន្តទៀត ។
ក្នុងឱកាសនោះ លោកឃួង ស្រេង បានបញ្ជាក់ថា ការចុះមកសួរសុខ ទុក្ខនិងពិនិត្យមើលការចាត់ចែងការដឹកទឹកម៉ាស៊ីនចែកចាយជូនប្រជាពលរដ្ឋនេះ គឺលោកចង់ដឹងនិងមើលអោយឃើញពីស្ថានភាពការរស់នៅ ការខ្វះខាតនិងការចង់បានរបស់បងប្អូនប្រជាពលរដ្ឋ ។
ជាក់ស្តែង នៅភូមិទួលកី សង្កាត់ភ្លើងឆេះរទេះ ខណ្ឌពោធិសែន ជ័យ ប្រជាពលរដ្ឋនៅក្នុងភូមិនេះបាននិងកំពុងមានបញ្ហាប្រឈមនឹងការអត់ទឹកម៉ាស៊ីនប្រើប្រាស់ ទើបរដ្ឋបាលរាជធានីភ្នំពេញ បង្កើតអោយមានរថយន្តដឹកទឹកជូនប្រជាពលរដ្ឋដល់តាមខ្នងផ្ទះតែម្តង ជាមួយនឹងតំលៃរដ្ឋ ។ ក្នុងឱកាសនោះដែរ លោកឃួង ស្រេងក៏បានជម្រុញអោយអាជ្ញាធរខណ្ឌពោធិសែន ជ័យ ពិសេសមន្ត្រីដែលអនុវត្តលើការងារនេះបន្ថែមជើងរថយន្តក្នុងការដឹកទឹកចែកចាយជូនប្រជាពលរដ្ឋ ។
លោកឃួង ស្រេង ក៏បានបញ្ជាក់ថា នៅរដូវប្រាំងខាងមុខនេះ អាជ្ញាធរ និងបន្ថែមរថយន្តដឹកទឹកនេះបន្ថែមទៀត ពោលគឺទាំង៨ភូមិដែលមិនមានទឹកម៉ាស៊ីនប្រើប្រាស់ អាច១ភូមិមានរថយន្តដឹកទឹក១គ្រឿង ដើម្បីដឹកទឹកចែកចាយអោយទាន់ចិត្តប្រជាពលរដ្ឋ៕
ចែករំលែកព័តមាននេះ