ខេត្តរតនគិរី ៖ យុវជនជាកូនភ្លោះពីរនាក់បានលេបថ្នាំកណ្តៀរសំលាប់ខ្លួន បណ្តាលឱ្យស្លាប់ម្នាក់ ចំណែកម្នាក់ទៀតជួយសង្គ្រោះទាន់ ខណៈពួកគេទាំង២នាក់ខឹងឪពុកម្តាយស្តីបន្ទោសឱ្យរឿងដើរលេងមិនចូលផ្ទះ។ ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៨ ខែសីហា ឆ្នាំ២០១៨ ត្រង់ចំណុចផ្ទះរបស់ជនរងគ្រោះ…
ខេត្តរតនគិរី ៖ យុវជនជាកូនភ្លោះពីរនាក់បានលេបថ្នាំកណ្តៀរសំលាប់ខ្លួន បណ្តាលឱ្យស្លាប់ម្នាក់ ចំណែកម្នាក់ទៀតជួយសង្គ្រោះទាន់ ខណៈពួកគេទាំង២នាក់ខឹងឪពុកម្តាយស្តីបន្ទោសឱ្យរឿងដើរលេងមិនចូលផ្ទះ។ ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៨ ខែសីហា ឆ្នាំ២០១៨ ត្រង់ចំណុចផ្ទះរបស់ជនរងគ្រោះ ស្ថិតនៅភូមិព្រួក ឃុំបាតាង ស្រុកលំផាត់។
បើតាមសមត្ថកិច្ចបានឱ្យដឹងថា យុវជនទាំងពីរនាក់ត្រូវជាកូនភ្លោះដែលរងគ្រោះខាងលើនោះ ម្នាក់ឈ្មោះញ៉ាញ មាស អាយុ២៥ឆ្នាំ ត្រូវជាប្អូន (កំពុងសម្រាកព្យាបាលនៅមន្ទីរពេទ្យ) និងម្នាក់ទៀតឈ្មោះញ៉ាញ ទូច អាយុ២៥ឆ្នាំ ត្រូវជាបង (បានស្លាប់) ។ យុវជនជាកូនភ្លោះទាំង២នាក់នេះរស់នៅភូមិឃុំកើតហេតុខាងលើ ។
ឪពុកម្តាយជនរងគ្រោះជាកូនភ្លោះទាំងពីរនាក់ខាងលើបានរៀបរាប់ប្រាប់សមត្ថកិច្ចថា គ្រួសារគាត់មានកូនទាំងអស់ចំនួន៥នាក់ ក្នុងនោះស្រី៣នាក់ កូនភ្លោះប្រុស២នាក់ (យុវជនជាកូនភ្លោះទាំង២នាក់នេះជាកូនទី២) ហើយក្រុមគ្រួសារគាត់មានមុខរបរដើរស៊ីឈ្នួលច្រូតស្មៅចំការនៅក្នុងភូមិ បានប្រាក់កំរៃបន្តិចបន្តួចគ្រាន់តែទិញម្ហូបបរិភោគ ស្ថានភាពគ្រួសាររកព្រឹកខ្វះល្ងាច។ ដោយឡែកកូនភ្លោះទាំងពីរនាក់ខាងលើមិនបានជួយធ្វើការរកស៊ីឪពុកម្តាយនោះទេ ១ថ្ងៃៗគិតតែពីដើរលេង និងផឹកស្រា ហើយក្នុង១ខែចូលផ្ទះបានតែ៥-៦ថ្ងៃតែប៉ុណ្ណោះ ដើរដេកតាមផ្ទះចំការអ្នកភូមិជារៀងរាល់យប់ ។
ប្រភពដដែលបានបន្តថា នៅថ្ងៃកើតហេតុនោះ ឪពុកម្តាយបានស្តីបន្ទោសយ៉ាងខ្លាំង ហើយយុវជនជាកូនភ្លោះទាំងពីរនាក់បងប្អូនក៏បាននាំគ្នាដើរចូលក្នុងផ្ទះ មួយស្ទុះក្រោយមកឮសូរសំឡេងស្រែកហៅឱ្យគេជួយ ស្រាប់តែឃើញប្រកាច់បែកពពុះមាត់ ទើបដឹងថាកូនលេបថ្នាំសំលាប់ខ្លួន ពេលនោះក៏បានបញ្ជូនជនរងគ្រោះទាំង២នាក់ទៅសង្គ្រោះនៅមន្ទីរពេទ្យភ្លាមៗផងដែរ។
តាមប្រភពព័ត៌មានពីគ្រូពេទ្យបានឱ្យដឹងថា ជនរងគ្រោះឈ្មោះញ៉ាញ ទូច ដែលស្លាប់នោះមិនអាចជួយសង្គ្រោះបានទេ ព្រោះជាតិពុលជ្រាបពេញរាងកាយបាត់ទៅហើយ ចំណែកម្នាក់ទៀតឈ្មោះ ញ៉ាញ មាស លេបថ្នាំបានតែបន្តិច ទើបគ្រូពេទ្យបានជួយសង្គ្រោះរួចផុតពីសេចក្តីស្លាប់។
ក្រោយពេលកើតហេតុ សមត្ថកិច្ចបានចុះត្រួតពិនិត្យរកឃើញថា ជនរងគ្រោះទាំងពីរនាក់បានយកថ្នាំកណ្តៀរ១កំប៉ុងមកផឹកដើម្បីសម្លាប់ខ្លួន ហើយនៅម៉ោង៨និង៣០នាទីយប់នៅថ្ងៃដដែលនោះឈ្មោះញ៉ាញ ទូច ដែលត្រូវជាកូនបងបានស្លាប់នៅមន្ទីរពេទ្យយ៉ាងអាណោចអាធ័ម ដោយឡែកកូនប្អូនឈ្មោះញ៉ាញ មាស មិនបានស្លាប់នោះទេ កំពុងសំរាកព្យាបាលនៅមន្ទីរពេទ្យបង្អែកខេត្ត។
សមត្ថកិច្ចបានបញ្ជាក់ទៀតថា កូនភ្លោះឈ្មោះញ៉ាញ ទូច នេះបានលេបថ្នាំកណ្តៀរជិតអស់១ដបតែម្នាក់ឯង ទើបគ្រូពេទ្យមិនអាចជួយសង្គ្រោះជីវិតបាន ក្រោយពីសមត្ថកិច្ចពិនិត្យរួចរាល់ហើយនោះ បានប្រគល់សពឱ្យក្រុមគ្រួសារ និងសាច់ញាតិដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ