រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា ការ មានអ្នកចូលរួមសង្កតការណ៍ជាតិ ឬមិនចូលរួមជារឿងបន្ទាប់សន្សំសំខាន់មានអ្នកសង្កេតការណ៍មកពីប្រទេសនេះប្រទេសនោះ នោះការបោះឆ្នោតទទួលយកជាការបានការហើយ ។
ការលើកឡើងរបស់អ្នកនាំពាក្យគណបក្សប្រជាជនកម្ពុជានេះដោយសារតែលោកថា រាល់ការបោះឆ្នោតម្តងៗទោះបីជាមានអ្នកសង្កេតការណ៍ជាអន្តរជាតិចូលរួមការបោះឆ្នោតក្តីក៏អតីតបក្សប្រឆាំងនៅតែមិនទទួលស្គាល់លទ្ធផលបោះឆ្នោតផងដែរ ។ ជាងនេះខណៈពេលដែលគណៈកម្មាធិការជាតិរៀបចំការបោះឆ្នោតបានប្រកាសទទួលស្គាល់អ្នកសង្កេតការណ៍ជាតិ និងអន្តរជាតិមកពីប្រទេសចិន មីយ៉ាន់ម៉ា និងសិង្ហបុរី សរុបចំនួន៥ម៉ឺននាក់ ។
លោកសុខ ឥសានបានឲ្យដឹងនៅថ្ងៃទី០៨ កក្កដា ឆ្នាំ២០១៨ យ៉ាងដូច្នេះថា ជាការកត់សម្គាល់ នៅរៀងរាល់លើកនៃការបោះឆ្នោតចាប់ពីឆ្នាំ១៩៩៨ មកទោះបីមានអ្នកសង្កេតការណ៍ជាតិ និងអន្តរជាតិរាប់ម៉ឺននាក់ចូលរួមសង្កេតការណ៍ហើយវាយតម្លៃល្អយ៉ាងណាក៏អតីតបក្សប្រឆាំង ដឹកនាំដោយលោកសម រង្សីនៅតែមិនយកជាបានការដដែល ហើយដឹកនាំធ្វើបាតុកម្មតូចធំប្រឆាំងលទ្ធផលបោះឆ្នោតជានិច្ច ។ លោកបញ្ជាក់ថា«ជាក់ស្តែងនៅក្នុងការបោះឆ្នោតឆ្នាំ១៩៩៨ ដែលសហគមន៍អឺរ៉ុបបានវាយតម្លៃថា ជាអច្ឆរិយតាមដងទន្លេមេគង្គក៏ទណ្ឌិតសម រង្សី នៅតែប្រកាសមិនទទួលស្គាល់ការបោះឆ្នោតនោះដែរ ហើយថែមទាំងដឹកនាំធ្វើបាតុកម្មរហូតដល់មានស្លាប់មនុស្សទៀតផង ។
បើទណ្ឌិតលោកសម រង្សី យកការសង្កេតការណ៍បានការហេតុអីបានជាមិនអើពើនឹងការវាយតម្លៃរបស់អ្នកសង្កេតការណ៍ជាតិ អន្តរជាតិរាប់ម៉ឺននាក់ ? នៅការបោះឆ្នោតឆ្នាំ២០០៣ ២០០៨ និងជាពិសេសឆ្នាំ២០១៣ ដែលមានអ្នកសង្កេតការណ៍ជាង១០ម៉ឺននាក់ចូលរួមសង្កេតការណ៍តែសម រង្សី និងបក្សពួកនៅតែឡាំប៉ាដដែល នៅពេលដឹងថា ខ្លួនចាញ់ឆ្នោត » ។
លោកសុខឥសានក៏បានលើកឡើងថា តើការសង្កេតការណ៍មានសារសំខាន់ស្អីទៅសម្រាប់ពួកប្រឆាំង ? តាមការពិតពួកប្រឆាំងយកការសង្កេតការណ៍បោះឆ្នោតគ្រាន់តែជារបាំងសម្រាប់ផលចំណេញដល់ខ្លួនប៉ុណ្ណោះ ។ តែបើខ្លួនចាញ់ខ្លួននៅតែមិនអើពើនឹងការវាយតម្លៃរបស់អ្នកសង្កេតការណ៍ដដែល ។ ឥឡូវនេះ នៅក្នុងការបោះឆ្នោតឆ្នាំ២០១៨ នេះ ពួកគេបានឲ្យតម្លៃទៅលើការសង្កេតការណ៍ណាស់ ហើយបាននិយាយទុកជាមុនថា បើអត់អ្នកសង្កេតការណ៍ពីបណ្តាប្រទេសលោកសេរី គេថាការបោះឆ្នោតមិនបានការ ។
សូមជម្រាបថា ការលើកឡើងរបស់អ្នកនាំពាក្យគណបក្សប្រជាជនកម្ពុជានេះ ខណៈដែលគណៈកម្មាធិការជាតិរៀបចំការបោះឆ្នោតបានទទួលស្គាល់ទាំងអ្នកសង្កេតការណ៍ជាតិ និងអន្តរជាតិមានចំនួន៥ម៉ឺននាក់ គិតត្រឹមថ្ងៃទី១៦ មិថុនា ឆ្នាំ២០១៨ កន្លងមក ៕
ចែករំលែកព័តមាននេះ