រាជធានីភ្នំពេញ ៖ អាជ្ញាធររាជធានីភ្នំពេញកាលពីរសៀលថ្ងៃទី២៣ កក្កដា ២០១៨ បានបើកកិច្ចប្រជុំពិភាក្សាជាមួយកងកម្លាំងមានសមត្ថកិច្ចពាក់ព័ន្ធ ដើម្បីត្រៀមកម្លាំង និងដាក់ផែនការរក្សា និងការពារសន្តិសុខសណ្តាប់ធ្នាប់នៅថ្ងៃដង្ហែក្បួន បិទយុទ្ធនាការឃោសនាបោះឆ្នោតនៅថ្ងៃទី២៧ ខែកក្កដាឆាប់ៗនេះ ។
កិច្ចប្រជុំនេះធ្វើឡើងកាលនៅសាលារាជធានីភ្នំពេញក្រោមវត្តមានលោក ឃួង ស្រេង អភិបាលរាជធានីភ្នំពេញ លោក យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី លោក នាយឧត្តមសេនីយហ៊ុយ ពិសិដ្ឋ តំណាងក្រសួងការពារជាតិ តំណាងបញ្ជាការដ្ឋានកងអង្គរក្ស អាជ្ញាធរ កងកម្លាំងប្រដាប់អាវុធចំណុះឲ្យគណៈបញ្ជាការឯកភាពរាជធានីភ្នំពេញជាច្រើនរូបទៀត ។
មន្ត្រីរដ្ឋបាលរាជធានីភ្នំពេញបានឲ្យដឹងថា កិច្ចប្រជុំនេះក្នុងគោលបំណងពិភាក្សាលំអិតលើកិច្ចការពារសន្តិសុខ សណ្តាប់ធ្នាប់ជូនគណបក្សនយោបាយទាំងអស់ក្នុងការជួបជុំ និងដង្ហែក្បួនបិទយុទ្ធនាការឃោសនាបោះឆ្នោតជ្រើសតាំងតំណាងរាស្ដ្រនីតិកាលទី៦ នៅថ្ងៃទី២៧ ខែកក្កដា ឆ្នាំ២០១៨ខាងមុខនេះ ។ ដោយគណបក្សប្រជាជនក្រោមវត្តមានសម្តេចអគ្គមហាសេនាបតីតេជោហ៊ុន សែន ប្រធានគណបក្សប្រជាជនកម្ពុជាដឹកនាំដង្ហែក្បួនបិទយុទ្ធនាការឃោសនា បោះឆ្នោតនោះដែរ ។
គួររំលឹកថា រដ្ឋបាលរាជធានីភ្នំពេញ កាលពីថ្ងៃទី២៣ ខែកក្កដា កន្លងមកនេះបានសេចក្ដីជូនដំណឹងស្ដីពីការបញ្ចៀសចរាចរណ៍ជាបណ្ដោះអាសន្នក្នុងការដង្ហែក្បួនបិទយុទ្ធនាការឃោសនាបោះឆ្នោតជ្រើសតាំងតំណាងរាស្ដ្រនីតិកាលទី៦ របស់គណបក្សនយោបាយនេះផងដែរ ។ សេចក្តីជូនដំណឹងបានបញ្ជាក់ថា នៅថ្ងៃទី២៧ ខែកក្កដាខាងមុខនឹងមានគណបក្សនយោបាយជាច្រើនធ្វើការជួបជុំ និងដង្ហែក្បួនបិទយុទ្ធនាការឃោសនាបោះឆ្នោតនៅមជ្ឈមណ្ឌលសន្និបាត និងពិព័រណ៍កោះពេជ្រដោយមានការជួបជុំសមាជិករហូតដល់ប្រមាណ២៥០.០០០នាក់ និងនៅទីលានប្រជាធិបតេយ្យមានការជួបជុំសមាជិករហូតដល់ប្រមាណ២០.០០០នាក់ ព្រមទាំងមានការជួបជុំសមាជិកនៅតាមទីស្នាក់ការគណបក្សមួយចំនួនផងដែរ ។
បន្ទាប់ពីការជួបជុំបណ្ដាគណបក្សនយោបាយ រួចដង្ហែនឹងត្រូវធ្វើឡើងនៅតាមមហាវិថីកម្ពុជាក្រោម មហាវិថីសម្ដេចមុនីរ៉េត កំណាត់វិថីសម្ដេចសុធារស កំណាត់មហាវិថីម៉ៅសេទុង កំណាត់មហាវិថីព្រះមុនីវង្ស កំណាត់មហាវិថីព្រះសីហនុ តិរវិថីព្រះស៊ីសុវត្ថិ ផ្លូវជាតិលេខ៥ ផ្លូវជាតិលេខ៦ ផ្លូវជាតិលេខ១ ផ្លូវជាតិលេខ២ ផ្លូវមិត្តភាពភ្នំពេញ-ហាណូយ ផ្លូវណតប្រ៊ីត ផ្លូវចោមចៅ ផ្លូវលេខ២៧១ ផ្លូវលេខ៧០ និងផ្លូវសំខាន់ៗមួយចំនួនទៀត ក្នុងរាជធានីភ្នំពេញ ។ ដើម្បីធានាបរិយាកាសនៃការបិទយុទ្ធនាការឃោសនាបោះឆ្នោត មានភាពល្អប្រសើរ និងស្នើភាពគ្រប់គណបក្សនយោបាយ ពិសេសការដង្ហែក្បូនរបស់គណបក្សនយោបាយប្រព្រឹត្តទៅដោយរលូនរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបានការកកស្ទះចរាចរណ៍រដ្ឋបាលរាជធានីភ្នំពេញនឹងធ្វើការផ្អាកចរាចរណ៍ជាបណ្តោះអាសន្ន តាមទីតាំងជួបជុំមួយរយៈខ្លី និងបញ្ចៀសចរាចរណ៍តាមកន្លែងកកស្ទះមួយចំនួន ។
ដូចនេះសូមបងប្អូនប្រជាពលរដ្ឋដែលគ្រោងធ្វើដំណើរទៅកន្លែងជួបជុំ និងតាមមហាវិថី តិរវិថី និងផ្លូវសំខាន់ៗ មួយចំនួនខាងលើ មេត្តាបញ្ចៀសចរាចរណណ៍ជាបណ្តោះអាសន្ន បើសិនជាមិនចាំបាច់ពុំគួរធ្វើដំណើរឆ្លងកាត់តាមកន្លែងជួបជុំ និងផ្លូវដង្ហែរបស់គណបក្សទាំងនោះចាប់ពីម៉ោង៦ព្រឹករហូតដល់ក្បួនដង្ហែត្រូវបានបញ្ចប់ ៕
ចែករំលែកព័តមាននេះ