ជប៉ុនគ្រោងវិនិយោគលើវិស័យទឹកស្អាតនៅកម្ពុជា

ថ្ងៃទី ២៥ ខែ សីហា ឆ្នាំ ២០១៨
ម៉ោង ០៨:០០
គង់ ម៉ាលីន

រាជធានីភ្នំពេញ ៖ ក្រុមហ៊ុនសាជីវកម្មMarubeni បានបង្ហាញពីបំណងចង់វិនិយោគលើវិស័យទឹកស្អាតនៅកម្ពុជា បន្ទាប់ពីក្រុមហ៊ុននេះបានសិក្សាលទ្ធភាព និងមើលឃើញពីសក្តានុពលក្នុងវិស័យនេះ ។

ក្នុងជំនួបជាមួយលោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម កាលពីថ្ងៃទី២០ សីហា កន្លងមក លោក Kaoru Iwasa នាយកប្រតិបត្តិនៃក្រុមហ៊ុនសាជីវកម្ម Marubeni ប្រចាំតំបន់អាស៊ាន និងអាស៊ីបូព៌៌ា បានឲ្យដឹងថា ក្រុមហ៊ុនMarubeni បានវិនិយោគលើអាជីវកម្មជាច្រើនដូចជា វិស័យពាណិជ្ជកម្ម ឧស្សាហកម្ម ដឹកជញ្ជូន ធនធានរ៉ែ និងថាមពលជាដើម ។

លោកបន្ដថា ៖« បច្ចុប្បន្នក្រុមហ៊ុនមានសាខាចំនួន១៣១ និងការិយាល័យនៅ៦៦ប្រទេសលើពិភពលោក មានបុគ្គលិកធ្វើការប្រមាណ៤ម៉ឺននាក់ និងមានចំណូលប្រចាំឆ្នាំ២០១៧ប្រមាណ១.៩២១លានដុល្លារអាមេរិក»។ លោកបន្ថែមថា ៖« ក្រុមហ៊ុនមានជំនាញខ្ពស់លើវិស័យទឹកស្អាត និងបានធ្វើប្រតិបត្តិការជាច្រើនប្រទេសលើពិភពលោក ហេតុនេះទើបក្រុមហ៊ុនមានបំណងពិនិត្យលទ្ធភាពវិនិយោគវិស័យនេះនៅកម្ពុជា »។
ក្រុមហ៊ុននេះមានគោលបំណងសិក្សាលទ្ធភាពវិនិយោគលើវិស័យទឹកស្អាត តាមរយៈការទិញភាគហ៊ុន ឬកម្មវិធីដៃគូរវាងរដ្ឋ និងឯកជន គឺមានលទ្ធភាពតិចតួច ដែលកើតមានឡើងនៅកម្ពុជា។

រដ្ឋមន្ត្រីក្រសួងឧស្សាហកម្ម និងសិប្បកម្មបានស្វាគមន៍គម្រោងវិនិយោគនេះ ដោយលោកបានថ្លែងថា ៖« ក្រសួងឧស្សាហកម្ម និងសិប្បកម្ម នឹងឈានទៅមុខមួយជំហានទៀត គឺមិនត្រឹមផ្តោតការផ្គត់ផ្គង់ទឹកស្អាតត្រឹមតំបន់ទីប្រជុំជនប៉ុណ្ណោះទេ ក្រសួងនឹងឈានបន្តិចម្តងៗរហូតដល់តំបន់ទីប្រជុំជនតូចៗ និងជនបទ ដើម្បីឲ្យប្រជាពលរដ្ឋទទួលបានសេវាទឹកស្អាតចេញពីបំពង់ ព្រោះបើប្រជាពលរដ្ឋមានទឹកស្អាតប្រើប្រាស់កាន់តែច្រើន យើងនឹងរួមចំណែកបាននូវការកាត់បន្ថយភាពក្រីក្ររបស់ពួកគាត់បានមួយកម្រិតទៀត ពោលគឺកាត់បន្ថយការចំណាយលើការព្យាបាលជំងឺផ្សេងៗ ដែលកើតឡើងពីការប្រើប្រាស់ទឹកមិនស្អាត »។

បច្ចុប្បន្ន ការផ្គត់ផ្គង់ទឹកស្អាតនៅរាជធានីភ្នំពេញ មិនទាន់គ្រប់គ្រាន់នៅឡើយ ដែលទាមទារឲ្យមានការវិនិយោគបន្ថែម ខណៈរដ្ឋាករទឹកស្វយ័តក្រុងភ្នំពេញ មានលទ្ធភាពផលិតទឹកបានត្រឹមតែ៥៦ម៉ឺនម៉ែត្រគីបប៉ុណ្ណោះក្នុង១ថ្ងៃ ប៉ុន្ដែសេចក្ដីត្រូវការទឹកស្អាតប្រើប្រាស់រហូតដល់ប្រមាណ៦០ម៉ឺនម៉ែត្រគីបក្នុង១ថ្ងៃ ។

បើតាមលោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញបានថ្លែងកាលពីពេលថ្មីៗនេះថា ៖« សព្វថ្ងៃ យើងមានលទ្ធភាពផលិត និងចែកចាយទឹកនៅទូទាំងរាជធានីភ្នំពេញ ចំនួន៥៦ម៉ឺនម៉ែត្រគីបក្នុង១ថ្ងៃ ហើយ១ឆ្នាំៗ រដ្ឋាករទឹកក្រុងភ្នំពេញបានផលិតទឹកស្អាតជូនពលរដ្ឋនៅភ្នំពេញប្រើប្រាស់ប្រមាណ១៧០លានម៉ែត្រគីប។ ដូច្នេះ ពលរដ្ឋទទួលបានសេវាកម្មពីរដ្ឋាករទឹកប្រមាណ៣៣០ពាន់គ្រួសារ ។ ចំនួននេះ គឺនៅខ្វះខាតនៅឡើយសម្រាប់ពលរដ្ឋប្រើប្រាស់ ។ ទោះយ៉ាងនេះក្ដី យើងក៏មានគម្រោងសាងសង់រោងចក្រផលិតទឹកស្អាតធំៗបន្ថែមទៀត ដើម្បីឲ្យទាន់តម្រូវការប្រើប្រាស់របស់ពលរដ្ឋនៅរាជធានីភ្នំពេញ និងជាយក្រុងផងដែរ »៕