ខេត្តកណ្តាល ៖ បុរសម្នាក់បានស្លាប់នៅនឹងកន្លែង នៅក្នុងគ្រោះថ្នាក់ជិះម៉ូតូទៅបុកជាមួយរថយន្តមួយគ្រឿងដួលសន្លប់ ហើយក៏ត្រូវរថយន្តមួយគ្រឿងទៀតមកពីក្រោយជាន់ហ្វ្រាំង មិនទាន់កិនតែម្តង ។ ហេតុការណ៍គ្រោះថ្នាក់នេះ កើតឡើងកាលពីថ្ងៃទី២៩ កក្កដា កន្លងទៅ វេលាម៉ោង៦និង៥០នាទីល្ងាច នៅលើផ្លូវជាតិលេខ១ចន្លោះគីឡូម៉ែត្រលេខ៤៩និងលេខ៥០ ក្នុងភូមិគគីរធំ ឃុំគគីរធំ ស្រុកកៀនស្វាយ ។
ជនរងគ្រោះឈ្មោះ ផាន សារ៉ា អាយុ២៩ឆ្នាំមានទីលំនៅភូមិអំពិលទឹក ឃុំកំពង់ភ្នំ ស្រុកលើកដែក ។ ចំណែកឯអ្នកបើករថយន្តកិនមនុស្សស្លាប់ឈ្មោះ ក សុភ័ស្ស ភេទប្រុស អាយុ៣៤ឆ្នាំ មានទីលំនៅភូមិសំរោងក្អែ២ ឃុំសំរោងធំ ស្រុកកៀនស្វាយ ។ តាមអ្នកឃើញហេតុការណ៍ឱ្យដឹងថា បុរសរងគ្រោះជិះម៉ូតូហុងដាឌ្រីម ពណ៌ក្រហម ពាក់ផ្លាកលេខ ភ្នំពេញ ១DD-០៨២៥ ធ្វើដំណើរតាមផ្លូវជាតិលេខទិសដៅពីភ្នំពេញទៅអ្នកលឿង។
លុះទៅដល់ចំណុចខាងលើ ស្រាប់តែទៅបុកជាមួយរថយន្តមួយគ្រឿងក្នុងទិសដៅបញ្ច្រាសគ្នា
បណ្តាលឱ្យម៉ូតូដួល ប៉ុន្តែរថយន្តនោះមិនបានឈប់និងបានបន្តដំណើរទៅមុខបាត់ទៅ ។ ប្រភពព័ត៌មានឲ្យដឹងទៀតថា ស្របពេលនោះក៏មានរថយន្តមួយគ្រឿងទៀតម៉ាក KIA FRONTIER ពណ៌ស ប្រភេទដឹកទំនិញធុនតូច ពាក់ផ្លាកលេខ ២AA-៧២៥៨ បើកបរដោយឈ្មោះ អ៊ុក សុភ័ស្ស ភេទប្រុស និងមានអ្នករួមដំណើរម្នាក់ឈ្មោះ អ៊ុង ចំរើន ភេទប្រុស អាយុ២៨ឆ្នាំ នៅភូមិសំរោងក្អែ២ជាមួយគ្នា មកពីក្រោយក្នុងទិសដៅពីភ្នំពេញទៅអ្នកលឿងដូចគ្នា បានបុកម៉ូតូនិងកិនអ្នកបើកបរម៉ូតូបន្ថែមទៀតបណ្តាលឱ្យបុរសឈ្មោះ ផាន សារ៉ា ស្លាប់នៅនឹងកន្លែងកើតហេតុ ។
ក្រោយកើតហេតុ នគរបាលបានឃាត់ខ្លួនអ្នកបើកបររថយន្តឈ្មោះ អ៊ុក សុភ័ស្ស រួចបញ្ជូនទៅអធិការដ្ឋាននគរបាលស្រុកកៀនស្វាយ ។ តាមការសន្និដ្នាន ចំពោះករណីគ្រោះថ្នាក់នេះ បណ្តាលមកពីអ្នកបើកបររថយន្តឈ្មោះ អ៊ុក សុភ័ស្ស ធ្វេសប្រហែស មិនប្រុងប្រយ័ត្នចំពោះឧបសគ្គខាងមុខ ៕
ចែករំលែកព័តមាននេះ