រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានអនុញ្ញាតឲ្យអ្នកសង្កេតការជាតិជាង៦ម៉ឺននាក់មកពី១០១ អង្គការសមាគម និងអង្គការអន្តរជាតិសរុបច៣៧នាក់ ចំនួន៩អង្គការប្រទេសក្នុងចូលរួមសង្កេតការបោះឆ្នោតជ្រើសតាំងអ្នកតំណាងរាស្ត្រនីតិកាលទី៦ អាណត្តិទី៦ដែលនឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។ នេះបើតាមការឲ្យដឹងរបស់អ្នកនាំពាក្យ គ.ជ.ប ។
លោកឌឹម សុវណ្ណារុំ អ្នកនាំពាក្យគណៈកម្មាធិការជាតិរៀបចំការបោះឆ្នោតបានប្រាប់កោះសន្តិភាពដឹងនៅថ្ងៃទី០៨ ខែកក្កដា ឆ្នាំ២០១៨ ថា គិតមកដល់ថ្ងៃទី០៧ ខែកក្កដានេះ ចំនួនអ្នកសង្កេតការណ៍ជាតិ និងអន្តរជាតិនៃសមាគមអង្គការមិនមែនរដ្ឋាភិបាលមានទី១- អ្នកសង្កេតការណ៍ជាតិមានចំនួន១០១អង្គការ -សមាគមដែលមានអ្នកសង្កេតការណ៍ជាតិសរុបចំនួន ៦៥,៧៤៤នាក់ ស្រី៣៦,៥៤៣នាក់ ក្នុងនោះមានអ្នកសង្កេតការណ៍ចល័តសរុបចំនួន៦៧នាក់ស្រី១៥នាក់ ។
គ.ជ.ប កំពុងពិនិត្យ៩អង្គការ- សមាគមដែលមានអ្នកសង្កេតការជាតិសរុបចំនួន៤,៥២៥នាក់ ស្រី២,១៩១នាក់ ក្នុងនោះមានអ្នកសង្កេតការណ៍ជាតិចល័តសរុបចំនួន១០នាក់ ស្រីម្នាក់ ។ ទី២- អ្នកសង្កេតការណ៍អន្តរជាតិចំនួន៩អង្គការ-ប្រទេសត្រូវបានគ.ជ.ប អនុញ្ញមានចំនួនសរុបចំនួន៣៧នាក់ ស្រី៩នាក់ និងកំពុងពិនិត្យ២អង្គការ-ប្រទេសដែលមានអុ្នកសង្កេតការណ៍អន្តរជាតិសរុបចំនួន១១នាក់ ស្រី៦នាក់ ។ យ៉ាងណាក្តីអ្នកនាំពាក្យ គ.ជ.ប មិនឲ្យដឹងពីអ្នកសង្កេតការណ៍អន្តរជាតិមកពីប្រទេសណានោះទេ ប៉ុន្តែបើតាម គ.ជ.ប បានធ្លាប់បានឲ្យដឹងពេលកន្លងមកថា អ្នកសង្កេតការណ៍អន្តរជាតិមកពីប្រទេសចិន មីយ៉ាន់ម៉ា និងសិង្ហបុរីជាដើម ។
សូមជម្រាបថា ចំនួនអ្នកសង្កេតការណ៍ជាតិ និងអន្តរជាតិខាងលើដែលត្រូវបាន គ.ជ.ប អនុញ្ញាត និងកំពុងពិនិត្យ ដើម្បីចូលរួមសង្កេតការណ៍បោះឆ្នោតជ្រើសតាំងអ្នកតំណាងរាស្ត្រនីតិកាលទី៦ នៃរដ្ឋសភា ដោយមានគណបក្សនយោបាយចំនួន២០ចូលរួមប្រកួតប្រជែងគ្នា ដើម្បីសម្លេងគាំទ្រពីម្ចាស់ឆ្នោត ។
គិតមកត្រឹមថ្ងៃទី០៨ កក្កដា គឺជាថ្ងៃទី២ហើយនៃថ្ងៃឃោសនាបោះឆ្នោតរបស់គណបក្សនយោបាយទាំង២០ ខណៈការបោះឆ្នោតមានចំនួន២១ថ្ងៃ គឺចាប់ពីថ្ងៃទី០៧ កក្កដា ដល់ថ្ងៃទី២៧ ខែកក្កដា ឆ្នាំ២០១៨ ។ការឃោសនាបោះឆ្នោតនៅថ្ងៃដំបូងគេសង្កេតឃើញថា មានតែគណបក្សប្រជាជនកម្ពុជាតែប៉ុណ្ណោះ ធ្វើយុទ្ធនាការដោយមានសមាជិកសមាជិការគណបក្សចូលរួមមានចំនួនច្រើន នៅទូទាំងរាជធានី ៕
ចែករំលែកព័តមាននេះ