ទឹកទន្លេមេគង្គវាយប្រហារដល់ខេត្តព្រះវិហារហើយ
- ព្រះវិហារ
ខេត្តព្រះវិហារ ៖ កាលពីថ្ងៃទី៣១ ខែកក្កដា ឆ្នាំ២០១៨កន្លងទៅនេះ ទឹកទន្លេមេគង្គ បានហូរធ្លាក់ចូលមកឃុំចំនួន២ ក្នុងនោះមានឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប…
ខេត្តព្រះវិហារ ៖ កាលពីថ្ងៃទី៣១ ខែកក្កដា ឆ្នាំ២០១៨កន្លងទៅនេះ ទឹកទន្លេមេគង្គ បានហូរធ្លាក់ចូលមកឃុំចំនួន២ ក្នុងនោះមានឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប ខេត្តព្រះវិហារ ជាប់ព្រំដែនកម្ពុជាឡាវហើយ កំពុងប្រឈមនឹងការលិចលង់ ដោយសារតែទឹកហូរចុះទៅក្រោមមិនទាន់ ទើបធ្វើឲ្យទឹកហូរចូលមកក្នុងឃុំចំនួន២ខាងលើ តែពុំទាន់មានការលិចលង់ខ្លាំងនោះទេ ។
លោក អ៊ុន ចាន់ដា ប្រធានគណៈកម្មការគ្រប់គ្រងគ្រោះមហន្តរាយខេត្ត និងជាអភិបាលខេត្តព្រះវិហារ បានមានប្រសាសន៍ថា ទឹកជំនន់ដែលហូរចូលមកដល់ឃុំចំនួន២ របស់ស្រុកឆែប ជាប់ព្រំដែនឡាវខាងលើនេះ ពុំបានបង្កឲ្យជន់លិចខ្លាំង ឬប៉ះពាល់ដល់ផ្ទះសម្បែងប្រជាពលរដ្ឋនៅឡើយទេ គ្រាន់តែទឹកបានហូរកាត់ផ្លូវបន្តិចប៉ុណ្ណោះ តែប្រជាពលរដ្ឋអាចធ្វើដំណើរឆ្លងកាត់បានជាធម្មតា ។
លោកថា ទោះបីជាបែបនេះក្តី អាជ្ញាធរខេត្តព្រះវិហារ និងមន្ត្រីពាក់ព័ន្ធទាំង អស់ បានត្រៀមលក្ខណៈរួចជាស្រេចហើយ មានដូចជា ទូក កាណូត សម្ភារគ្រឿងឧបភោគ បរិភោគ ថ្នាំពេទ្យ និងទីទួលសុវត្ថិភាព ដើម្បីត្រៀមជួយសង្គ្រោះប្រជាពលរដ្ឋ ប្រសិនបើមានការលិចលង់ ។
លោក ចាប កុយ ប្រធានមន្ទីរធនធានទឹក និងឧត្តុនិយមខេត្តព្រះវិហារ បានឲ្យដឹងថា មកដល់ពេលនេះស្ថានភាពទឹកជំនន់ដែលហូរពីទន្លេមេគង្គចូលមកឃុំចំនួន ២នេះ ឃើញថា មានការហូរមកបន្តិចម្តងៗ ដោយសារតែទឹកទន្លេមេគង្គបានហូរចុះទៅផ្ទៃខាងក្រោមមិនទាន់ ទើបធ្វើឲ្យទឹកហូរមកដល់ព្រំដែនកម្ពុជា-ឡាវតែម្តង តែពុំមានការលិចខ្លាំងឡើយ ។ លោកថា ការជន់លិចផ្លូវនេះមានប្រមាណ៤កំណាត់តែប៉ុណ្ណោះ ដែលស្ថិតនៅតំបន់ណាដែលទាប តែមិនបានប្រឈមដល់ការធ្វើដំណើរឆ្លងកាត់របស់ប្រជាពលរដ្ឋនោះទេ ។
សូមបញ្ជាក់ថា សម្រាប់តំបន់ងាយរងគ្រោះ តាមបណ្តោយដងស្ទឹងសែន របស់ខេត្ត ព្រះវិហារ ដែលកាលពីមុនមក នៅពេលរដូវវស្សាមកដល់តែងតែមានការរងគ្រោះនោះ មកដល់ពេលនេះពុំទាន់មានតួលេខណាមួយប្រឈមនៅឡើយទេ ដោយសារតែកម្ពស់ទឹកស្ទឹងសែនពេលនេះមានត្រឹម៨,៥០ម៉ែត្រតែប៉ុណ្ណោះ លើកម្ពស់ប្រកាសអាសន្ន១១,៥០ម៉ែត្រ៕
ចែករំលែកព័តមាននេះ