ខេត្តក្រចេះ ៖ យ៉ាងហោចណាស់មានមនុស្សម្នាក់បានស្លាប់និងក្មេងចាស់បីនាក់ទៀត រងរបួសធ្ងន់ដោយមែកឈើបាក់សង្កត់ផ្ទះ រីឯផ្ទះឈើតូចធំ២០ខ្នងទៀតត្រូវរងការខូចខាតប៉ើងដំបូល និងដួលទ្រេតក្នុងហេតុការណ៍ខ្យល់ព្យុះកំបុតត្បូងបានកើតឡើង កាលពីវេលាម៉ោង៧និង៣០នាទីយប់ថ្ងៃទី១៤ មីនា ២០១៣ នៅក្នុងឃុំស្នួល ស្រុកស្នួល។
ប្រភពព័ត៌មានពីស្រុកស្នួល ឲ្យដឹងថា មានព្យុះកំបុតត្បូងមួយបានបក់បោកយ៉ាងខ្លាំងកាលពីវេលាម៉ោង៧និង៣០នាទីយប់ ក្នុងនោះបង្កឲ្យមានមែកគគីរមួយមែកធំបានធ្លាក់បាក់សង្កត់មកលើលំនៅឋានមួយខ្នង ទំហំ៥គុណ៦ម៉ែត្រ ធ្វើអំពីឈើប្រកស័ង្កសី ដែលមានទីតាំងនៅខាងក្រោយផ្នែករដ្ឋបាលព្រៃឈើស្នួល បង្កឲ្យមនុស្សប្រុសម្នាក់ស្លាប់ពេលបញ្ជូនមកសង្គ្រោះនៅមន្ទីរពេទ្យស្រុកស្នួល និង៣នាក់ទៀតរងរបួសធ្ងន់។ ប្រភពព័ត៌មានឲ្យដឹងទៀតថា ជនរងគ្រោះទាំង៤នាក់ បានជ្រកភ្លៀងក្នុងផ្ទះជុំគ្នា ខណៈពេលមេឃភ្លៀង និងមានខ្យល់ខ្លាំង ក៏ត្រូវមែកគគីរមានទំហំប្រវែងជាង១០ម៉ែត្រ ទំហំមួយអោបបានបាក់សង្កត់មកលើផ្ទះ បណ្តាលឲ្យមនុស្សក្មេងចាស់នៅក្នុងផ្ទះនោះស្លាប់ និងរបួស។
លោកវរសេនីយ៍ត្រី ចាន់ សុគីម អធិការនគរបាលស្រុកស្នួល បានឲ្យដឹងថា ជនរងគ្រោះទាំង៤នាក់នេះ ១-ឈ្មោះសៅ ប៊ុន គីម អាយុ៤០ឆ្នាំ បានស្លាប់ពេលបញ្ជូនមកដល់មន្ទីរពេទ្យ ២-ឈ្មោះធីម លីហួ អាយុ១០ឆ្នាំ រងរបួសបាក់ជើងទាំងសងខាង ៣-ឈ្មោះក្រៀល វ៉ា អាយុ៥០ឆ្នាំ រងរបួសបាក់ឆ្អឹងខ្នង និង៤-ឈ្មោះម៉ៅ ញ៉េង អាយុ៤៨ឆ្នាំ រងរបួសបាក់ជើងម្ខាង និងមានម៉ូតូមួយគ្រឿងទៀតត្រូវខូចខាតផងដែរក្នុងហេតុការណ៍នោះ៕
ចែករំលែកព័តមាននេះ