ខេត្តកណ្តាល ៖ តាមសេចក្តីរាយការណ៍ពីប្រជាពលរដ្ឋរស់នៅតាមដងទន្លេមេគង្គ ក្នុងស្រុកល្វាឯម ស្រុកកៀនស្វាយ និងស្រុកលើកដែក បានឱ្យដឹងថា នៅរដូវបិទនេសាទត្រីពងកូននេះ ទូកអូសម៉ាញ់ និងអូសយ៉ាំងកាវរបស់ជនជាតិវៀតណាមជាច្រើនគ្រឿង នៅតែបន្តសកម្មភាពអូសជារៀងរាល់យប់ដោយគ្មានខ្លាចញញើតច្បាប់បន្តិចណាឡើយ ។
សកម្មភាពនេះ ធ្វើឱ្យពួកគាត់មានការសង្ស័យទៅលើក្រុមមន្ត្រីអសកម្មមួយចំនួនជាអ្នកបើកភ្លើងខៀវនៅពីខាងក្រោយខ្នង ទើបគ្មានការទប់ស្កាត់ ឬបង្ក្រាបម្តងណាឡើយ តាំងពីរដូវបើករហូតដល់រដូវបិទនេសាទ ។ ទូកអូសម៉ាញ់និងអូសយ៉ាំងកាវរបស់ជនជាតិវៀតណាមទាំងនោះគឺធំៗប្រើសុទ្ធតែម៉ាស៊ីនរថយន្ត ហើយច្រើនតែធ្វើសកម្មភាពពេលយប់ ឯនៅពេលថ្ងៃពួកគេចតទូកសម្ងំស្ងៀមដេកយកកម្លាំង ។
ប្រភពព័ត៌មានបន្តទៀតថា ទូកអូសម៉ាញ់ និងអូសយ៉ាំងកាវទាំងនោះ ចេញពីភូមិវៀតណាមនៅតាមជួរមាត់ទន្លេមេគង្គ ដូចជាម្តុំវត្តចំប៉ា សង្កាត់ក្បាលកោះ ខណ្ឌច្បារអំពៅ ឃុំថ្មគរ ស្រុកល្វាឯម ឃុំដីឥដ្ឋ និងឃុំសំរោងធំ ស្រុកកៀនស្វាយ ព្រមទាំងឃុំព្រែកដាច់ ស្រុកលើកដែក ។ ពួកគាត់មានការសង្ស័យទៀតថា អាចមានការបង្កប់ប្រើឧបករណ៍ឆក់ដុំត្រជាក់ថែមទៀត ។
មហាជនជាច្រើនបានសំណូមពរឱ្យអាជ្ញាធរនិងមន្ត្រីមានសមត្ថកិច្ច ជាពិសេសមន្ត្រីជលផលដល់រដូវបិទនេសាទត្រីពងកូនហើយ សូមជួយទប់ស្កាត់ឬបង្ក្រាបផង ដើម្បីរក្សាធនធានមច្ឆជាតិឱ្យបានគង់វង្សយូរអង្វែង ។
ពាក់ព័ន្ធនឹងបញ្ហាខាងលើនេះ លោក វ៉ិត ធារិទ្ធ នាយខណ្ឌរដ្ឋបាលជលផលកណ្តាលបានឱ្យតាមទូរស័ព្ទថា បើមានសកម្មភាពបែបនេះមែន មិនបាច់ចាំដល់រដូវបិទនេសាទត្រីពងកូនទេ គឺវាខុសច្បាប់ទាំងស្រុង ។ ដូច្នេះ លោកសូមអរគុណដល់អ្នកសារព័ត៌មានដែលបានផ្តល់ដំណឹង ហើយលោកនឹងចាត់ឱ្យក្រុមមន្ត្រីជំនាញចុះស្រាវជ្រាវពីរឿងនេះ៕
ចែករំលែកព័តមាននេះ