លោកសុខ ឥសានចំអកលោកសម រង្ស៊ី ថាប្រជាជនកម្ពុជាមិនព្រមផ្លាស់ប្តូរតាមទេ
- ភ្នំពេញ
រាជធានីភ្នំពេញ ៖ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានថា ទៅកាន់លោក សម រង្ស៊ីថា ប្រជាជនមិនព្រមផ្លាស់ប្តូរតាមញុះញង់នោះទេ ។…
រាជធានីភ្នំពេញ ៖ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានថា ទៅកាន់លោក សម រង្ស៊ីថា ប្រជាជនមិនព្រមផ្លាស់ប្តូរតាមញុះញង់នោះទេ ។ ការលើកឡើងនេះ បន្ទាប់ពីលោកសម រង្ស៊ីបានញុះញង់មិនឲ្យប្រជាពលរដ្ឋទៅបោះឆ្នោតនៅពេលខាងមុខនេះ និងថា គណបក្សនយោបាយចំនូន១៩ជាគណបក្សអំពិលអំពែក និងគណ បក្សអាប ។
លោក សុខ ឥសានាបានឲ្យដឹងតាមប្រព័ន្ធតេឡេក្រាមនៅថ្ងៃទី០៨ កក្កដានេះក៏ដូចជា សារតប និងលោក សម រង្ស៊ី យ៉ាងដូច្នេះថា ក្រោយពីបានឆ្លងកាត់ប្រវត្តិសាស្ត្រដ៏ឈឺចាប់ខ្លោចផ្សាររកទីបំផុតគ្មាន រហូតមកដល់បច្ចុប្បន្ននេះមានការរីកចម្រើនលើគ្រប់វិស័យហួសពីការស្មានប្រជាជនកម្ពុជាដ៏ច្រើនលើសលុបសុទ្ធតែទទួលបាននូវមនុញ្ញផលនៅក្នុងជីវភាពរស់នៅប្រកបដោយភាពសម្បូររុងរឿងមានសុភមង្គលក្នុងក្រុមគ្រួសារ និងនៅក្នុងសង្គមជាតិដែលគ្របដណ្តបដោយសន្តិភាព ស្ថិរភាពនយោបាយសន្តិសុខ សណ្តាប់ធ្នាប់សាធារណៈសង្គម បងប្អូនបានមើលឃើញជាក់ ស្តែងនូវស្នាដៃដ៏ឈ្លាសវៃរបស់ថ្នាក់ដឹកនាំគណបក្សប្រជាជនកម្ពុជា ជាពិសេសសម្តេចតេជោ ហ៊ុន សែន ដែលបានលះបង់សព្វបែបយ៉ាង ដើម្បីបុព្វហេតុជាតិមាតុភូមិ និងប្រជាជន ។ លោកថា៖«គ្មានទេការផ្លាស់ប្តូរ ឬការស្រមើស្រមៃទៅរកគណបក្សផ្សេងដែលមិនមានកម្មវិធីនយោបាយគួរឲ្យទុកចិត្ត និងគ្មានភ័ស្តុតាងបញ្ជាក់នោះឡើយ » ។
យ៉ាងណាក្តីការលើកឡើងរបស់លោកសុខ ឥសានបន្ទាប់ពីលោកសម រង្ស៊ីបានហៅគណបក្សលេខរៀងទី២០ គឺជាគណបក្សលក់ជាតិ បំផ្លាញជាតិ និងក្បត់ជាតិ ។ គណបក្សលេខរៀងពីទី ១ដល់ទី១៩ គឺជាគណបក្សអាប(មានតែក្បាលអត់ខ្លួន) ឬគណបក្សអំពិលអំពែក(កើតចេញមកព្រោងព្រាត ពេលរដូវបោះឆ្នោតម្តងៗតែរលត់បាត់ទៅវិញអស់ក្រោយថ្ងៃបោះឆ្នោត)គណបក្សទាំង១៩នោះ គ្រាន់តែជាគណបក្សមកបង្គ្រប់កិច្ចប៉ុណ្ណោះ ឲ្យគណបក្សប្រជាជនកម្ពុជា ដែលជាអ្នករៀបចំការបោះឆ្នោតក្លែងក្លាយថ្ងៃទី២៩ កក្កដា ២០១៨ នេះ ។
លោកក៏បានលើកឡើងថា ការបោះឆ្នោតនេះជាឆាកល្ខោន ដើម្បីកម្ចាត់គណបក្សសង្គ្រោះជាតិ សម្លាប់លទ្ធិប្រជាធិបតេយ្យ និងប្រថាប់ត្រាឲ្យគណបក្សប្រជាជនកម្ពុជាឈ្នះ១០០ភាគរយ ហើយមានលេសកាន់អំណាចបំផ្លាញជាតិតទៅទៀត ។ គណបក្សអាប និងគណបក្សអំពិលអំពែកទាំង១៩នោះមិនគួរចូលមកលេងល្បែងដ៏ថោកទាបបែបនេះសោះ ពីព្រោះជាការចូលដៃជាមួយគណបក្សប្រជាជនកម្ពុជាក្នុងការសម្លាប់ជាតិមាតុភូមិកម្ពុជារបស់យើងទាំងអស់គ្នា ។
លោកបានអះអាងថា ទោះបីជាគណបក្សអាប ឬអំពិលអំពែកណាមួយក្នុងចំណោមគណបក្សទាំង១៩ថ្ងៃនេះ អាចក្លាយដប់ឆ្នាំទៀតទៅជាគណបក្សខ្លាំងគួរសមដែលអាចយកឈ្នះលើគណបក្សប្រជាជនកម្ពុជា ពេលនោះសម្តេច ហ៊ុន សែន ច្បាស់ជានឹងរំលាយគណបក្សនោះមិនឲ្យឈ្នះទាន់ដូចគាត់បានរំលាយគណបក្សសង្គ្រោះជាតិថ្មីៗនេះអញ្ចឹងដែរ ។ ពិភពលោកដឹងហើយពេលនេះថា គណបក្សកាន់អំណាច មិនហ៊ានលេងល្បែងប្រជាធិបតេយ្យទៀតទេ ពីព្រោះ គាត់ដឹងថា គាត់ច្បាស់ជាចាញ់គណបក្សប្រឆាំងដែលបានរីកធំដូចគណបក្សសង្គ្រោះជាតិ បើមានការបោះឆ្នោតត្រឹមត្រូវពិតប្រាកដ ។
សូមជម្រាបថា អតីតប្រឆាំងតែងតែលើកឡើងថា ការបោះឆ្នោតនៅពេលខាងមុខនេះ ដើម្បីនាំនូវការផ្លាស់ប្តូរ ប៉ុន្តែអ្វីដែលរំពឹងរបស់អតីតបក្សប្រឆាំងត្រូវបានបរាជ័យត្រូវបានរំលាយចោល ហើយគ្មានឈ្មោះបោះឆ្នោតទេ ៕
ចែករំលែកព័តមាននេះ