ខេត្តកណ្ដាល ៖ បុរសជនជាតិវៀតណាមម្នាក់ ជាអតីតពលករទូកនេសាទនៅប្រទេសថៃ ដោយគ្រោះថ្នាក់ចូលជើងជាមួយស្លាបចក្រទូកម៉ាស៊ីន បានក្លាយខ្លួនជាជនពិការជើងទាំង២ត្រឹមភ្លៅ ។ កន្លងមក បុរសនេះបានព្យាយាមធ្វើអត្តឃាតចំនួន៣លើកហើយ ដូចជា ការរវៃរទេះរុញចូលរថយន្ត និងចង.កជាដើម ប៉ុន្តែមិនបានសម្រេច ដោយអ្នកឃើញហេតុការណ៍ជួយទាន់ពេល ។ លុះលើកទី៤នេះ បានប្រើវិធីធ្វើអត្តឃាតមួយដែលគ្មានអ្នកណាម្នាក់នឹកស្មានដល់ឡើយ គឺគាត់បានលោតចូលទៅក្នុងទឹកពាងធំមួយ ដែលមានទឹកពេញ ហើយក៏បានស្លាប់បាត់បង់ជីវិតតាមបំណងរបស់ខ្លួន ។
ហេតុការណ៍ខាងលើនេះ បានកើតឡើងកាលពីវេលាម៉ោង១២និង៤៥នាទីថ្ងៃត្រង់ថ្ងៃទី២៨ ខែកក្កដា នៅក្នុង«អង្គការជួយជនរងគ្រោះកម្ពុជា ដោយសារអាសុីត» ស្ថិតនៅក្នុងភូមិត្រពាំងវែង ឃុំឆក់ឈើនាង ស្រុកអង្គស្នួល ។បុរសវៀតណាមរូបនេះឈ្មោះVieng Yang Choung អាយុ៤៦ឆ្នាំ គឺជាជនពិការជើងទាំង២ដោយត្រូវគ្រូពេទ្យកាត់ចោលត្រឹមភ្លៅ និងបានស្នាក់នៅក្នុងអង្គការខាងលើជិត១០ឆ្នាំមកហើយ។
មន្ត្រីនគរបាលព្រហ្មទណ្ឌស្រុកអង្គស្នួលនិយាយថា បុរសរូបនេះគឺជាអតីតពលករទូកនេសាទនៅប្រទេសថៃ ហើយជួបគ្រោះថ្នាក់ត្រូវស្លាបចក្រម៉ាស៊ីនទូកវាត់ត្រូវជើងបណ្ដាលឲ្យរងរបួសព្យាបាលមិនជាឡើយ ។ ក្រោយមក ត្រូវបានថៅកែថៃបោះបង់ចោលព្រោះធ្វើការលែងកើត និងបានអង្គការមួយប្រទះឃើញកាល ពីអំឡុងឆ្នាំ២០០៩ ក៏នាំយកទៅផ្ញើនៅ«អង្គការជួយជនរងគ្រោះកម្ពុជាដោយសារអាសុីត» ស្ថិតនៅក្នុងភូមិត្រពាំងវែង ឃុំឆក់ឈើនាង ស្រុកអង្គស្នួល ដើម្បីឲ្យជួយមើលថែនិងព្យាបាលជើងដែលរបួសដំបៅនោះ ។
ប្រភពដដែលបន្តថា ប៉ុន្តែទោះបីជាខំព្យាបាលបែបណាក៏ជើងដែលដំបៅនោះនៅតែមិនជាដដែល ហើយដំបៅកាន់តែរីកធំទៅៗរហូតឈានដល់គ្រូពេទ្យធ្វើការកាត់ចោលត្រឹមភ្លៅ ក្លាយជាជនពិការជើងទាំង២តែម្ដង ។ មិនតែប៉ុណ្ណោះ ក្រោយពីកាត់ជើងចោលហើយក៏នៅតែទទួលការព្យាបាលជាបន្តបន្ទាប់រហូតមកដល់សព្វថ្ងៃ ព្រោះត្រគាករបស់គាត់ក៏ដំបៅដែរ ហើយគ្រូពេទ្យវះបានកាត់យកសាច់ជើងមកប៉ះ តែនៅមិនទាន់ជាឡើយ ។
ដោយឡែក កន្លងមកគាត់បានព្យាយាមសម្លាប់ខ្លួន៣លើកជាបន្តបន្ទាប់រួចមកហើយ ដោយការចងក និងរវៃរទេះរុញចូលរថយន្តដើម្បីឲ្យរថយន្តបុក ។ ប៉ុន្តែមិនបានសម្រេចទេ ដោយមានអ្នកឃើញហេតុការណ៍ជួយសង្គ្រោះទាន់ពេលវេលា លុះដល់ថ្ងៃកើតហើយស្រាប់តែបាត់គាត់ទើបអ្នកគ្រប់គ្រងអង្គការដើររកគ្រប់កន្លែងតែមិនឃើញសោះ ។ លុះដើរទៅដល់កន្លែងដាក់ពាងទឹក ឃើញរទេះរុញរបស់គាត់នៅក្បែរពាង
ទឹកនោះ ហើយដោយមានការសង្ស័យក៏អើតមើលក្នុងពាងដែលមានទឹកពេញ ស្រាប់តែឃើញជនរងគ្រោះស្លាប់ក្នុងទឹកពាងនោះបាត់ទៅហើយ ។
ក្រោយពេលកើតហេតុ នគរបាលការិយាល័យបច្ចេកទេសនិងវិទ្យាសាស្ត្រខេត្ត និងនគរបាលផ្នែកពិនិត្យវិភាគសពនិងកន្លែងកើតហេតុនៃអធិការដ្ឋាននគរបាលស្រុកអង្គស្នួល ដោយមានការចូលរួមពីមន្ត្រីក្រុម ប្រឹក្សាឃុំឆក់ឈើនាងគ្រូពេទ្យ លោកមេភូមិ នគរបាលប៉ុស្តិ៍ និងពេទ្យអង្គការជួយជនរងគ្រោះកម្ពុជាដោយ សារអាសុីតបានធ្វើការពិនិត្យសពជនរងគ្រោះ ។ ជាលទ្ធផលបង្ហាញថា បុរសរូបនេះពិតជាស្លាប់ដោយសារការសម្លាប់ខ្លួននៅក្នុងទឹកពាងនោះមែន មិនមានសញ្ញាអ្វីដែលបញ្ជាក់ថាជាអំពើឃាតកម្មឡើយ ហើយអង្គ ការខាងលើ ក៏បានចាត់ចែងធ្វើបុណ្យសពតាមប្រពៃណី ៕
ចែករំលែកព័តមាននេះ