ខេត្តព្រះសីហនុ ៖ សេចក្តីរាយការណ៍ពីកងរាជអាវុធហត្ថស្នាក់ការសន្តិសុខ៤០២ អោយដឹងថា ចាប់ពីម៉ោងជាង២រសៀល ថ្ងៃទី១៨ ខែសីហា ឆ្នាំ ២០១៨ ជំនន់ទឹកភ្លៀងចាប់ផ្ដើមហូរកាត់ថ្នល់ជាតិលេខ៤ ប្រវែងជាង១០ម៉ែត្រ នៅចំណុចត្រង់ស្ពានស្ទឹងសំរោង ចន្លោះគីឡូម៉ែត្រលេខ 115-116 ក្នុងភូមិសាស្ត្រ ភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ ។
តាមការពិនិត្យជាក់ស្តែង ស្ថានភាពទឹកអាចនឹងបន្តឡើងទៀត ព្រោះអាកាសធាតុមេឃកំពុងមានភ្លៀងបន្ត ។ ទោះជាយ៉ាងនេះក្តីចរាចរណ៍ទៅមករបស់យានយន្តគ្រប់ប្រភេទនៅបើកដំណើរការជាធម្មតា មិនទាន់មានបិទផ្អាកឡើយគិតត្រឹមម៉ោង៣រសៀលថ្ងៃដដែលនេះ ។
បច្ចុប្បន្នកម្លាំងសមត្ថកិច្ចនៅការពារជួយសំរូួលសណ្តាប់ធ្នាប់ចរាចរណ៍ត្រង់ចំណុចដែលមានជំនន់ទឹកភ្លៀងហូរកាត់ផ្លូវ ហើយមកទល់ត្រឹមម៉ោងជិត៥ល្ងាចថ្ងៃ១៨ សីហា ២០១៨ នេះអាជ្ញាធរបានប្រកាសបិទផ្អាកបណ្តោះអាសន្នមិនអោយរថយន្តធុនធំឆ្លងកាត់ឡើយដោយសារតែទឹកកំពុងបន្តកើនឡើង ។ ចរាចរណ៍អាចបង្វែរតាមផ្លូវជាតិលេខ៣ជាបណ្តោះអាសន្ន ៕
ចែករំលែកព័តមាននេះ