រាជធានីភ្នំពេញ ៖ បុរសម្នាក់មានវិបត្តិផ្លូវចិត្ត បន្ទាប់ពីរូបគាត់ប្រើប្រាស់គ្រឿងញៀន និងរករឿងប្រពន្ធញឹកញាប់ពេក ធ្វើឲ្យប្រពន្ធអស់និស្ស័យ រស់នៅជាមួយតទៅទៀតលែងកើត ក៏សម្រេចចិត្តរត់ចោលតែម្ដង ។ ដោយសារតែប្រពន្ធរត់ចោល…
រាជធានីភ្នំពេញ ៖ បុរសម្នាក់មានវិបត្តិផ្លូវចិត្ត បន្ទាប់ពីរូបគាត់ប្រើប្រាស់គ្រឿងញៀន និងរករឿងប្រពន្ធញឹកញាប់ពេក ធ្វើឲ្យប្រពន្ធអស់និស្ស័យ រស់នៅជាមួយតទៅទៀតលែងកើត ក៏សម្រេចចិត្តរត់ចោលតែម្ដង ។ ដោយសារតែប្រពន្ធរត់ចោល ធ្វើឲ្យបុរសនេះខូចចិត្តយ៉ាងខ្លាំង រហូតគិតខ្លីលែងចង់រស់នៅតទៅទៀត ក៏សម្រេចចិត្តធ្វើអត្តឃាត ដោយយកប្រេងសាំងចាក់ស្រោចខ្លួនរួចដុតខ្លួនឯង ។
ប៉ុន្តែមិនបានបណ្ដាលឲ្យស្លាប់បាត់បង់ជីវិតឡើយ ព្រោះត្រូវបានអ្នកនៅជិតនោះជួយពន្លត់ទាន់ និងទាក់ទងហៅរថយន្តសង្គ្រោះអង្គភាព៧១១ ដឹកយកទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ភ្លាមៗដែរ ។ហេតុការណ៍នេះ កើតឡើងកាលពីវេលាម៉ោង៥និង៤៥នាទីល្ងាចថ្ងៃទី៨ ខែកក្កដា នៅខាងក្រោយសាលាបឋមសិក្សាជម្ពូវ័ន ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា បុរសដែលព្យាយាមដុតសម្លាប់ខ្លួននេះឈ្មោះ ព្រំ ដាវិន អាយុុ៣៥ឆ្នាំ មានទីលំនៅក្នុងភូមិ សង្កាត់ខាងលើ ។ ទោះបីមិនស្លាប់តែបានរងរបួសធ្ងន់ណាស់ទៅហើយ ដែលមិនដឹងអាចសង្គ្រោះបានឬបែបណាទេព្រោះថា សម្រាប់អ្នកឆេះខ្លួនចាប់ពី៧០%ឡើងទៅសង្ឃឹមរស់តិចណាស់ ។
តាមអ្នកឃើញហេតុការណ៍និយាយថា មុនពេលកើតហេតុគេឃើញបុរសនេះយកសាំងមកចាក់ស្រោចខ្លួន បន្ទាប់មកស្រាប់តែយកដែកកេះឆួលដុតខ្លួនបណ្ដាលឲ្យឆាបឆេះយ៉ាងសន្ធោសន្ធៅតែម្ដង ។ខណៈនោះអ្នកជិតខាងមានការភ្ញាក់ផ្អើលយ៉ាងខ្លាំង ហើយនាំគ្នាជួយពន្លត់រហូតរលត់ទៅវិញ និងបានទាក់ទងហៅរថយន្តសង្គ្រោះអង្គភាព៧១១ ទៅដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ។
តាមព័ត៌មានថា ការដែលបុរសនេះព្យាយាមធ្វើអត្តឃាតដោយដុតសម្លាប់ខ្លួនបែបនេះ ក៏ព្រោះតែគាត់ពិបាកចិត្តដោយសារប្រពន្ធរត់ចោល ។ ម្យ៉ាងទៀត រឿងដែលប្រពន្ធរត់ចោលនោះ ក៏ព្រោះតែអស់និស្ស័យរស់នៅជាមួយ ដោយសារគាត់ប្រើប្រាស់គ្រឿងញៀន ហើយតែងតែរករឿងប្រពន្ធញឹកញាប់ពេក ។ ពេលនេះមិនទាន់ដឹងថា តើបុរសខាងលើអាចគេចផុតពីសេចក្ដីស្លាប់ឬអត់នោះទេ ព្រោះស្ថានភាពរបួសធ្ងន់ណាស់ ហើយក្រុមគ្រូពេទ្យកំពុងជួយសង្គ្រោះបន្ទាន់ ។
ទោះបីជាបែបណា ក៏សូមជូនពរឲ្យគាត់រួចផុតពីគ្រោះថ្នាក់ដល់ជីវិតទៅចុះ ៕
ចែករំលែកព័តមាននេះ