រាជធានីភ្នំពេញ ៖ សត្វដំរីមួយក្បាលនឹងត្រូវប្រើសម្រាប់ដឹកសម្ភារបោះឆ្នោតទៅកាន់ ការិយាល័យបោះឆ្នោតមួយនៅក្នុងខេត្តមណ្ឌលគិរីនេះ បើតាមសេចក្តីប្រកាសព័ត៌មានរបស់គ.ជ.ប ។ សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោតនៅថ្ងៃទី២៥ កក្កដា បានឲ្យដឹងថា នៅការិយាល័យ០០៨៣…
រាជធានីភ្នំពេញ ៖ សត្វដំរីមួយក្បាលនឹងត្រូវប្រើសម្រាប់ដឹកសម្ភារបោះឆ្នោតទៅកាន់ ការិយាល័យបោះឆ្នោតមួយនៅក្នុងខេត្តមណ្ឌលគិរីនេះ បើតាមសេចក្តីប្រកាសព័ត៌មានរបស់គ.ជ.ប ។
សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោតនៅថ្ងៃទី២៥ កក្កដា បានឲ្យដឹងថា នៅការិយាល័យ០០៨៣ ស្ថិតនៅក្នុងខេត្តមណ្ឌល ត្រូវបានប្រើសត្វដំរីមួយក្បាលដឹកសម្ភារបោះឆ្នោត ។ ការប្រើដំរីដឹកនេះ គឺដូចធ្លាប់បានធ្វើពេលកន្លងមក ។ ការិយាល័យ០០៨៣ ដែលដំរីដឹកមានទីតាំងស្ថិតនៅភូមិឡៅរមៀត ឃុំក្រង់តេះ ស្រុកពេជ្រដា ខេត្តមណ្ឌលគិរី នៅព្រឹកថ្ងៃទី២៨ កក្កដាខាងមុខនេះ ។
បើតាមការអះអាងរបស់គ.ជ.ប ការប្រើដំរីដឹកសម្ភារនេះដោយសារការិយាល័យខាងលើនេះស្ថិតនៅក្នុងទីតាំងភូមិសាស្ត្រដ៏លំបាក ដោយត្រូវដំរីជាយានជំនិះ ដើម្បីឆ្លងកាត់អូរ ប្រឡាយ និងជាមធ្យោបាយតែមួយគត់ ដើម្បីអាចទៅដល់ទីតាំងនោះដែលមានអ្នកបោះឆ្នោតរស់នៅចំនួន១៣៣នាក់ ។
សូមជម្រាបថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ មានការិយាល័យ ២២,៩៦៧ ។ តាមបញ្ជីឈ្មោះចុងក្រោយរបស់ គ.ជ.ប ឆ្នាំ២០១៧ ពលរដ្ឋដែលមានសិទ្ធិទៅបោះឆ្នោតមានចំនួន៨,៣៨០,២១៧នាក់ ។ ការបោះឆ្នោតអាណត្តិទី៦ មានគណបក្សនយោបាយ២០ចូលរួមប្រកួតប្រជែងគ្នា ។
អាសនៈអាណត្តិទី៦ មាន១២៥ ត្រូវបានបែងចែកដូចខាងក្រោម មានទី១- មណ្ឌលខេត្តបន្ទាយមានជ័យ មាន ៦អាសនៈ ទី២ – មណ្ឌលខេត្តបាត់ដំបងមាន៨អាសនៈ ទី៣- មណ្ឌលខេត្តកំពង់ចាមមាន១០អាសនៈ ទី៤- មណ្ឌលខេត្តកំពង់ឆ្នាំងមាន៤អាសនៈ ទី៥- មណ្ឌលខេត្តកំពង់ស្ពឺមាន៦អាសនៈ ទី៦- មណ្ឌលខេត្តកំពង់ធំ មាន៦អាសនៈ ទី៧- មណ្ឌលខេត្តកំពតមាន៦អាសនៈ ទី៨- មណ្ឌលខេត្តកណ្តាលមាន១១អាសនៈ ទី៩- មណ្ឌលខេត្តកោះកុងមាន១អាសនៈ ទី១០- មណ្ឌលខេត្តក្រចេះមាន៣អាសនៈ ទី១១- មណ្ឌលខេត្តមណ្ឌលគិរីមាន១អាសនៈ ទី១២- មណ្ឌលរាជធានីភ្នំពេញមាន១២អាសនៈ ទី១៣- មណ្ឌលខេត្តព្រះវិហារមាន១អាសនៈ ទី១៤- មណ្ឌលខេត្តព្រៃវែងមាន១១អាសនៈ ទី១៥- មណ្ឌលខេត្តពោធិ៍សាត់មាន៤អាសនៈ ទី១៦ – មណ្ឌលខេត្តរតនគិរីមាន១អាសនៈ ទី១៧- មណ្ឌលខេត្តសៀមរាបមាន៦អាសនៈ ទី១៨- មណ្ឌលខេត្តព្រះសីហនុមាន ៣អាសនៈ ទី១៩- មណ្ឌលខេត្តស្ទឹងត្រែងមាន១អាសនៈ ទី២០- មណ្ឌលខេត្តស្វាយរៀង មាន៥អាសនៈ ទី២១- មណ្ឌលខេត្តតាកែវមាន៨អាសនៈ ទី២២- មណ្ឌលខេត្តកែបមាន១អាសនៈ ទី២៣- មណ្ឌលខេត្តប៉ៃលិនមាន១អាសនៈ ទី២៤- មណ្ឌលខេត្តឧត្តរមានជ័យមាន ១អាសនៈ ទី២៥- មណ្ឌលខេត្តត្បូងឃ្មុំមាន៨អាសនៈ ៕
ចែករំលែកព័តមាននេះ