រាជធានីភ្នំពេញ ៖ កាលពីព្រឹកថ្ងៃទី៧ សីហា មានកម្លាំងសមត្ថកិច្ចចម្រុះ សហការជាមួយអគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានីភ្នំពេញ អធិការដ្ឋាននគរបាលខណ្ឌដង្កោ និងកម្លាំងអាវុធហត្ថបានបើកការស្រាវជ្រាវយ៉ាងដុតដៃដុតជើងបំផុត និងបានប្រមូលពាក្យបណ្តឹងពីតាមប៉ុស្តិ៍នគរបាលរដ្ឋបាលទាំង២៥រាជធានី-ខេត្ត គឺពុំមានបានទទួលបណ្តឹងពីអ្នកអាណាព្យាបាលក្មេងស្រីជាង១០នាក់ផ្សេងទៀតដែលថា បានបាត់កូនរបស់ខ្លួននោះទេ ។ ពាក់ព័ន្ធរឿង ៖ ផ្អើលចាប់នាងក្រមុំទៅបង្ខាំង… ពោរពេញទៅដោយអាថ៌កំបាំងណាស់
ដូច្នេះ ការនិយាយរបស់យុវតីឈ្មោះ ស៊ុំ ណាវិន ដែលថា មានយុវតីជាង១០នាក់ ត្រូវជនមិនស្គាល់មុខបង្ខាំងទុកយកទៅលក់នោះ អាចជារឿងប្រឌិតដើម្បីឆ្លើយយករួចខ្លួនពីឪពុកម្តាយរបស់នាង ដោយសារនាងបានចេញពីផ្ទះអស់រយៈពេល៣ថ្ងៃ ក្រែងឪពុកម្តាយរករឿងទើបនាងឆ្លើយយ៉ាងដូច្នេះ ។
ទោះជាយ៉ាងណា ឪពុកយុវតីរូបនេះនៅតែអះអាងថា កូនស្រីគាត់ត្រូវគេចាប់ញាត់ចូលរថយន្តដឹកយកទៅបង្ខាំងទុកជាមួយក្មេងស្រី១០នាក់ផ្សេងទៀត ហើយនៅព្រឹកថ្ងៃទី៧ ខែសីហា រូបគាត់ក៏បាននាំសមត្ថកិច្ចទៅចង្អុលបង្ហាញចំណុចដែលពួកជនសង្ស័យចាប់កូនស្រីរបស់គាត់ ។
ទីបំផុត តើេជារឿងពិត ឬជាការប្រឌិតនោះ សមត្ថកិច្ចនៅតែបន្តធ្វើការស្រាវជ្រាវ និងរង់ចាំយុវតីខាងលើចេញពីមន្ទីរពេទ្យសិន ដោយសារតែពេលនេះ នាងកំពុងសម្រាកព្យាបាលនៅមន្ទីរពេទ្យ ព្រោះអាការរបស់នាងត្រូវបានឪពុកអះអាងថា ពុំទាន់បានធូរស្បើយនៅឡើយ ។
ដោយសារតែការតាមប្រមាញ់ព័ត៌មាន ក្រុមអ្នកកាសែតជាច្រើនបានព្យាយាមទៅស្វែងរកព័ត៌មានដល់លំនៅឋានយុវតីនោះ តែមិនត្រូវបានក្រុមគ្រួសារនាងស្វាគមន៍ទេ និងបានចាក់សោរបងផ្ទះមិនឱ្យចូល បើនិយាយឱ្យច្បាស់លាស់ទៅនោះ គឺមិនចង់ឱ្យមានការសាកសួរកូនស្រីរបស់គាត់ទេ ៕
ចែករំលែកព័តមាននេះ