រាជធានីភ្នំពេញ ៖ តារាចម្រៀងលោក វង្ស ថាណាន់ និងកញ្ញា គង់ កែវមរកត ជាអ្នកចម្រៀងដែលប្រាស្រ័យការងារជាមួយគ្នាក្នុងកន្លែងច្រៀងតាមហាង។ ក្រោយពេលអ្នកទាំង២ដឹកដៃគ្នាជាគូចម្រៀងតាមស្ថានីយ៍ទូរទស្សន៍មួយចំនួនមកបានធ្វើឱ្យមានការចាប់អារម្មណ៍ ដោយម្នាក់ៗយល់ថា ពិតជាមានលក្ខណៈពិសេសខុសពីមិត្តភាព។
ឆ្លើយតបនឹងការយល់ឃើញនេះ តារាចម្រៀងសំឡេងធ្ងន់លោក វង្ស ថាណាន់ បានលាងមន្ទិលនេះថា មានការជជីកសួរនាំច្រើនតែម្តង តាំងពីមិត្តក្នុងហ្វេសប៊ុក និងខាងក្រៅហ្វេសប៊ុករវាងការភ្ជាប់ទំនាក់ទំនងគ្នារវាងលោក និងតារាចម្រៀងស្រស់សោភា គង់ កែវមរកត។
លោកបន្តថា ចំណុចនេះមកពីលោក និងមរកត ច្រៀងជាមួយគ្នារាល់យប់ ហើយស្និតស្នាលគ្នាដូចបង ដូចប្អូន មានអនុស្សាវរីយ៍ច្រើនជាងគេ ណាមួយព្រោះតែម្នាក់ៗមានចំណុចទាក់ទាញដូចគ្នា ទើបសម្រេចគិតគូថា នឹងចាប់ដៃគូច្រៀងសម្តែងនៅលើឆាកតន្ត្រីឱ្យកាន់តែច្រើនឡើងៗក្នុងមួយរយៈនេះ តាមបណ្តាទូរទស្សន៍ដែលពួកយើងឡើងច្រៀង គឺសុទ្ធតែពេញចិត្តចំពោះការចាប់ដៃគូគ្នានេះដែរ។
លោកបន្តទៀតថា បើទោះ ទៅថ្ងៃក្រោយមានសភាពបែបណា គឺមិនទាន់ហ៊ាននិយាយជាដាច់ខាត ព្រោះអ្វីៗស្មានមិនដល់។ លោកគ្រាន់តែយល់ថា គង់ កែវមរកត គឺជាមនុស្សស្រីដែលចេះអត់ធ្មត់ចំពោះការងារច្រៀងយប់ព្រលប់ មិនរអ៊ូត្អូញត្អែរចិញ្ចឹមក្រុមគ្រួសារឱ្យរស់បានដូចគេឯងនេះ ជាចំណុចដែលលោកសរសើរចំពោះវីរភាពមនុស្សស្រីដូចជានាង។
អ្នកទាំង២ដួងនេះ ជាអតីតបេក្ខជនខេមបូឌាអាយឌល រដូលកាលទី៣ ដោយមានចំណុចល្អរៀងខ្លួន វង្ស ថាណាន់ ត្រូវចាកចេញមុនវគ្គផ្សាយផ្ទាល់ ដោយមរកត ឆ្លងវគ្គផ្សាយផ្ទាល់បាន៦សប្តាហ៍ ហើយអ្នកណាក៏សរសើរនាងច្រៀងពីរោះរណ្តំ។
ចែករំលែកព័តមាននេះ