ខេត្តព្រៃវែង ៖ យុវជនម្នាក់បានស្លាប់បាត់បង់ជីវិតយ៉ាងអាណោចអាធម៌ដោយសារតែតភ្លើងដាក់ចាប់ចង្រិតមិនប្រយ័ត្នធ្វើអោយឆក់ខ្លួនឯង ។ ហេតុការណ៌នេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៦ កក្កដា នៅចំណុចភូមិឆ្ពឹស ឃុំថ្មពូន ស្រុកកញ្ជ្រៀច ខេត្តព្រៃវែង ។ ជនរងគ្រោះមានឈ្មោះ ភាព សុជាតិ អាយុ១៤ឆ្នាំ មានទីលំនៅក្នុងភូមិកើតហេតុ ។
តាមប្រភពព័ត៌មានពីសមត្ថកិច្ចមូលដ្ឋានបានអោយដឹងថា កន្លងមកយុវជនរងគ្រោះធ្លាប់តខ្សែភ្លើងដាក់ចាប់ចង្រិតបែបនេះច្រើនលើកមកហើយតែមិនដែលមានបញ្ហាអ្វីកើតឡើងនោះទេ រហូតមកដល់យប់ថ្ងៃកើតហេតុនោះយុវជនរងគ្រោះក៏បានតខ្សែភ្លើងអូសចេញពីផ្ទះទៅដាក់អំពូលចាប់ចង្រិតនៅតាមចិញ្ចើមថ្នល់ខាងជើងផ្ទះយុវជនរងគ្រោះចម្ងាយប្រមាណជា១០០ម៉ែត្រដូចសព្វមួយដងតែពេលតនោះទំនងជាមិនបានប្រយ័ត្នទើបធ្វើអោយភ្លាត់ស្នៀតត្រូវភ្លើងឆក់បែបនេះទៅ ។
ប្រភពដដែលនេះបានបញ្ជាក់ថា នៅពេលដែលកើតហេតុភ្លាមៗនោះក៏មានអ្នកបានឃើញហេតុការណ៌ និងស្រែកឆោឡោបង្កអោយមានការភ្ញាក់ផ្អើលឡើងផងដែរ ដោយអ្នកខ្លះរត់ទៅបិតភ្លើង អ្នកខ្លះស្រែកហៅគេឯងអោយមកជួយ និងបាននាំគ្នាសែងជនរងគ្រោះយកទៅកប់ដីខ្សាច់ និងជួយធ្វើចលនាបេះដូងអោយផងដែរ ប៉ុន្តែជាអកុសលយុវជនរងគ្រោះបានស្លាប់បាត់បង់ជីវិតផុតបាត់ទៅហើយ ។
ក្រោយពីកើតហេតុសមត្ថកិច្ចបានចុះទៅដល់កន្លែងកើតហេតុពិនិត្យសាកសព និងស្តាប់ការបំភ្លឺរបស់ក្រុមគ្រួសារជនរងគ្រោះសមត្ថកិច្ចសន្និដ្ឋានថា យុវជនរងគ្រោះពិតជាស្លាប់ដោយសារឆក់ចរន្តអគ្គីសនីពិតមែន ហើយក៏បានប្រគល់សពជូនទៅក្រុមគ្រួសារយកទៅធ្វើបុណ្យតាមប្រពៃណី នៅយប់ថ្ងៃកើតហេតុនោះតែម្តង ៕
ចែករំលែកព័តមាននេះ