រាជធានីភ្នំពេញ៖ ជាថ្មីម្តងទៀតអ្នកនាងអម្ពរ ទេវី បានបង្ហាញខ្លួននៅភ្នំពេញ ។ តើតារាប្រជាប្រិយរូបនេះមកធ្វើអ្វី? ខណៈនាងរស់នៅ និងមានការងារអចិន្ត្រៃយ៍លើទឹកដីអាមេរិកទៅហើយនោះ ។
កាលពីពេលថ្មីៗកន្លងមកនៅអាកាសយានដ្ឋានអន្តរជាតិភ្នំពេញ អ្នកនាងអម្ពរ ទេវី បានចុះចាកយន្តហោះពីអាមេរិក ដោយមានអ្នករង់ចាំទទួលស្វាគមន៍ជាច្រើននាក់ ។ ទាំងអម្ពរ ទេវី ទាំងអ្នករង់ចាំទទួលបានញញឹមរាក់ទាក់ស្និទ្ធស្នាលគ្នា ។
បន្ទាប់ពីប៉ុន្មានខែមុននោះ ការមកភ្នំពេញរបស់អ្នកនាងអម្ពរ ទេវី លើកនេះ តាមការបញ្ជាក់របស់លោកជា ឌីណាង ហៅម៉ាប់ ម្ចាស់ផលិតកម្មឲ្យដឹងថា អ្នកនាងអម្ពរ ទេវី មានរយៈពេល៥០ថ្ងៃសម្រាប់ចូលរួមសម្តែងក្នុងរឿង«ឆន្ទា» និង«ម្ចាស់ក្រោលដំរី» ។
សាច់រឿង«ម្ចាស់ក្រោលដំរី» នឹងថតចប់នៅដំណាច់ឆ្នាំ២០១៨ ដោយគ្រោងនឹងបញ្ចាំងនៅស្ថានីយទូរទស្សន៍ CTN នាដើមឆ្នាំ២០១៩ ។ ទោះបីជារយៈពេលខ្លី តែផលិតកររូបនេះពេញចិត្តចំពោះការជ្រើសរើស តារាជើងចាស់អម្ពរ ទេវី ចូលរួមសម្តែង ។ ក្នុងរឿង «ម្ចាស់ក្រោលដំរី» អ្នកនាងអម្ពរទេវី នឹងសម្តែងជាតួអង្គម្តាយដែលបាត់កូនប្រុសជាទីស្រលាញ់ ។ កូនប្រុសនោះត្រូវជនជាតិខ្មែរលើ មានលំនៅជិតព្រំដែនខ្មែរ-ថៃ រើសយកទៅចិញ្ចឹម និងរស់នៅជាមួយសត្វដំរីព្រៃតាំងពីតូចរហូតក្លាយជាហ្មដំរីដ៏ជំនាញ ។ តួអង្គអម្ពរ ទេវី សម្តែងរួមគ្នាជាមួយនឹងដៃគូសម្តែងចាស់លោកទេព រិនដារ៉ូ ។
លោកជាង ឌីណាង និយាយថា«ការប៉ះគ្នាលើកនេះ ធ្វើឲ្យទស្សនិកជនមិនតិចនោះទេ ដែលអន្ទះសារង់ចាំទស្សនាការសម្ដែងរបស់ តារាជើងចាស់ទាំង២ដួងនេះ ព្រោះស្នាដៃអ្នកទាំង២ត្រូវបានមហាជនក្នុង និងក្រៅប្រទេស ទទួលស្គាល់ពីសមត្ថភាពសម្ដែងយ៉ាងប៉ិនប្រសប់តាមរយៈរឿង ល្បីៗកន្លងមក ដែលធ្វើឲ្យគ្រប់គ្នាមិនអាចបំភ្លេចបាន »។
កន្លងមកអ្នកនាងអម្ពរ ទេវី បានធ្វើដំណើរទៅកាន់ទឹកដីខេត្តបាត់ដំបងដើម្បីចូលរួមពិធីក្រុងពលីចេញថតភាពយន្តថ្មីរបស់ផលិតកម្ម រួមដោយការចែកអំណោយដល់ជនក្រីក្រនៅទីនោះ ។ គ្រានោះអ្នកនាងទេវី ថា មានបំណងរៀបចំកម្មវិធីចែកអំណោយដល់ក្រុមគ្រួសារក្រីក្រម្តងទៀត ប្រសិនបើមានឱកាសវិលមកថតនៅកម្ពុជាជាថ្មី ។ តារាជើងចាស់រូបនេះបានបង្ហាញក្តីរំភើបរីករាយខ្លាំង ព្រោះតែនាងខកខានធ្វើដំណើរទៅបាត់ដំបង និងចូលរួមកម្មវិធីសប្បុរសធម៌ជាមួយសិល្បករដទៃ ។
អ្នកនាងអម្ពរ ទេវី បានថតភាពយន្តរឿង«ឆន្ទា» ចប់រួចរាល់ហើយកាលពីមកលើកមុននោះ តែត្រូវថតបំពេញប្លង់មួយចំនួន ។ ពេលនេះនាងនឹងចូលរួមសម្តែងក្នុងរឿង «ម្ចាស់ក្រោលដំរី» ៕
ចែករំលែកព័តមាននេះ