សហរដ្ឋអាមេរិក-ចិន ៖ យោងតាមរបាយការណ៍ប្រចាំឆ្នាំមួយរបស់មន្ទីរប៉ង់តាហ្គោន ចេញផ្សាយនាថ្ងៃទី១៦ សីហា ខណៈកំពុងមានភាពតានតឹងខាងពាណិជ្ចកម្ម កាន់តែខ្លាំងរវាងក្រុងវ៉ាស៊ិនតោន និងក្រុងប៉េកាំងថា កងទ័ពចិនរយៈពេលប៉ុន្មានឆ្នាំចុងក្រោយនេះ បានពង្រីកប្រតិបត្តិការរបស់បណ្ដាយន្តហោះទម្លាប់គ្រាប់បែកយុទ្ធសាស្ត្ររបស់ខ្លួន ដោយធ្វើការហ្វឹកហ្វឺនប្រហែលជាត្រៀម សម្រាប់វាយប្រហារបណ្ដាគោលដៅអាមេរិក ។
មន្ទីរប៉ង់តាហ្គោនបានលាតត្រដាងរបាយការណ៍នេះ ដែលគូសបញ្ជាក់ពីការខិតខំប្រឹងប្រែងរបស់ចិន ដើម្បីពង្រីកឥទ្ធិពលរបស់ខ្លួនលើពិភពលោក ជាមួយការចំណាយខាងកិច្ចការពារ ដែលមន្ទីរប៉ង់តាហ្គោនប៉ាន់ប្រមាណថា មានដល់ជាង១៩០ពាន់លានដុល្លារក្នុងឆ្នាំ២០១៧ ។
របាយការណ៍នោះសរសេរថា រយៈពេល៣ឆ្នាំចុងក្រោយនេះកងទ័ពចិនបានពង្រីកដោយឆាប់រហ័ស បណ្ដាតំបន់ប្រតិបត្តិការរបស់យន្តហោះទម្លាក់គ្រាប់បែកយុទ្ធសាស្ត្រ ក្នុងដែនសមុទ្រពិសេសតំបន់សមុទ្រសំខាន់ៗ ហើយហ្វឹកហ្វឺនប្រហែលជាសម្រាប់វាយប្រហារប្រឆាំងបណ្ដាគោលដៅអាមេរិកនិងសម្ព័ន្ធមិត្ត ។
ទោះបីយ៉ាងណាក្នុងរបាយការណ៍របស់ខ្លួន មន្ទីរប៉ង់តាហ្គោនវាយតម្លៃថា កងទ័ពចិនដែលពង្រីករង្វង់ប្រតិបត្តិការរបស់ខ្លួន ជាសារដែលចិនចង់បញ្ជូនក្រៅពីការបង្ហាញសមត្ថភាពកាន់តែខ្លាំង តែរឿងនោះក៏មិនច្បាស់ដែរ ។
ឆ្នាំនេះចិនបានបញ្ជូនបណ្ដាយន្តហោះទម្លាក់គ្រាប់បែកយុទ្ធសាស្ត្រ ទៅក្បែរកោះទាំងឡាយដែលមានជម្លោះក្នុងសមុទ្រចិនខាងត្បូង ក្នុងក្របខណ្ឌនៃសមយុទ្ធយោធានានា ។ រួចកាលពីខែមករាមន្ទីរប៉ង់តាហ្កោនបានចាត់ទុកការតស៊ូប្រឆាំងឥទ្ធិពលរបស់ចិននិងរបស់រុស្សុីថាជាអាទិភាព នៃយុទ្ធសាស្ត្រការពារជាតិ។
ឆន្ទះរបស់ក្រុងវ៉ាស៊ិនតោននិងរបស់ក្រុងប៉េកាំងរក្សាភាពតានតឹងខាងយោធា រយៈពេលប៉ុន្មានខែចុងក្រោយនេះ ហាក់បង្ហាញសញ្ញាច្បាស់ ពិសេសកាលពីខែឧសភាក្រោយពីមន្ទីរប៉ង់តាហ្គោន បដិសេធមិនឲ្យចិនចូលរួមក្នុងសមយុទ្ធយោធារួមជាអន្តរជាតិប្រចាំឆ្នាំមួយក្នុងសមុទ្រ ៕
ចែករំលែកព័តមាននេះ