ខេត្តកំពត ៖ ខណៈពេលនេះដីនៅក្នុងក្រុងកំពត កំពុងតែមានតម្លៃគ្រប់ទីកន្លែង ជាពិសេសនៅតំបន់ជាប់មាត់សមុទ្រ និងតំបន់មាត់ទឹកតាមដៃព្រែក ដោយសារតែដីមានហាងឆេងនៅទូទាំងក្រុងដូច្នេះហើយ បានជាមានក្រុមអ្នកគួកជេដីនៅក្នុងក្រុងកំពត នៃខេត្តដែលមានសក្តានុពលទេសចរណ៍មួយនេះកំពុងត្រូវប៉ាន់ក្នុងការដើរគួកជេដីសម្រាប់លក់ឲ្យឈ្មួញក្នុងតម្លៃមួយម៉ែត្រការ៉េពី៥០ដុល្លារទៅ១០០ដុល្លារក៏មាន ។…
ខេត្តកំពត ៖ ខណៈពេលនេះដីនៅក្នុងក្រុងកំពត កំពុងតែមានតម្លៃគ្រប់ទីកន្លែង ជាពិសេសនៅតំបន់ជាប់មាត់សមុទ្រ និងតំបន់មាត់ទឹកតាមដៃព្រែក ដោយសារតែដីមានហាងឆេងនៅទូទាំងក្រុងដូច្នេះហើយ បានជាមានក្រុមអ្នកគួកជេដីនៅក្នុងក្រុងកំពត នៃខេត្តដែលមានសក្តានុពលទេសចរណ៍មួយនេះកំពុងត្រូវប៉ាន់ក្នុងការដើរគួកជេដីសម្រាប់លក់ឲ្យឈ្មួញក្នុងតម្លៃមួយម៉ែត្រការ៉េពី៥០ដុល្លារទៅ១០០ដុល្លារក៏មាន ។
ជាមួយគ្នានេះដែរ សម្រាប់អ្នកដែលមានដីស្នាក់នៅជាបណ្តោះអាសន្ននៅតាមដងព្រែកកំពង់បាយ ព្រែកវត្តត្រើយកោះ ដែលតភ្ជាប់ពីព្រែកស្ពានបេសេអ៊ី (BCI) ស្ថិតក្នុងក្រុងកំពតនាពេលកន្លងមក ដែលអាជ្ញាធរក្រុង និងមន្ត្រីជំនាញក្រុងបានហាមឃាត់មិនឲ្យសង់សំណង់រឹងមាំនៅលើដីចំណីព្រែកខាងលើ ដែលជាហេតុនាំឲ្យបាត់បង់សោភណ្ឌភាពក្រុង និងប៉ះពាល់ដល់បរិស្ថានខាងគម្របឆ្នេរផងដែរ។
ប៉ុន្តែឥឡូវនេះ គេឃើញតំបន់ដែលអាជ្ញាធរក្រុងបានហាមឃាត់ខាងលើ ត្រូវបានអ្នកដែលកាន់កាប់បណ្តោះអាសន្នកន្លងមកនោះ លក់ទៅឲ្យអ្នកផ្សេងជាច្រើនតំណរ រួចអ្នកដែលហ៊ានទិញផ្ទះលើដីចំណីព្រែកក្នុងទឹកដែលគ្មានប្លង់កម្មសិទ្ធិពីមន្ទីរជំនាញផងនោះ បានសង់លំនៅឋានដោយចាក់សសរបេតុងបុកគ្រឹះយ៉ាងរឹងមាំចុះទៅក្នុងទឹកព្រែកយ៉ាងអាណាធិបតេយ្យដោយគ្មានកោតញញើតនឹងច្បាប់ហាមឃាត់ណាបន្តិចសោះឡើយ។
ការសង់លំនៅឋានដោយគ្រឹះរឹងមាំរំលោភលើដីចំណីព្រែកជាច្រើនកន្លែងនៅក្នុងក្រុងកំពត និងស្រុកទឹកឈូ ដែលមានព្រំប្រទល់ជាប់ក្រុងកំពតមានដូចជា នៅចំណុចជាប់ស្ពានផែកំពង់កណ្តាល ស្ថិតក្នុងភូមិកំពង់កណ្តាល ឃុំជុំគ្រៀល ស្រុកទឹកឈូ ។ ព្រែកវត្តត្រើយកោះចំណុចខាងកើតអ៊ូទូកតាលី ស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ដែលសំណង់ជាច្រើនកន្លែងនៅចំណុចនេះ គេឃើញសំណង់ខ្លះកំពុងចាក់ដីចុះទៅក្នុងទឹកព្រែក ហើយរៀបខឿនថ្មយកដីចំណីព្រែក សំណង់ខ្លះកំពុងបុកគ្រឹះ ចាក់សសរបេតុងចុះទៅក្នុងទឹកព្រែកយ៉ាងជ្រៅផងដែរ ។
ទាក់ទិននឹងការសាងសង់សំណង់អាណាធិបតេយ្យរំលោភចុះក្នុងទឹកព្រែកជាច្រើនកន្លែងរបស់ជនឆក់ឱកាសមួយចំនួនតូចខាងលើ កោះសន្តិភាពបានសុំការបំភ្លឺពីលោក លាង រឿនសុទ្ធី អភិបាលក្រុងកំពត កាលពីព្រឹកថ្ងៃទី៦ ខែកក្កដា ឆ្នាំ២០១៨ ដើម្បីសុំការបកស្រាយបំភ្លឺជុំវិញសំណង់អាណាធិបតេយ្យដែលច្បាប់ហាមឃាត់ខាងលើ ហើយត្រូវបានលោកអភិបាលក្រុងឲ្យដឹងថា ការសាងសង់សំណង់រឹងមាំរំលោភក្នុងដីចំណីព្រែកនេះ គឺគ្មានច្បាប់ឯណាអនុញ្ញាតឲ្យបុគ្គលនោះសាងសង់ទេ ប៉ុន្តែបុគ្គលមួយក្តាប់តូចទាំងនោះ បានលួចសាងសង់ដោយគ្មានច្បាប់អនុញ្ញាតនោះឡើយ ៕
ចែករំលែកព័តមាននេះ