រាជធានីភ្នំពេញ៖ក្រុមតន្ត្រីបុរាណខ្មែរមួយក្រុមមានឈ្មោះថា «យសោ» កំពុងហាត់សមស្នាដៃថ្មីសម្រាប់ការសម្ដែងដែលគ្រោងធ្វើឡើងនៅថ្ងៃទី១៩ ខែសីហា ឆ្នាំ២០១៨ នៅមជ្ឈមណ្ឌលបេតិកភណ្ឌ បរិវេណវត្តបុរាណ រាជបូព៌ ក្រុងសៀមរាប ។…
រាជធានីភ្នំពេញ៖ក្រុមតន្ត្រីបុរាណខ្មែរមួយក្រុមមានឈ្មោះថា «យសោ» កំពុងហាត់សមស្នាដៃថ្មីសម្រាប់ការសម្ដែងដែលគ្រោងធ្វើឡើងនៅថ្ងៃទី១៩ ខែសីហា ឆ្នាំ២០១៨ នៅមជ្ឈមណ្ឌលបេតិកភណ្ឌ បរិវេណវត្តបុរាណ រាជបូព៌ ក្រុងសៀមរាប ។
សមាជិកក្រុមយសោ គឺជាតន្ត្រីករពីរាជធានីភ្នំពេញ និងសៀមរាបសរុប៨នាក់ និងមានជំនាញឧបករណ៍ភ្លេងជាច្រើនប្រភេទ ។ លក្ខណៈពិសេសនៃស្នាដៃកំពុងហាត់សមនេះ គឺជាការប្រគំរួមគ្នានៃឧបករណ៍ភ្លេងចម្រុះពីវង់ភ្លេងការបុរាណ មហោរី និងពិពាទ្យ ហើយតន្ត្រីករ នីមួយៗ នឹងហាត់រៀនលេងឧបករណ៍ភ្លេងលើសពីមួយប្រភេទដើម្បីបង្កើតរូបារម្មណ៍ក្នុងសាច់ភ្លេង ដែលទស្សនិកជននឹងទទួលបានអារម្មណ៍ថា ពួកគេហាក់ដូចជាកំពុងធ្វើដំណើរ និងបានឃើញប្រទេសកម្ពុជាទាំងមូល ។
យសោ គឺជាក្រុមតន្ត្រីករដែលបង្កើតស្នាដៃតន្ត្រីបុរាណនិពន្ធថ្មី ។ ពួកគេកំពុងតែចូលរួមសិក្ខាសាលានៅមជ្ឈមណ្ឌលបេតិកភណ្ឌរបស់យើង ខេត្តសៀមរាប ។ ក្នុងរយៈពេលពីរសប្តាហ៍ពួកគេនឹងធ្វើការស្ថាបនាលើស្នាដៃតន្ត្រីរបស់ពួកគេ និងបណ្តុះបណ្តាលអ្នកដឹកនាំក្រុមម្នាក់ដែលនឹងត្រូវដឹកនាំការហាត់សមជាប្រចាំនៅខេត្តសៀមរាប។
គម្រោងនិវេសនដ្ឋានតន្ត្រីនេះ ផ្ដួចផ្ដើមដោយអង្គការសិល្បៈខ្មែរអមតៈ និងជាលើកទីពីរហើយដែលបានរៀបចំនៅខេត្តសៀមរាប។ គោលបំណងនៃគម្រោង គឺជំរុញឲ្យតន្ត្រីករភ្លេងបុរាណខ្មែរបង្កើតស្នាដៃថ្មីដោយឈរលើមូលដ្ឋានចាស់ ព្រមទាំងបណ្ដុះបណ្ដាលប្រធានក្រុមចេញពីសមាជិកតន្ត្រីករខេត្តសៀមរាប ដែលនឹងមានសមត្ថភាពគ្រប់គ្រងការហាត់សមក្រុមជាប់ជាប្រចាំក្រោយគម្រោង ។
នៅចុងបញ្ចប់គម្រោងដែលមានរយៈពេលជិតពីរសប្ដាហ៍នេះ ក្រុមយសោ នឹងបង្ហាញស្នាដៃដែលពួកគេរួមគ្នាបង្កើតជូនដល់សាធារណជនចូលទស្សនាដោយសេរី ជាពិសេសអ្នករស់នៅខេត្តសៀមរាប ។ កម្មវិធីសម្ដែង គឺនៅថ្ងៃទី១៩ សីហា ឆ្នាំ២០១៨ ពីម៉ោង៧-៨យប់ នៅមជ្ឈមណ្ឌលបេតិកភណ្ឌ ៕
ចែករំលែកព័តមាននេះ