សហរដ្ឋអាមេរិក និងរុស្ស៊ី ៖ មនុស្សប្រមាណ២៥០០នាក់ បាននាំគ្នាដើរហែក្បួនបាតុកម្មកាលពីថ្ងៃទី១៥ ខែកក្កដា ឆ្នាំ២០១៨ តាមដងវិថីនានានៃទីក្រុងហែលស៊ីនគី ប្រឆាំងប្រធានាធិបតីអាមេរិកលោកដូណាល់ ត្រាំ…
សហរដ្ឋអាមេរិក និងរុស្ស៊ី ៖ មនុស្សប្រមាណ២៥០០នាក់ បាននាំគ្នាដើរហែក្បួនបាតុកម្មកាលពីថ្ងៃទី១៥ ខែកក្កដា ឆ្នាំ២០១៨ តាមដងវិថីនានានៃទីក្រុងហែលស៊ីនគី ប្រឆាំងប្រធានាធិបតីអាមេរិកលោកដូណាល់ ត្រាំ និងប្រធានាធិបតីរុស្ស៊ី លោកវ្ល៉ាឌីមៀរ ពូទីន មុនការជួបគ្នាកំពូលរបស់មេដឹកនាំទាំង២នៅរដ្ឋធានីហ្វាំងឡង់។
ពួកបាតុករបានលើកប្រង់កាតនានាដែលសរសេរថា ចូរបង្កើតសន្តិភាពមិនមែនសង្គ្រាម ពួកជនភៀសខ្លួនត្រូវតែស្វាគមន៍ ហើយក៏មានពាក្យស្លោកឯទៀតៗទាមទារឲ្យមានការគោរពសិទ្ធិមនុស្ស និងការពារបរិស្ថានផងដែរ។ កាលពីថ្ងៃទី១៣ កក្កដា មានមនុស្សច្រើនពាន់នាក់ធ្វើបាតុកម្មប្រឆាំងលោកត្រាំ នៅទីក្រុងឡុងដ៏។ មនុស្សច្រើនពាន់នាក់ លើកគ្នាធ្វើបាតុកម្មប្រឆាំងលោកត្រាំ នាថ្ងៃទី១៤ កក្កដា នៅតំបន់អេកូស ជាកន្លែងលោកសម្រាកចុងសប្ដាហ៍លេងកូនគោល។
លោកត្រាំ និងលោកពូទីនចរចាគ្នានាវេលារសៀលថ្ងៃទី១៦ កក្កដា នៅក្រុងហែលស៊ីនគី ក្នុងក្ដីសង្ឃឹមភ្ជាប់ទំនាក់ទំនងផ្ទាល់ខ្លួន។ ការជួបពិភាក្សាគ្នានឹងផ្ដោតចាប់ពីបញ្ហាស៊ីរីដល់បញ្ហាគ្រីមេ ខណៈពួកអ្នកការទូត និងពួកអ្នកវិភាគសង្ស័យថា លោកត្រាំនឹងពុំផ្ដល់សម្បទាននានាដល់បុរសខ្លាំងនៃវិមានក្រឹមឡាំងឡើយ។
ប្រធានាធិបតីអាមេរិក តាមទួរទស្សន៍ CBS ថ្លែងថា នោះជារឿងល្អមួយដែលយើងជួបគ្នា ហើយខ្ញុំជឿចំពោះការជួបគ្នាទាំងឡាយ។ ទោះបីយ៉ាងណាលោកថា អាចទទួលបានលទ្ធផលមានកម្រិត។
ចំណែកលោកពូទីននៅពុំទាន់បង្ហើបពីបណ្ដាទិសដៅ និងយុទ្ធសាស្ត្ររបស់លោកនៅឡើយ។ លោកយូរីអ៊ូ សាកូវ ទីប្រឹក្សារបស់លោកគ្រាន់តែនិយាយថា ស្ថានភាពនៃទំនាក់ទំនងទ្វេរភាគីអាក្រក់ខ្លាំងណាស់។ បញ្ហាស៊ីរី ជាបញ្ហាសំខាន់នៃការពិភាក្សាគ្នា។
មេដឹកនាំទាំង២ជួបគ្នានាវេលារសៀលនៅវិមានប្រធានាធិបតីកណ្ដាលក្រុងហែលស៊ីនគី។ ការជួបទល់មុខគ្នា មានតែអ្នកបកប្រែម្នាក់ដូចគ្នា មានពិធីអាហារថ្ងៃត្រង់ការងាររវាងសមាជិកគណៈប្រតិភូទាំងសងខាង ហើយចុងក្រោយមានសន្និសីទសារព័ត៌មានរួមមួយ៕
ចែករំលែកព័តមាននេះ