រាជធានីភ្នំពេញ ៖ គណៈកម្មការមូលប័ត្រកម្ពុជា បានសហការជាមួយក្រុមហ៊ុនមូលប័ត្រ OSK Investment Bank Berhard នៃប្រទេសម៉ាឡេស៊ី រៀបចំបើកសន្និសីទអន្តរជាតិស្តីពីកាលានុវត្តភាពសំរាប់ការវិនិយោគនៅកម្ពុជា កាលពីថ្ងៃទី១០ វិច្ឆិកា នៅសណ្ឋាគារអាំងទែរកុងទីណង់តាល់ ក្រោមអធិបតីភាពលោកបណ្ឌិត អូន ព័ន្ធមុនីរ័ត្ន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ។ លោកម៉ិញ បានកុសល អគ្គនាយកនៃគណៈកម្មការមូលប័ត្រកម្ពុជា បានថ្លែងថា សន្និសីទនេះប្រព្រឹត្តធ្វើឡើងរយៈពេលពីរថ្ងៃដោយមានអ្នកគ្រប់គ្រងក្រុមហ៊ុនហិរញ្ញវត្ថុមកពីបណ្តាប្រទេសនានាក្នុងតំបន់ដូចជា ម៉ាឡេស៊ី សិង្ហបុរី ឥណ្ឌូណេស៊ី និងវៀតណាមផងដែរ ។ សន្និសីទធ្វើឡើងដើម្បីឱ្យអ្នកចូលរួមទាំងអស់បានយល់ស៊ីជំរៅអំពីស្ថានភាពនៃការអភិវឌ្ឍន៍សេដ្ឋកិច្ចកម្ពុជា អំពីការអភិវឌ្ឍន៍ក្របខណ្ឌគតិយុត្តិ និងកាលានុវត្តភាពនៃការវិនិយោគក្នុងវិស័យសេដ្ឋកិច្ចរូបវន្ត និងក្នុងវិស័យហិរញ្ញវត្ថុ ។
លោកអូន ព័ន្ធមុនីរ័ត្ន បានថ្លែងថា សន្និសីទអន្តរជាតិនាថ្ងៃនេះ ជាកិច្ចផ្តួចផ្តើមដ៏មានសារសំខាន់ថ្មីមួយ ក្នុងការទាក់ទាញការវិនិយោគពីប្រទេសនានាក្នុងតំបន់ តាមរយៈការផ្តល់ឱកាសឱ្យអ្នកគ្រប់គ្រងក្រុមហ៊ុនវិនិយោគហិរញ្ញវត្ថុ (Fund Managers) បានជួបនិងពិភាក្សាការងារជាមួយក្រុមហ៊ុនកម្ពុជាដែលមានសក្តានុពលក្នុងការបោះផ្សាយលក់មូលបត្រជាសាធារណៈ ព្រមទាំងអនុញ្ញាតឱ្យអ្នកគ្រប់គ្រងក្រុមហ៊ុនវិនិយោគហិរញ្ញវត្ថុ បានស្វែងយល់ថែមទៀតផងដែរ អំពីដំណើរការអភិវឌ្ឍសេដ្ឋកិច្ចរបស់កម្ពុជា ការវិវឌ្ឍក្របខណ្ឌច្បាប់ និងបទប្បញ្ញត្តិពាក់ព័ន្ធ និន្នាការ និងកាលានុវត្តភាពវិនិយោគផ្សេងៗ គួបផ្សំជាមួយវិស័យហិរញ្ញវត្ថុដែលក្នុងនោះទីផ្សារមូលប័ត្រកំពុងតែអភិវឌ្ឍន៍ និងបោះជំហានទៅមុខគួរឱ្យកត់សំគាល់ ។ វិបត្តិហិរញ្ញវត្ថុពិភពលោកថ្មីៗអនុញ្ញាតឱ្យយើងបានរៀនសូត្រជាច្រើនអំពីបទពិសោធន៍ក្នុងការគ្រប់គ្រងទីផ្សារពេលមានវិបត្តិ ភាពស្មុគ្រស្មាញនៃហានិភ័យជាប្រព័ន្ធ ភាពសាំញាំុនៃឧបករណ៍ហិរញ្ញវត្ថុ ភាពខ្វះចន្លោះក្នុងការត្រួតពិនិត្យ និងចំណាត់ការឱ្យទាន់ពេលវេលា ដែលទាំងនេះសុទ្ធតែកើតឡើងដោយសារភាពចន្លោះប្រហោងនៃបទដ្ឋានគតិយុត្តិក្នុងវិស័យមូលប័ត្រ ។ បទពិសោធន៍ទាំងនេះ រួមជាមួយនឹងនិន្នាការនៃការវិវត្តថ្មីក្រោយពេលមានវិបត្តិ នឹងអនុញ្ញាតឱ្យយើងយកមកពិនិត្យ និងពិចារណាធ្វើជាធាតុចូលក្នុងការរៀបចំបទប្បញ្ញត្តិ ក្នុងគោលបំណងកាត់បន្ថយនូវហានិភ័យនានានៅពេលអនាគត ។
លោករដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានបន្តថា វត្តមានទីផ្សារមូលប័ត្រកម្ពុជានាពេលខាងមុខ មិនត្រឹមតែបំពេញបន្ថែមឱ្យប្រព័ន្ធហិរញ្ញវត្ថុដែលមានស្រាប់ប៉ុណ្ណោះទេ ថែមទាំងផ្តល់នូវវិសាលភាពវិជ្ជមានទូលំទូលាយ និងកាលានុវត្តភាពវិនិយោគជាច្រើនដល់វិស័យឯកជន ជាតិនិងអន្តរជាតិ ។ ជាការពិតណាស់ការអភិវឌ្ឍន៍សេដ្ឋកិច្ចកម្ពុជា និយាយជារួម និងការអភិវឌ្ឍន៍វិស័យហិរញ្ញវត្ថុនិយាយដោយឡែក រួមទាំងទីផ្សារមូលប័ត្រផងដែរនោះ អាចប្រព្រឹត្តទៅដោយជោគជ័យ គឺចាំបាច់ត្រូវមានការចូលរួមយ៉ាងសកម្មដោយខានមិនបានពីវិស័យឯកជន ជាតិ និងអន្តរជាតិ ដែលនេះជាតួអង្គគន្លឹះក្នុងយន្តការទីផ្សារ ។ ក្រុមហ៊ុនវិនិយោគហិរញ្ញវត្ថុ គឺជាតួអង្គមួយដ៏សំខាន់ក្នុងយន្តការទីផ្សារមូលប័ត្រ ហើយវត្តមានរបស់ក្រុមហ៊ុនវិនិយោគហិរញ្ញវត្ថុក្នុងសន្និសីទនាថ្ងៃនេះ បង្ហាញនូវកិច្ចចាប់ផ្តើមដ៏សំខាន់មួយរវាងវិនិយោគិនមូលប័ត្រដែលជាវិនិយោគិនស្ថាប័ន (Institutional Investor) និងអនាគតក្រុមហ៊ុនបោះផ្សាយលក់មូលប័ត្រ (Issuer) ដែលនេះជាសញ្ញាវិជ្ជមាន ៕
ចែករំលែកព័តមាននេះ