ប្រទេសជប៉ុន ៖ ព្រះចៅអធិរាជជប៉ុនអាគីហ៊ីតូនាថ្ងៃទី១៥ សីហា ទ្រង់សម្ដែងវិប្បដិសារីយ៉ាងជ្រាលជ្រៅរបស់ព្រះអង្គ នាពិធីរំលឹកខួបនៃការចុះចាញ់សង្គ្រាមឆ្នាំ១៩៤៥ ដែលនោះនឹងជាពិធីចុងក្រោយមុនពេលព្រះអង្គប្រកាសដាក់រាជ្យនាខែមេសាខាងមុខនេះ។
ព្រះចៅអធិរាជព្រះជន្ម៨៤ព្រះវស្សា នៅមុខសាធារណជនប្រមាណជា៦០០០នាក់ ឯសាល់ NIPPON BUDOKAN នាកណ្ដាលក្រុងតូក្យូ ទ្រង់មានព្រះរាជបន្ទូលថា ពោរពេញដោយវិប្បដិសារីយ៉ាងជ្រាលជ្រៅ ខ្ញុំប្រាថ្នាសូមកុំឲ្យមានការបំផ្លិចបំផ្លាញនៃសង្គ្រាមជាថ្មីទៀត។
ព្រះចៅអាគីហ៊ីតូ បុត្រាព្រះចៅហ៊ីរ៉ូហ៊ីតូ ជាប្រមុខដឹកនាំជប៉ុននាសម័យកាលសង្គ្រាមរួចជាអ្នកប្រកាសពីការចុះចាញ់សង្គ្រាមថ្ងៃទី១៥សីហា១៩៤៥នោះ ទ្រង់ធ្លាប់សម្ដែងវិប្បដិសារីបែបនេះម្ដងជាលើកដំបូងកាលពីឆ្នាំ២០១៥។
ព្រះបុត្រាច្បងរបស់ព្រះអង្គ ព្រះអង្គម្ចាស់ណារូហ៊ីតូជាអ្នកឡើងស្នងរាជ្យពីព្រះអង្គនាចុងខែមេសា យោងទៅតាមច្បាប់លើកលែងមួយដែលអនុញ្ញាតឲ្យទ្រង់ឡើងគ្រងរាជ្យបល្លង្កមុនការចូលព្រះទិវង្គតរបស់ព្រះបិតា។
នាយករដ្ឋមន្ត្រីជប៉ុនលោកស៊ីនហ្សូអាបេ ក៏ថ្លែងដែរថា បណ្ដាការខុសឆ្គងនៃសង្គ្រាមពុំត្រូវកើតមានទៀតឡើយ។ដោយគិតដល់ប្រវត្តិសាស្ត្រ យើងនឹងបន្តប្រកាន់យ៉ាងម៉ឺងម៉ាត់ការសន្យានេះ ៕
ចែករំលែកព័តមាននេះ