ប្រទេសកូរ៉េទាំងពីរ ៖ ទីភ្នាក់ងារព័ត៌មានកូរ៉េខាងត្បូង YONHAP បានរាយការណ៍នាថ្ងៃទី១៣ សីហាថា ប្រទេសកូរ៉េទាំង២នឹងជួបគ្នាកំពូលថ្មីនៅទីក្រុងព្យុងយ៉ាង នាខែកញ្ញាខាងមុខនេះ ខណៈភាគីទាំង២ជួបប្រជុំគ្នាកម្រិតខ្ពស់នៅតំបន់ហាមមិនឲ្យមានកងទ័ពដែលបែងចែកកូរ៉េទាំង២។
ដំណើរទៅកាន់ក្រុងព្យុងយ៉ាង របស់ប្រធានាធិបតីកូរ៉េខាងត្បូងលោក MOON JAE IN នឹងជាទស្សនកិច្ចលើកដំបូងរបស់ប្រមុខរដ្ឋកូរ៉េខាងត្បូងមួយរូប ទៅកាន់កូរ៉េខាងជើងពុំធ្លាប់មានចាប់តាំងពីជាងមួយទសវត្សមកហើយ។ ក្រសួងបង្រួបបង្រួមកូរ៉េខាងត្បូងប្រកាសនាថ្ងៃទី១៣ សីហា ពីការជួបគ្នាកំពូលថ្មីនេះ។
មេដឹកនាំកូរ៉េខាងជើងលោកគីម ជុងអ៊ុន និងប្រធានាធិបតីកូរ៉េខាងត្បូង លោក MOON JAE IN បានជួបគ្នាកំពូល២លើកហើយ គឺម្ដងនាខែមេសា ហើយបន្ទាប់មកនាខែឧសភា នាឱកាសនៃការជួបគ្នាមួយ ពុំប្រកាសឲ្យដឹងជាមុន។ នាខែមេសា ក្នុងការជួបគ្នាកំពូលនៅភូមិប៉ានមុនហ្សូម មេដឹកនាំទាំង២បានព្រមព្រៀងគ្នា រៀបចំការជួបគ្នាកំពូលថ្មីនាសរទរដូវ ហើយលើកនេះនៅក្រុងព្យុងយ៉ាង រដ្ឋធានីកូរ៉េខាងជើង។ តំណាងរបស់ប្រទេសទាំង២បានជួបប្រជុំគ្នានាថ្ងៃទី១៣ សីហា នៅភូមិប៉ានមុនហ្សូម ដើម្បីរៀបចំការជួបគ្នាកំពូលថ្មីនោះ៕
ចែករំលែកព័តមាននេះ