រាជធានីភ្នំពេញ ៖ បុរសម្នាក់សង្ស័យប្រើប្រាស់គ្រឿងញៀនលើសកំរិតបានទាញកាំបិតប៉័ងតោ មករកកាប់បុរសអ្នកលក់សាំងដបម្នាក់ ព្រោះខឹងមិនព្រមឱ្យជឿសាំង ហេតុការណ៍នេះបង្កឱ្យមានការភ្ញាក់ផ្អើលឡើងកាលពីម៉ោង២និង៤០នាទីរំលងអធ្រាត្រឈានចូលថ្ងៃទី១៦ ខែសីហា ឆ្នាំ២០១៨ ទល់មុខសាលាបឋមសិក្សាស្ទឹងមានជ័យ ផ្លូវ២១៧ ស្ថិតក្នុងសង្កាត់ស្ទឹងមានជ័យ២ ខណ្ឌមានជ័យ ។
ជនសង្ស័យខាងលើដែលសមត្ថកិច្ចឃាត់ខ្លួននោះ គឺមិនត្រូវបានឱ្យស្គាល់អត្តសញ្ញាណនោះទេ ។ ហើយតាមសម្តីជនរងគ្រោះជាអ្នកលក់សាំងដបសុំមិនបញ្ចេញឈ្មោះបានឱ្យដឹងថា មុនកើតហេតុ រូបគាត់អង្គុយលក់សាំងដបនៅមុខសាលាបឋមសិក្សាស្ទឹងមានជ័យ ស្រាប់តែបុរសខាងលើជិះម៉ូតូម៉ាកសង់កូរ៉េកញ្ចាស់មួយគ្រឿងបានមកសុំជឿសាំងរបស់គាត់ តែមិនដឹងថាយកទៅធ្វើអ្វីនោះ ។
ជនរងគ្រោះបន្តទៀតថា ពេលនោះដែរ រូបគាត់មិនព្រមជឿឱ្យ បុរសរូបនោះក៏ជិះម៉ូតូទៅបាត់មួយសន្ទុះ ស្រាប់តែបុរសនោះជិះម៉ូតូត្រឡប់មកវិញ ដោយកាន់កាំបិតប៉័ងតោចំនួន២ មកគំរាមកាប់រូបគាត់ ។ ប៉ុន្តែដោយឃើញហេតុការណ៍មិនស្រួល រូបគាត់បានទូរស័ព្ទប្តឹងសមត្ថកិច្ចមូលដ្ឋានឱ្យចុះឃាត់ខ្លួននបុរសម្នាក់តែម្តង ។ ហើយពេលសមត្ថកិច្ចចុះទៅដល់កន្លែង បុរសរូបនោះបានលត់ជង្គង់សំពះសុំទោសផង យំផង មើលទៅដូចជាមនុស្សបែកថ្នាំអញ្ចឹង ។
ក្រោយពេលកើតហេតុ បុរសខាងលើត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលស្ទឹងមានជ័យ២ ថា តើបុរសរូបនោះបែកថ្នាំ ឬមួយក៏មានចេតនាបង្កហិង្សាដាក់ជនរងគ្រោះ ៕
ចែករំលែកព័តមាននេះ