សហរដ្ឋអាមេរិក ៖ មនុស្សយ៉ាងតិច១២នាក់ស្លាប់ ហើយច្រើនសិបនាក់ទៀតរងរបួស ក្នុងការបាញ់ប្រហារជាច្រើន កាលពីចុងសប្ដាហ៍កន្លងទៅនៅទីក្រុងស៊ីកាហ្គោ ជាទីក្រុងធំទី៣របស់អាមេរិក ពិសេសដោយសារស្នាដៃរបស់បណ្ដាពួកជនខិលខូចដែលអុកឡុកទីក្រុងនោះ។
យោងតាមកាសែត CHICAGO TRIBUNE ថា មនុស្សដល់ទៅ៤០នាក់ត្រូវគ្រាប់កាំភ្លើងរយៈពេលត្រឹមតែ៧ម៉ោង។ ក្នុងចំណោមអ្នកត្រូវគ្រាប់កាំភ្លើងទាំងនេះរួមមានអ្នកដើរធម្មតា ព្រមទាំងបណ្ដាសមាជិកក្រុមជនខិលខូច។ រវាងពីរយប់ថ្ងៃទី៣ មកព្រឹកថ្ងៃទី៦សីហា កាសែតនេះរាប់ឃើញមនុស្សជាង៧០នាក់ត្រូវគ្រាប់កាំភ្លើង។
បណ្ដាក្រុមជនខិលខូចមានច្រើនហើយសកម្មបំផុតនៅតាមសង្កាត់ទាំងឡាយនាភាគខាងលិច និងភាគខាងត្បូងនៃទីក្រុងនោះរបស់រដ្ឋអ៊ីលីណយ ជាសង្កាត់ក្រីក្របំផុតហើយសម្បូរដោយពួកជនជាតិភាគតិច។
លោក FRED WALLER អ្នកទទួលខុសត្រូវម្នាក់នៃប៉ូលិសក្រុងស៊ីកាហ្គោ ថ្លែងទៅកាន់ក្រុមអ្នកកាសែតថា ការបាញ់ប្រហារមួយចំនួនតម្រង់លើគោលដៅ ដែលទាក់ទងនឹងជម្លោះរវាងបណ្ដាក្រុមជនខិលខូច។ យោងតាមប៉ូលិសថា ក៏មានការបាញ់ប្រហារជាច្រើនសំដៅលើមនុស្សម្នាមិនរើសមុខផងដែរ ពិសេសបាញ់ប្រហារលើពិធីបុណ្យសពមួយ។
បើតាមទូរទស្សន៍ CNN រាយការណ៍ថា ស្នូរកាំភ្លើងជាច្រើនស្ដាប់ឮនាពេលយប់ថ្ងៃទី៤មកទី៥ សីហា។ តាមលោក WALLER រលកនៃអំពើហិង្សានោះ គឺជួនពេលគ្នាជាមួយការប្រគំតន្រី្តរបស់ក្រុមដ៏ល្បី LOLLAPALOOZA នាកណ្ដាលក្រុង ដែលញ៉ាំងឲ្យមានការដាក់ពង្រាយកងកម្លាំងប៉ូលិសជាច្រើន ប៉ុន្តែការប្រគំតន្ត្រី្នោះពុំរងការបាញ់ប្រហារឡើយ។
តាំងពីដើមឆ្នាំនេះមកនៅទីក្រុងស៊ីកាហ្គោមានការបាញ់សម្លាប់មនុស្ស៣១០នាក់ ជាតុល្យការខ្ពស់បំផុតនៅសហរដ្ឋអាមេរិក ខ្លាំងលើសទីក្រុងធំ២ទៀតរបស់ប្រទេស គឺទីក្រុងញូវយ៉ក និងក្រុងឡូសអេនចឺឡេស។ តាមលោក WALLER ថា កាំភ្លើងជាង៥.៥០០ដើមកាន់កាប់ដោយខុសច្បាប់ត្រូវបានរឹបអូសតាមដងវិថីទាំងឡាយនៃទីក្រុងស៊ីកាហ្គោ៕
ចែករំលែកព័តមាននេះ