ខេត្តកំពង់ចាម ៖ ពីមួយឆ្នាំទៅមួយឆ្នាំក្រសួងអប់រំយុវជន និងកីឡា បានយកចិត្តទុកដាក់ក្នុងការពង្រឹងការសិក្សាឲ្យកាន់តែមានគុណភាពក្នុងនោះដូចជា ការប្រលងសញ្ញាប័ត្រមធ្យមសិក្សាទុតិយភូមិនៅថ្ងៃទី២០-២១ សីហា ២០១៨ ដោយហាមយកចូលក្នុងមណ្ឌលប្រលងរួមមាន ទី១-ទូរស័ព្ទដៃ, ទី២-គ្រឿងអេឡិចត្រូនិចគ្រប់ប្រភេទ, ទី៣-អាវុធជាតិផ្ទុះ និងទី៤-សំណៅឯកសារផ្សេងៗ ហើយប្រសិនបើ បេក្ខជនល្មើសនឹងបម្រាមនេះនឹងត្រូវធ្លាក់ដោយស្វ័យប្រវត្តិតែម្តង ។
បេក្ខជន លី ទីឡា ភេទស្រី មកពីវិទ្យាល័យ កោះសូទិន ប្រាប់ពេលមកមើលឈ្មោះប្រលងនៅមណ្ឌលវិទ្យាល័យព្រះសីហនុ ក្រុងកំពង់ចាម ឲ្យដឹងនៅព្រឹកថ្ងៃទី១៩ សីហា ថា «កាលពីឆ្នាំ២០១៧កន្លងទៅនាងធ្លាប់បានប្រលងសញ្ញាប័ត្រមធ្យមសិក្សាទុតិយភូមិម្តងរួចមកហើយដែលកាលណោះខ្វះពិន្ទុតែបន្តិចនឹងត្រូវប្រលងជាប់ ។
ទោះបីជាបែបនេះក្តីមិនតូចចិត្តនោះទេ បានប្រឹងរៀនសូត្របំប៉នគ្រប់មុខវិជ្ជាសម្រាប់បញ្ចេញសមត្ថភាពនៅថ្ងៃទី២០ សីហា និង២១ សីហា ២០១៨ ក្នុងនោះក៏មានអារម្មណ៏ហាក់បីដូចជាមានការភិតភ័យបន្តិចដែរ ។ ប្រសិនណាបើប្រលងជាប់នោះនឹងត្រូវបន្តការសិក្សានៅសកលវិទ្យាល័យយកជំនាញផ្នែកអក្សរសាស្ត្រអង់គ្លេសជាវិជ្ជាមួយដែលបានស្រលាញ់តាំងពីក្មេង» ។
បេក្ខនារីឈ្មោះ ជន ហ៊ុយ គឹមហ័រ អាយុ១៨ឆ្នាំ រៀនថ្នាក់ទី១២ «B» មកពីវិទ្យាល័យរណឫទ្ធិ-គន្ធបុប្ជារព្រៃទទឹង ស្រុកព្រៃឈរ ប្រាប់ថា «នៅក្នុងថ្នាក់រៀនទទួលបានចំណាក់ថ្នាក់លេខ៦ ស្ទើររាល់ខែហើយបានមកប្រលងនៅមណ្ឌលវិទ្យាល័យព្រះសីហនុ ក្រុងកំពង់ចាម ជាមួយនឹងមិត្តភក្តិផ្សេងទៀតជាច្រើននាក់ដោយមិនមានការភិតភ័យនោះទេ ។
ហើយនឹងប្រឹងបញ្ចេញនូវសមត្ថភាពឲ្យអស់ពីក្នុងខ្លួនធ្វើយ៉ាងណាប្រលងឲ្យជាប់ ហើយក៏មានបំណងរៀនយកជំនាញគ្រូបង្រៀន ព្រោះថាជំនាញគ្រូនេះបានស្រលាញ់ និងប៉ងជាយូរណាស់មកហើយ» ។
សូមបញ្ជាក់ថានៅព្រឹកថ្ងៃទី១៩ សីហា ក្នុងមណ្ឌលសាលាបឋមសិក្សា-អនុវិទ្យាល័យទួលថ្ម ក្រុងកំពង់ចាមគេបានសង្កេតឃើញមានម្តាយ និងបេក្ខជនដែលកូនត្រូវប្រលងបានមកនាំមកអុធធូប បែរបន់ពីសម្តេចព្រះសង្ឃរាជ ជួន ណាត សុំពរជ័យដោយឲ្យប្រលងជាប់ផងដែរ ៕
ចែករំលែកព័តមាននេះ