ទីក្រុងវ៉ាស៊ីនតោន ៖ អ្នកចរចាពាណិជ្ជកម្មរបស់ម៉ិកស៊ិកបាននិយាយកាលពីថ្ងៃសៅរ៍មកថា សហរដ្ឋអាមេរិកបានបន្ថយលក្ខខណ្ឌសម្រាប់កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ដែលអាចបំបាត់ឧបសគ្គដ៏ធំមួយក្នុងការសម្រេចកិច្ចព្រមព្រៀងនៅសប្តាហ៍ក្រោយ ។
លោក Jesus Seade ប្រធានអ្នកចរចាប្រចាំរដ្ឋាភិបាលថ្មីរបស់ប្រទេសម៉ិកស៊ិកបានប្រាប់ដល់សារព័ត៌មានថា គោលជំហរថ្មីរបស់សហរដ្ឋអាមេរិក នឹងអនុញ្ញាតឲ្យមានការត្រួតពិនិត្យលើកិច្ចព្រមព្រៀងនេះម្តងហើយម្តងទៀត ប៉ុន្តែមិនមានកាលបរិច្ឆេទកំណត់ស្វ័យប្រវត្តិទេ លុះត្រាតែវាត្រូវបានចរចាឡើងវិញរាល់៥ឆ្នាំម្តង ។
គួរបញ្ជាក់ថា សហរដ្ឋអាមេរិកនិងប្រទេសម៉ិកស៊ិក មានការចរចាទ្វេភាគីដើម្បីដោះស្រាយភាពខ្វែងគំនិតគ្នាលើកិច្ចព្រមព្រៀងNAFTA មុននឹងហៅប្រទេសកាណាដាចូលមកការចរចាវិញ ខណៈដែលពួកគេជំរុញនឹងសម្រេចឲ្យបានកិច្ចព្រមព្រៀងក្រៅផ្លូវការមួយនៅចុងខែសីហាខាងមុខនេះ ។
ប្រធានាធិបតីអាមេរិក លោកដូណាល់ ត្រាំ (Donald Trump) បាននិយាយលើTwitter របស់លោកកាលពីព្រឹកថ្ងៃសៅរ៍មកថា ៖« ទំនាក់ទំនងជាមួយនឹងប្រទេសម៉ិកស៊ិកកាន់តែជិតស្និតឡើង ។ មនុស្សល្អៗមួយចំនួនក្នុងរដ្ឋាភិបាលថ្មីនិងចាស់ កំពុងតែសហការយ៉ាងជិតដិតជាមួយគ្នា ។ កិច្ចព្រមព្រៀងពាណិជ្ជកម្មដ៏ធំមួយជាមួយនឹងម៉ិកស៊ិក អាចនឹងកើតមានឡើងក្នុងពេលឆាប់ៗនេះ »។
រដ្ឋាភិបាលលោកប្រធានាធិបតីត្រាំ បានទាមទារឲ្យមានការចរចាលើកិច្ចព្រមព្រៀង NAFTAជារៀងរាល់៥ឆ្នាំម្តង ប្រសិនបើលក្ខខណ្ឌថ្មីមិនអាចជំរុញឲ្យមានការធ្វើពាណិជ្ជកម្មដែលមានលំនឹងរវាងប្រទេសទាំង៣ ហើយ កិច្ចព្រមព្រៀង NAFTA នឹងត្រូវបានរំលាយប្រសិនបើភាគីទាំងអស់មិនអាចព្រមព្រៀងលើលក្ខខណ្ឌថ្មីបាន ។
ប៉ុន្តែប្រទេសម៉ិកស៊ិក កាណាដា និងអាជីវករក្នុងប្រទេសទាំងបីបានប្រឆាំងនឹងគោលគំនិតនេះ និងបានអះអាងថា វានឹងបង្កឲ្យមានភាពមិនប្រាកដប្រជាលើអនាគត NAFTA ដែលនឹងប៉ះពា់ដល់ការវិនិយោគ និងការបង្កើតការងារថ្មីៗ ៕
ចែករំលែកព័តមាននេះ