សារាចរឱ្យផ្អាកការលក់គ្រឿងស្រវឹង២ថ្ងៃ
- ភ្នំពេញ
រាជធានីភ្នំពេញ ៖ ក្រសួងទេសចរណ៍បានចេញសារាចរណែនាំមួយដល់ ម្ចាស់អាជីវកម្ម ភោជនីយដ្ឋាន អាហារដ្ឋានទេសចរណ៍ ខារ៉ាអូខេ ឌីស្កូតែក រង្គសាល បៀរហ្គាឌិន…
រាជធានីភ្នំពេញ ៖ ក្រសួងទេសចរណ៍បានចេញសារាចរណែនាំមួយដល់ ម្ចាស់អាជីវកម្ម ភោជនីយដ្ឋាន អាហារដ្ឋានទេសចរណ៍ ខារ៉ាអូខេ ឌីស្កូតែក រង្គសាល បៀរហ្គាឌិន និងសេវាកម្សាន្តទេសចរណ៍ទាំងអស់ នៅទូទាំងប្រទេស ត្រូវផ្អាកការលក់ដូរគ្រឿងស្រវឹងចំនួន២ថ្ងៃ ក្នុងនោះ រួមមាន១ថ្ងៃមុនការបោះឆ្នោត និងនៅថ្ងៃបោះឆ្នោតជ្រើសរើសតំណាងរាស្ត្រ នីតិកាលទី៦ នៃរដ្ឋសភា ពោលគឺក្រសួងមិនអនុញ្ញាតឱ្យលក់គ្រឿងស្រវឹង នៅថ្ងៃទី២៨ និងទី២៩ កក្កដា ឆ្នាំ២០១៨ នោះទេ ។
តាមសារចរណែនាំរបស់ក្រសួងទេសចរណ៍ នៅថ្ងៃទី២១ កក្កដា នេះ បានឱ្យដឹងថា ម្ចាស់ ឬអ្នកគ្រប់គ្រងអាជីវកម្មខារ៉ាអូខេ ឌីស្កូតែក រង្គសាល បៀរហ្គាឌិន និងសេវាកម្សាន្តទេសចរណ៍នានានៅទូទាំងរាជធានី-ខេត្ត ត្រូវផ្អាកសកម្មភាពអាជីវកម្មរយៈពេលមួយថ្ងៃមុនថ្ងៃបោះឆ្នោត និងថ្ងៃបោះឆ្នោត ចាប់ពីថ្ងៃទី២៨ និងទី២៩ កក្កដា ឆ្នាំ២០១៨។ ចំណែកឯអាជីវកម្មភោជនីយដ្ឋាន និងអាហារដ្ឋានទេសចរណ៍នានានៅទូទាំងរាជធានី-ខេត្ត អាចដំណើរការអាជីវកម្មរបស់ខ្លួនបាន ប៉ុន្តែត្រូវផ្អាកការលក់ដូរគ្រឿងស្រវឹងនៅក្នុងរយៈពេលពីរថ្ងៃនេះ។
ជាមួយគ្នានេះ ក្រសួងទេសចរណ៍ក៍បានឱ្យមន្ទីរទេសចរណ៍គ្រប់រាជធានី-ខេត្ត ត្រូវចុះផ្សព្វផ្សាយ និងអប់រំណែនាំដល់ម្ចាស់អាជីវកម្មទាំងអស់ឱ្យអនុវត្តតាមសារាចរណែនាំប្រកបដោយប្រសិទ្ធភាព និងការទទួលខុសត្រូវ ដើម្បីធ្វើឱ្យដំណើរការបោះឆ្នោតជ្រើសរើសតំណាងរាស្ត្រ នីតិកាលទី៦ នៃរដ្ឋសភា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ប្រព្រឹត្តទៅក្នុងបរិយាកាសនយោបាយល្អ សេរី ត្រឹមត្រូវ និងគ្មានអំពើហិង្សា។
ការណែនាំនេះ គឺអនុលោមទៅតាមច្បាប់ បទបញ្ជា និងនីតិវិធី នៃការបោះឆ្នោតជ្រើសរើសតំណាងរាស្ត្រ នីតិកាលទី៦ នៃរដ្ឋសភា ប្រកបដោយសេរី ត្រឹមត្រូវ និងយុត្តិធម៌ គ្មានអំពើហិង្សា គ្មានការគំរាមកំហែង គ្មានការបំភិតបំភ័យ និងចៀសវាងនូវបាតុភាពនានា ដែលអាចកើតមានឡើងដោយសារការពិសាគ្រឿងស្រវឹងនោះ ។
សូមរំឭកថា កាលពីថ្ងៃទី០៦ ខែកក្កដា កន្លងទៅ រាជរដ្ឋាភិបាលកម្ពុជា ក៏បានចេញសេចក្ដីណែនាំមួយដែរ ដោយមិនឲ្យមានការលក់ដូរ និងពិសាគ្រឿងស្រវឹង នៅថ្ងៃទី២៨ និងទី២៩ ខែកក្កដា ឆ្នាំ២០១៨ នោះឡើយ ដើម្បីរក្សាសន្តិសុខ សណ្តាប់ធ្នាប់ និងបញ្ចៀសអំពើហិង្សានានា នៅក្នុងថ្ងៃបោះឆ្នោតជ្រើសរើសតំណាងរាស្ត្រ នីតិកាលទី៦ នៃរដ្ឋសភា ដោយសារកន្លងទៅ រាជរដ្ឋាភិបាល បានសង្កេតឃើញថា ការពិសាគ្រឿងស្រវឹងភាគច្រើន អាចបង្កឲ្យមានអំពើហិង្សា គ្រោះថ្នាក់ចរាចរណ៍ គ្រោះថ្នាក់សង្គម ការប្រព្រឹត្តបទល្មើសនានា ឬករណីខ្លះ ដែលអាចបណ្តាលឱ្យបាត់បង់សណ្តាប់ធ្នាប់សាធារណៈថែមទៀតផង ៕
ចែករំលែកព័តមាននេះ