រាជធានីភ្នំពេញ ៖ នគរបាលខណ្ឌដង្កោបានបំបែកសំណុំរឿងភូតកុហក ដែលជាល្បិចដើម្បីលាក់បាំងកំហុសកូនស្រី បែរជាឪពុកបំប៉ោងបំភ្លៃសភាពការណ៍ ។ ការបំប៉ោងសភាពការណ៍នេះ បានធ្វើឱ្យញ័រកក្រើកទៅដល់អគ្គស្នងការនគរបាលជាតិ ដោយបានចាត់វិធានការភ្លាមៗ ឱ្យស្រាវជ្រាវពីករណីនេះ ។
រឿងរ៉ាវបានកើតឡើង បន្ទាប់ពីបុរសជាឪពុកបានរាយការណ៍ប្រាប់ក្រុមអ្នកកាសែត កាលពីប៉ុន្មានថ្ងៃមុននេះថា កូនស្រីរបស់គាត់ម្នាក់ ត្រូវជនមិនស្គាល់មុខ១ក្រុមចាប់ញាត់ចូលរថយន្ត ខណៈនាងកំពុងជិះម៉ូតូចេញពីផ្ទះទៅរៀនកួ កាលពីវេលាម៉ោង៣រសៀលថ្ងៃទី៣ សីហា ។
ជនមិនស្គាល់មុខបានដឹកនាងយកទៅបង្ខាំងទុកក្នុងភូមិគ្រឹះមួយ ស្ថិតក្នុងសង្កាត់បឹងកេងកងទី២ ខណ្ឌចំការមន ព្រមទាំងយកម៉ូតូ១គ្រឿងនិងសម្ភារជាប់ខ្លួនរបស់នាងអស់គ្មានសល់ថែមទៀតផង ។ មិនតែប៉ុណ្ណោះ បានបំផ្លើសទៀតថា ក្រៅពីកូនស្រីគាត់ក៏មានក្មេងស្រី១០នាក់ផ្សេងទៀត ត្រូវគេចាប់បង្ខាំងនៅក្នុងភូមិគ្រឹះនោះដែរ លុះ៣ថ្ងៃក្រោយមក កូនស្រីគាត់មានសំណាងបានរត់គេចខ្លួនរួច ។ប៉ុន្តែការអះអាងខាងលើ គឺជាការបំប៉ោងសភាពការណ៍ ដើម្បីបញ្ចៀសការខ្មាសអៀនអ្នកភូមិតែប៉ុណ្ណោះ ហើយទីបំផុតការពិតត្រូវបានទម្លាយ គឺកូនស្រីដើរលេងជ្រុលខ្លួន លក់ទាំងម៉ូតូចាយអស់គ្មានសល់ទើបចូលផ្ទះវិញ ។
គួររំលឹកថា ៖ នោះ…អត់លំៗទេ សមត្ថកិច្ចចម្រុះចេញធ្វើការឡើងក្តៅសាច់ហើយ
យុវតីខាងលើនេះ ឈ្មោះ ស៊ុំ ដាវីន អាយុ១៨ឆ្នាំ ជាសិស្សថ្នាក់១២B១ នៃវិទ្យាល័យទួលអំពិល ឪពុកឈ្មោះ ស៊ុំ វឌ្ឍនា អាយុ៤៤ឆ្នាំ សព្វថ្ងៃមានទីលំនៅក្នុងភូមិពាម សង្កាត់ព្រៃស ខណ្ឌដង្កោ ។ បុរសជាឪពុកនេះ ជាអ្នកនិយាយបំផ្លើស បង្កឱ្យមានរឿងមិនពិតកើតឡើង និងមានការជ្រួលច្របល់ទៀតផង ហើយនគរបាលក៏កំពុងតាមចាប់ខ្លួននាំទៅសាកសួរឡើងវិញផងដែរ ព្រោះខុសទាំងស្រុងលើពាក្យបណ្តឹង ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានឱ្យដឹងក្នុងសន្និសីទកាសែត នារសៀលថ្ងៃទី៩ សីហា ថា បន្ទាប់ពីទទួលបានព័ត៌មានដ៏រសើបបែបនេះ កម្លាំងនគរបាលខណ្ឌ មិនបានជឿជាក់ទាំងស្រុងលើរឿងនេះទេ និងបានព្យាយាមសុំជួបបំភ្លឺផ្ទាល់ពីយុវតីរូបនោះ។ ប៉ុន្តែអាណាព្យាបាលមិនព្រមឱ្យជួបបំភ្លឺឡើយនិងអះអាងថា កូនស្រីគាត់មានអាការៈខ្សោយ និងសម្រាកនៅមន្ទីរពេទ្យ ។
ទោះជាបែបនេះក្ដី លោកបានដឹកនាំកងកម្លាំងធ្វើការស្រាវជ្រាវយ៉ាងយកចិត្តទុកដាក់បំផុត រហូតដល់ការឆែកកាមេរ៉ាសុវត្ថិភាព នៅចំណុចដែលឪពុករបស់នាងប្រាប់ថា ជាកន្លែងដែលកូនស្រីរបស់ខ្លួន ត្រូវគេចាប់ដាក់រថយន្តទៀត ប៉ុន្តែតាមរូបភាពក្នុងកាមេរ៉ា គឺឃើញតែកូនស្រីគាត់ដើរនិយាយទូរស័ព្ទធម្មតាប៉ុណ្ណោះ គ្មានឃើញសកម្មភាពអ្វីដែលសង្ស័យឡើយ ។
ជាងនេះទៀត កម្លាំងនគរបាលខណ្ឌ បានសហការជាមួយនគរបាលក្រសួងមហាផ្ទៃ ប្រមូលរបាយការណ៍ពីគ្រប់បណ្ដាខេត្ត ក្រុងទូទាំងប្រទេស អត់មានបណ្តឹងណាមួយពីក្មេងស្រីណាម្នាក់បាត់ខ្លួនឡើយ ។ ចាប់តាំង
ពីពេលភ្ញាក់ផ្អើលរហូតមកលោកសង្ស័យថា ជារឿងប្រឌិតយ៉ាងពិតប្រាកដ ។ ទីបំផុត ការសង្ស័យមិនខុសមែន ។ រហូតមកដល់ព្រឹកថ្ងៃទី៩ ខែសីហា ក៏បានបំបែកសំណុំរឿងមួយនេះ ហើយការពិតត្រូវបានទម្លាយទាំងស្រុង ។
យុវតីសិស្សសាលាម្នាក់នេះ មិនត្រូវបានគេចាប់បង្ខាំងឡើយ តាមពិតនាងមានគំនិតខិលខូចដើរលេងជាមួយភឿនបន ដោយយកម៉ូតូហុងដាឌ្រីមសេ១២៥ ស៊េរីឆ្នាំ២០១៣ ពណ៌ខ្មៅ ពាក់ផ្លាកលេខភ្នំពេញ ១BO-៩៩២៧ របស់ខ្លួនទៅលក់នៅម្តុំគិរីរម្យ ខណ្ឌ៧មករា បានលុយ៦៥០ដុល្លារ ។ បន្ទាប់មក នាងយកលុយនោះទៅទិញម៉ូតូកូនទា១គ្រឿង តម្លៃ៥០០ដុល្លារ ហើយដកលុយ១៥០ដុល្លារដើរស៊ីចាយអស់ ក៏យកម៉ូតូកូនទានេះ លក់ក្នុងតម្លៃ៥០០ដុល្លារវិញ ។
ក្រោយពីបានលុយ ក៏ដើរស៊ីចាយបន្តជាមួយមិត្តភក្ដិរហូតដល់អស់ តែត្រឹមរយៈពេល៣ថ្ងៃប៉ុណ្ណោះ ។ នៅពេលអស់លុយ នាងក៏បានទូរស័ព្ទហៅ ឪពុកឲ្យទៅយកនៅប៉ុស្តិ៍នគរបាលបឹងកេងកងទី២ ដោយប្រឌិតរឿងបំប៉ោងសភាពការណ៍ថា ត្រូវជនមិនស្គាល់មុខចាប់ញាត់ចូលរថយន្តយកទៅបង្ខាំងទុក បង្អត់អាហារ និងធ្វើជាមានអាការល្ហិតល្ហៃទៀតផង ដែលជាហេតុធ្វើឱ្យមានការចលាចល ព្រោះការខ្មាស់គេពេកទើបប្រឌិតរឿងបែបនេះឡើង ។
លោកអធិការ ជឹម ស៊ីថា បន្តថា ម៉ូតូទាំង២គ្រឿងនេះ ត្រូវបានសមត្ថកិច្ចរកឃើញហើយ គឺនៅកន្លែងទិញលក់-ម៉ូតូម្តុំគិរីរម្យ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ និងបានដកហូតយកមករក្សាទុកនៅអធិការដ្ឋាននគរបាលខណ្ឌដង្កោ ហើយក៏កំពុងធ្វើការស្រាវជ្រាវបន្តទៀត ។ នៅក្នុងសន្និសីទកាសែតមុខអធិការដ្ឋានខណ្ឌដង្កោ បុរសជាឪពុកបានសារភាពថា គាត់និយាយនេះទៅតាមកូនដែលកុហក ។
លោកអធិការបានអំពាវនាវផងដែរថា សូមអាណាព្យាបាលទាំងអស់បើដឹងថា កូនមានកំហុសហើយ មិនត្រូវបិទបាំងស៊ុមគ្រលំជាមួយកូនបែបនេះទេ ហើយការបំប៉ោងសភាពការណ៍បែបនេះ គឺធ្ងន់ធ្ងរណាស់ដែលប៉ះពាល់ដល់ការងារសន្តិសុខផងដែរ ។
ចែករំលែកព័តមាននេះ