លោកត្រាំ និង Juncker យល់ព្រមកាត់បន្ថយភាពតានតឹង
រដ្ឋធានីវ៉ាស៊ីនតោន ៖ កាលពីថ្ងៃទី២៥ កក្កដា លោកប្រធានាធិបតីអាមេរិក ដូណាល់ ត្រាំ និងលោក Jean-Claude Juncker…
រដ្ឋធានីវ៉ាស៊ីនតោន ៖ កាលពីថ្ងៃទី២៥ កក្កដា លោកប្រធានាធិបតីអាមេរិក ដូណាល់ ត្រាំ និងលោក Jean-Claude Juncker ប្រធានគណៈកម្មការអឺរ៉ុប (European Commission) បានព្រមព្រៀងគ្នាលើកិច្ចព្រមព្រៀងកាត់បន្ថយភាពតានតឹង នៃជម្លោះពាណិជ្ជកម្មរវាងប្រទេសមានសេដ្ឋកិច្ចដ៏ធំទាំងពីរ ។
កិច្ចព្រមព្រៀងនេះ មានន័យថា សហរដ្ឋអាមេរិកនឹងមិនអនុម័តពន្ធដែលខ្លួនបានគំរាមថា នឹងដាក់លើយានយន្ត ហើយអាចនឹងប៉ះពាល់ដល់វិស័យរថយន្តរបស់អាល្លឺម៉ង់ទេ ។
ភាគីទាំងសងខាងបាននិយាយទៀតថា ពួកគេនឹងសហការគ្នា ដើម្បីដោះស្រាយពន្ធលើដែកថែប និងអាលុយញ៉ូម ដែលដាក់ដោយសហរដ្ឋអាមេរិកផងដែរ ។
លោក ដូណាល់ ត្រាំ បាននិយាយក្នុងសេចក្តីថ្លែងការណ៍មួយនៅ White House ថា ៖«ពួកយើងចង់បន្តពង្រឹងទំនាក់ទំនងពាណិជ្ជកម្មនេះ ដើម្បីផ្តល់អត្ថប្រយោជន៍ដល់ប្រជាពលរដ្ឋអាមេរិក និងអឺរ៉ុប » ។
អ្នកដឹកនាំទាំងពីររូបបានយល់ព្រមថា នឹងចាប់ផ្តើមដំណាក់កាលទំនាក់ទំនងថ្មីនេះ និងសហការគ្នាកាត់បន្ថយពន្ធដល់កម្រិតសូន្យ, លុបបំបាត់រាល់ឧបសគ្គមិនមែនពន្ធ និងបញ្ឈប់ការឧបត្ថម្ភធនដល់ផលិតផលឧស្សាហកម្ម ដែលមិនមែនជាយានយន្ត ។
លើសពីនេះ សហភាពអឺរ៉ុបបានប្តេជា្ញថា នឹងទិញសណ្តែកសៀង និងឧស្ម័នធម្មជាតិរបស់សហរដ្ឋអាមេរិកផងដែរ ។
លោកត្រាំ ក៏បានប្តេជា្ញសហការគ្នាកែទម្រង់អង្គការពាណិជ្ជកម្មពិភពលោក ដើម្បីដោះស្រាយបណ្តឹងរបស់លោកដែលចោទប្រកាន់ថា ប្រទេសចិនបានលួចយកបច្ចេកវិទ្យារបស់សហរដ្ឋអាមេរិក និងបណ្តឹងផ្សេងៗពីសកម្មភាពរបស់ក្រុមហ៊ុនរដ្ឋ ព្រមទាំងការផលិតដែកថែបលើសលប់ ជាដើម ។
គួរបញ្ជាក់ថា ទំនាក់ទំនងពាណិជ្ជកម្មរវាងសហរដ្ឋអាមេរិក និងសហភាពអឺរ៉ុប គឺស្មើនឹងទឹកប្រាក់ប្រមាណ១ទ្រីលានដុល្លារ ៕
ចែករំលែកព័តមាននេះ